RUHA 1
“Edi da zumbana ngani di papara”
Nzwi zina zumbana. Azo kuna tundu mosiunda. Kapi zina kumona nonzwi nonkwaawo ndi musita gwazo. Mundema guna wiza, nzwi zina kara nowoma woyikasama. Makura tazi zuvhu ezwi lyomusita, ta wiza ta ya zi damuna nokuzitwara kembo.
JEHOVA kulifanekesa mwene komusita. Age kwa tutumbwidira asi: “Nyaamwange ngani papara nonzwi dange, ni di pakere mbili.”—Hesekiyeli 34:11, 12.
‘Nonzwi dousita wange’
Wolye nonzwi daJehova? Vantu ava va mu hara nokumukarera. Bibeli kutanta asi: “Wizeni, tu ya twe nongoro tu mu tongameneni; tu tongekeni komeho zaHOMPA, Muungi gwetu! Age Karunga gwetu, ose vantu ava a takamesa, siunda sononzwi esi a takamesa.” (Episarome 95:6, 7) Ngwendi moomu nonzwi adi kwama musita, vakareli vaJehova kwa hara kukwama Musita gwawo. Nye kapi va sikilira mo. Poyiruwo yimwe, vakareli vaKarunga kukara ngwendi “nonzwi edi da lihana” ndi “nonzwi dokuzumbana.” (Hesekiyeli 34:12; Mateusa 15:24; 1 Peturusa 2:25) Nampili ngoso, Jehova kapi a sigilire vakareli vendi.
Ove simpe kulizuvha asi Jehova Musita goge ndi? Ngapi Jehova ga kara Musita gwetu? Mononkedi edi ntatu:
Kutukutika pampepo. Jehova kwa uyunga asi: “Ame ngani di ninka di lye mompora.” Ntani asi: “Ame nyaamwange ngani lisa nonzwi dange, tani di gwanene evega lyokupwizumukira.” (Hesekiyeli 34:14) Jehova nkenye apa kutupa nondya dopampepo. To diworoka apa wa kanderere kwaJehova, makura to gwana elimbururo mosirongwa ndi mosiuyungwa ndi movidiyo? Ayo kulikida asi Jehova kukupakera mbili!
Kutupopera nokutuvatera. Jehova kwa tumbwidira asi: “Edi da rwarwa ngani di dinga, dokuyova ngani di koreka.” (Hesekiyeli 34:16) Jehova kukoreka ava ava roroka morwa yinka. Age pamwe kuruganesa vakareli vendi va hengagwide vapuli vakwaawo ava vana dombo mutjima. Age kupapara ava va zumbana ntani nava vana kulizuvha unzoni.
Kutupakera mbili. Jehova kwa uyunga asi: “Moomu tupu a papara musita nonzwi edi da lihana a di pongaike hena, yimo ngani di gusa ngorooro komavega peke-peke.” Ntani “edi da zumbana ngani di papara.” (Hesekiyeli 34:12, 16) Jehova kapi a sigilire nzwi zokuzumbana. Age ga diva ezi azi zumbana makura ta zi papara ano apa na ka zi gwana ta hafa. (Mateusa 18:12-14) Age kutumbura vakareli vendi wousili asi “nonzwi dange, nononzwi dousita wange.” (Hesekiyeli 34:31) Nove nzwi zendi.
Jehova kapi a sigilire nzwi zokuzumbana. Apa nava zi gwana ta hafa
“Tu wapekera efumano lyetu lyanare”
Morwasinke Jehova ana kukupaparera o tengwire kwendi? Morwa ana hara o hafe. Age kwa tumbwidira nonzwi dendi asi: “Ame ngani va tungika.” (Hesekiyeli 34:26) Ove wa limonena matungiko ogo.
Diworoka apa wa tamekere kulironga kuhamena Jehova. Ngapi omu wa lizuvhire apa wa lirongere usili kuhamena edina lyaKarunga nositambo sendi kovantu? Ngapi omu wa lizuvhire apa wa ka kere novapuli vakweni poyigongi? Ngapi omu wa lizuvhire apa wa tanterere ko vantu mbudi zongwa?
Kuvhura o tengwidire po ruhafo oro. Vakareli vaKarunga vanare kwa kanderere asi: “HOMPA, tu tengwida koge! Tu tengwida! Tu wapekera efumano lyetu lyanare.” (Malirankali 5:21) Jehova ga limbwilire ekanderero olyo ano vantu vendi kwa tengwire kwendi nokumukarera noruhafo. (Nehemiya 8:17) Jehova nage nga ku ruganena yokulifana.
Kapi ya kara ureru kutengura kwaJehova. Koneka maudigu gamwe ga hamena mo ntani nomu no ga funda po.
