RUHA 8
Nsene simpagwa sina horoka
“Hafeni morweyi, nampili ngomu mwa fira kuguva karuwogona morwamaheteko peke-peke gomanzi aga aga mu gwana.”—1 Peturusa 1:6
Nampili o liture mo unene kukara nononkwara nepata lyoruhafo, yininke kuvhura kuhoroka hararasi eyi nayi ku retera ruguwo. (Muudisi 9:11) Karunga kutuvatera apa atu ligwanekere nomaudigu. Nsene o kwama nompango domoMatjangwa dina kukwama ko, nove nepata lyoge ngomu lididimikira maudigu gomanene.
1 HUGUVARA MWAJEHOVA
EYI ZA UYUNGA BIBELI: “Mu peni yinka yeni nayinye, yeeyi age kumupakera mbili.” (1 Peturusa 5:7) Diworoka nkenye apa asi Karunga kapisi yige a retesa po maudigu goge. (Jakopo 1:13) Nsene o hedera pepi nendi, age nga ku kwafa. (Jesaya 41:10) Bibeli kutanta asi: “Omu mu tantere maudigu geni nagenye.”—Episarome 62:8.
Ngo gwana hena ehengagwido nsene o resa nokulironga Bibeli nkenye ezuva. Makura ngo limonena omu Jehova a tu “kwafa momaudigu getu nagenye.” (2 Vakolinte 1:3, 4; Varoma 15:4) Age ga tumbwidira kukupa ‘mbili zendi, ezi za pitakana unene nondunge nadinye.’—Vafilipi 4:6, 7, 13.
EYI NO RUGANA:
-
Kanderera kwaJehova a ku vatere o liture yipo o gazare nawa
-
Teda ko nokutokora nawa eyi no vhura kurugana
2 LIPAKERA MBILI NYAMOGE NTANI NEPATA LYOGE
EYI ZA UYUNGA BIBELI: “Vanandunge . . . kwa liwapaikira kulironga.” (Yisewe 18:15) Gwana mauzera nagenye. Diva eyi ana hepa nkenye gumwe gemapata lyoge. Uyunga nawo nokuvapurakena.—Yisewe 20:5.
Ngapi nsene ono fisa? Wa ha kara nowoma kulira. Diworoka asi ‘Jesus ga lilire.’ (Johanesa 11:35; Muudisi 3:4) Mulyo unene o pwizumuke po nokugwana nompofu dokugwanena po. (Marukusa 6:31) Ayo ngayi ku vatera o lididimikire udigu woge.
EYI NO RUGANA:
-
Nsene o kara nonkareso zokuzogera nkenye apa nepata lyoge, ayo ngayi va rerupira kuuyunga nove nsene maudigu gana horoka
-
Uyunga navamwe ava va pita moudigu wokulifana
3 GWANA EVATERO
EYI ZA UYUNGA BIBELI: “Vantu namukwawo kulihara. Ano vantu namumbyendi wovagara nani kapisi kwa karera po, va likwafe moudigu?” (Yisewe 17:17) Vakaume woge kuvhura va hare kukuvatera nye kapi tava diva omu nava yi rugana. Wa ha kara nowoma kuvatantera eyi ono hepa. (Yisewe 12:25) Ntani hundira evatero kwava va kara nediwo lyewa lyomoBibeli. Mavyukiso gomoBibeli aga nava ku pa taga ku vatere.—Jakopo 5:14.
Ngo gwana evatero nsene ngo likwatakana novantu ava va kara nepuro mwaKarunga ntani va huguvara momatumbwidiro gendi. Ngo gwana hena ehengagwido nsene nove o hengagwida vakweni. Tantera ko vakweni epuro lyoge mwaJehova nomomatumbwidiro gendi. Litura mo mokuvatera ava vana hepa evatero ntani wa ha ligusa ko kovantu ava va kuhara nokukupakera mbili.—Yisewe 18:1; 1 Vakolinte 15:58.
EYI NO RUGANA:
-
Tantera ko kaume koge gomunene ntani mu pulisira a ku vatere
-
Mu tantera usili eyi ono hepa