RUHA 3
Kukora komutjima
Linda kwa tente asi: “Munazinyetukadi gomombungakriste zetu kwa rundilire nge asi nina vaka yimaliwa yendi. Apa va yi zuvhire vamwe womombungakriste, tava mu kwatesa ko. Konyima ta ya tantere nge asi kapisi nyame na yi veke. Nampili ngomu ga pulire nge egusiropo, ame kwa lizuvhire momutjima asi kapi ngani mu gusira po kweyi ga rugana nge.”
NGWENDI Linda, nove ga ku koresa rumwe komutjima mupuli mukweni ndi? Vamwe kwa teza po elikwatakano lyawo naJehova morwa nkareso zovakwaawo. Nove ya ku horokera oyo ndi?
Muntu kuvhura a tu ‘guse mo meharo lyaKarunga’ ndi?
Kuvhura yi tu digopere kugusira po munazinyetu ogu ana tu koresa komutjima morwa ose Vakriste ngano twa hepa kulihara-hara. (Johanesa 13:34, 35) Nsene munazinyetu a tu zona, kuvhura tu lizuvhe kukora unene komutjima.—Episarome 55:12.
Bibeli za yi kwatesa ko asi poyiruwo yimwe Vakriste kuvhura ‘kulizonena.’ (Vakorosi 3:13) Nye nsene yi tu horokera, kuvhura yi kare udigu kulididimikira. Yisinke nayi tu vatera? Tu konakoneni nompango ntatu domoMatjangwa:
Guhyetu gemeguru ga diva nayinye. Jehova kumona nayinye eyi ayi horoka, kukwatera mo udona nomu au tu koresa komutjima. (Vahebeli 4:13) Ntani hena, Jehova kuzuvha kukora apa atu hepa. (Jesaya 63:9) Age kapi nga pulisira “udigu ndi mpwagetjima” ndi nkenye eyi, nampili gumwe govakareli vendi, a tu ‘guse mo meharo lyendi.’ (Varoma 8:35, 38, 39) Nose ngano tu rugane yokulifana, pokudira kupulisira nkenye eyi ndi nkenye ogu mokuteza po elikwatakano lyetu naJehova.
Kugusira po kapi aku kwatesa ko udona. Apa atu gusire po ogu ana tu zono, kapi ayi tanta asi ose ngoso kuna kukwatesa ko eyi ana tu rugana. Diworoka asi Jehova kapi a hafere nonzo, nye age kugusira po nsene pana kara konda zokuyirugana. (Episarome 103:12, 13; Habakuku 1:13) Age kutukorangeda tu gusire po wopeke, yipo tu mu honene. Age “kapi a handuka narunye.”—Episarome 103:9; Mateusa 6:14.
Kuzumba ehandu kuturetera uwa. Monkedi musinke? Tu ninke asi to damuna emanya lyoudigu. Kapi nayi ku karera udigu kulikwaterera karuwogona. Nye ngapi nsene no li kwaterera siruwo sosire? Konyima zonominute dongandi ndi vili ndi kupitakana opo, no roroka unene! Mukumo gemanya kapi nagu runduruka. Nye moomu ono kulikwaterera siruwo sosire yimo hena no zuvha udigu wemanya. Ayo ya lifana nokuhanduka. Moomu tuna kukara nonkoko momutjima siruwo sosire yimo hena tuna kulirorora nyamwetu. Eyi yiyo Jehova a tu korangedere asi tu zumbe ehandu. Ayo ngayi tu retera uwa. —Yisewe 11:17.
Kuzumba ehandu kuturetera uwa
“Ame kwa lizuvhire ngwendi Jehova kuna kuuyungisa nge”
Yisinke ya vaterere Linda a dire kukara nonkoko kweyi ga mu rugene mupuli mukwawo? Age kwa tedere ko kokonda zoPatjangwa zeyi na dongwenena po wopeke. (Episarome 130:3, 4) Linda ga dimbwilire asi mokuninka asi Jehova a mu dongwenene po, nage ga hepa kudongwenena po wopeke. (Vaefeso 4:32–5:2) Ayo kwa mu tumangedere a uyunge asi: “Ame kwa lizuvhire ngwendi Jehova kuna kuuyungisa nge.”
Mwaza siruwo, Linda ga nyokerere po nkoko. Age ga dongwenene po munazinyetu gwina, awo ngesi vakaume wovanene. Linda simpe kuna kutwikira kukarera Jehova. Nove Jehova ana hara kukuvatera o rugane yokulifana.
Kuvhura o hafere hena
RUHUNGU (SIFO SELIRONGO)
Wa ha pulisira nkenye eyi yi ku guse ko kwaJehova
Konakona omu no tura po matokoro gomawa kuhamena yirugana noyilihafeso nelikwatakano nepata.
