Ehampuruko lyomukeke kureta ruhafo nye hena noyitumbukira yoyinene. Ngovareti wovape, ngomu ya dimburura asi siruwo nononkondo deni ngomu di ruganesa mokupakera mbili mukeke. Kudira kugwana nompofu dokugwanena po ntani nosinka kuvhura kureta maudigu mononkwara deni. Nove nomulikwali goge mwa hepa kutura po marunduruko yipo mu pakere mbili mukeke nokunkondopeka nonkwara deni. Ngapi nompango doBibeli nadi mu vatera mu lididimikire maukaro ogo?

EYI ZA UYUNGA BIBELI: “Eharo kwa kwata nedidimiko nounambili.” Ntani hena “kapi ali papara yeeyi lya hara lyene, kapi ali nyegenya.” (1 Vakolinte 13:4, 5) Ngazinya gomupe, ove ngo demenena unene kupakera mbili mukeke. Nye, mugara goge kuvhura nga lizuvhe asi ono mu sigilire, yipo nye wa ha divara asi nage ana ku hepa. Nelididimiko nombili, mu likida a lizuvhe asi ono mu hepa ntani nage mu pulisira a ku vatere mokupakera mbili mukeke.

Bibeli kutanta asi: “None si vagara, omu kare nonondunge novakadi veni.” (1 Peturusa 3:7) Wa hepa kuyikwata egano asi mukadoge nga ruganesa nonkondo dendi mokupakera mbili mukeke. Situmbukira oso sosipe kuvhura ngasi mu retere eroroko nosinka neguwo. Poyiruwo yimwe, kuvhura nga ku handukire, nye wa hepa kulipangera morwa “kukara mudidimiki kwa pitakana unankondo.” (Yisewe 16:32) Wa ha handuka nye kwatesa ko mukadoge.—Yisewe 14:29.

EYI NO RUGANA:

• Guhya: Vatera mukadoge pokupakera mbili mukeke nampili masiku. Sesupika siruwo esi o ruganesa koyininke yapeke yipo o kare kumwe namukadoge nomukeke

• Zinya: Nsene mugara goge ana hara kukuvatera mokupakera mbili mukeke, tambura evatero lyendi. Nsene kapi ana kuyirugana moomu ya wapera, wa ha mu handukira nye mu likida monkedi zongwa omu na yi rugana

EYI ZA UYUNGA BIBELI: ‘Tava kara rutu rumwe tupu.’ (Mateusa 19:5) Nampili mu kare nomukeke, wa hepa kudiworoka asi nove nomulikwali goge simpe “rutu rumwe.” Yipo nye, rugana unene o nkondopeke elikwatakano lyeni.

Vakadi, tambureni evatero lyovagara veni. Nonkango deni donongwa dorupandu “kuverura.” (Yisewe 12:18) Vagara, tantereni vakadi veni asi mwa va hara ntani awo mulyo. Va pandadekeni kweyi ava pakere mbili epata.—Yisewe 31:10, 28.

Bibeli kutanta asi: “Pwa ha kara ogu a kondjere uwa wamwene, nye a kondjere wamukwawo ntani.” (1 Vakolinte 10:24) Ruganena nkenye apa mulikwali goge uwa. Ngovalikwali, litulireni po siruwo sokuuyunga nokulipurakena nokulipandadeka. Kombinga zeligwanekero panyama wa ha kondjera tupu malizuvho goge. Bibeli kwa uyunga asi: “Walye omu linyoka-nyoka, ntudi kuna yi lizuvhu posiruwo simwe.” (1 Vakolinte 7:3-5) Yipo nye, uyunga usili nomulikwali goge omu ono kulizuvha kuhamena eligwanekero panyama. Kulididimika nokukwata egano mulikwali goge ngayi nkondopeka elikwatakano lyeni.

EYI NO RUGANA:

• Litulireni po siruwo mu kare kumwe mouvali weni tupu

• Tumina mbudi mulikwali goge ndi mu randera uhwi yipo a lizuvhe asi wa mu hara

EYI ZA UYUNGA BIBELI: “Ove hena hawa tunda unona woge, matjangwa gokupongoka wa ga diva, aga aga ku pe ukonentu.” (2 Timoteusa 3:15) Zogereni eyi ngomu rugana mokuronga munweni. Nampili simpe mezimo ana kara kuvhura a lironge. Mezimo, mukeke kuvhura kuzuvha ezwi lyoge nomalizuvho goge. Mu resera nampili age simpe mukeke. Nampili a dire kukwata egano eyi ono kuresa, ngayi ka mu ninkisa a ka kare neharo lyokuresa apa nga kura.

Mukeke kuvhura kuyizuvha apa o uyunga kuhamena Karunga. Yipo nye, kanderera kumwe nendi. (Deuteronomium 11:19) Nsene tomu danauka nendi, zogera nage yininke eyi ga sita Karunga. (Episarome 78:3, 4) Ngomu nga kura, nga dimburura eharo lyoge lyokuhara Jehova ntani nage ngayi mu tumangeda a mu hare.

EYI NO RUGANA:

• Hundira Jehova a ku pe unongo omu no ronga munoge

• Rugurura nonkango nomagano aga na vhura kulironga munoge age simpe mukeke