Komupuli mukwetetu gokuhara:

MoBibeli kwa simwitira mo vantu wovanzi. Sinzi sawo kwa kere vagara novakadi wovalimburukwi ava va kere nomaudigu nomalizuvho “ngwendi nyose.” (Jakopo 5:17) Vamwe kwa va rorwere yinka nomaudigu. Ano vamwe kwa va zuvhisire kukora komutjima vemepata ndi vapuli vakwaawo. Ntani vamwe kwa lizuvhire unzoni morwa mapuko gavene.

Awo va zumbire Jehova ndi? Hawe. Sinzi sawo kwa kere ngwendi mutjangi gemepisarome ogu ga kandererere asi: “Ame kuna kurenda-renda ngwendi nzwi zokuzumbana; wiza yo papare mukereli goge, yeeyi kapi na zumba noveta doge.” (Episarome 119:176) Nove wa lizuvha rumwe ngoso ndi?

Jehova kapi a divara vakareli vendi ava ava tundu mosiunda sendi. Age kuvapapara pokuruganesa vapuli vakwaawo. Pasihonena, Jehova kwa vaterere mukareli gwendi Joba ogu ga ligwanekerere nomaudigu gomanzi, ngwendi kuzumbanesa yiweka yendi novana vendi ntani uvera wounene. Ntani Joba ga lididimikilire nonkango dokukoresa edi va mu uyungilire vakwaawo. Nampili ngomu pamwe ga kere nomagazaro gepuko, age kapi ga zumbire Jehova. (Joba 1:22; 2:10) Ngapi omu Jehova ga vaterere Joba?

Jehova kwa vaterere Joba kupitira mwaElihu, mupuli mukwaawo. Apa Joba ga pwagesere malizuvho gendi, Elihu kwa purakenene komeho a uyunge. Yisinke ga uyungire Elihu? Age ga pangwire Joba nokumupa usima ndi? Age ga limwene asi ga pitakana Joba ndi? Hawe. Nevatero lyompepo zaKarunga, Elihu kwa tente asi: “Ame nove vamwe tupu kosipara saKarunga, mouvali wetu kwa tu unga nerova.” Makura ta hengagwida Joba asi: “Ano ove neisi yokukuninkisa o tjire nge; ame kapi nani kudininina po.” (Joba 33:6, 7) Mevango lyokuzuvhisa mukwaawo kukora komutjima, Elihu kwa geve mapukururo gomawa nekorangedo eli ga hepere Joba.

Nose komeho tu tjange sifo esi, pomuhowo kwa purakenene nokukonakona maukaro gava va zumbire Jehova. (Yisewe 18:13) Ntani twa tere moMatjangwa tu konakonene nawa yihorokwa omu Jehova ga vaterere vakareli vendi vanare ava va pitire momaudigu ngwendi getu. Makura yipo twa tjenge yihorokwa oyo neyi yina kuhoroka naina mosifo esi. Kuna kukuhundira o konakone nawa sifo esi. Diva asi ose kwa ku hara unene.

Mbungagendesi zoNombangi daJehova