RUHA 5

Tengura ‘koMusita, Mutakamesi gomwenyo goge’

PLAY

Nove wa ligwanekera nomaukaro aga va zogera mosifo esi ndi? Ngwendi nyove, vakareli wovanzi vaKarunga wovalimburukwi womosiruwo sanare ntani womosiruwo setu nawo va ligwanekera nomaukaro aga. Jehova kuvhura a ku vatere ngwendi moomu ga va vaterere.

Jehova nga ku vatera nsene o tengura kwendi

JEHOVA nga ku vatera nsene o tengura kwendi. Age nga ku vatera o lididimikire yinka nokufunda po malizuvho gokukora ntani nokugwana mbili zopamagazaro ezi azi tundu mokukara nezwi lyewa lyokomutjima. Makura ngayi ku tumangeda o karere Jehova kumwe novapuli vakweni. Ukaro woge ngau lifana nou woVakriste vamwe womosiruwo saPeturusa ogu ga tjenge asi: “One kwa fene ngwendi nonzwi dokuzumbana, nye ntaantani muna tengura koMusita, Mutakamesi gonomwenyo deni.”—1 Peturusa 2:25.

Kutengura kwaJehova kuna kara sininke somulyo kurugana. Morwasinke? Morwa ngayi hafesa Jehova. (Yisewe 27:11) Ngomu wa yi diva, Jehova ga kara nomalizuvho, yirugana yetu kumukundama. Jehova kapi a tu sininike tu mu hare ndi tu mu karere. (Deuteronomium 30:19, 20) Mulirongi gumwe goBibeli kwa tanta asi: “Eharo lyokuhara Jehova kapi ali wiza po pwalyene. Wa hepa kulitunga po nyamoge momutjima.” Pokutunga po eharo olyo, ose ngatu karera Jehova morwa twa mu hara. Pokurugana ngoso, ose ngatu mu limburukwa ano ayo ngayi hafesa mutjima gwendi. Kwato eyi yokuvhura kuhetakanesa noruhafo oru atu gwana pokugava kwaJehova ukareli ou wa mu fira.—Yirugana 20:35; Ehororo 4:11.

Nsene ngo tengura kwaJehova, ngo nkondopeka elikwatakano lyoge nendi. (Rukasa 11:28) Monkedi musinke? Vantu uzuni mudima kulipura asi: ‘Yisinke sitambo separu?’ Va hara kudiva malimbururo kuhamena sitambo separu. Vantu kwa kara neharo lyokudiva Jehova, morwa yimo ga va sita. Age kwa tu sita asi tu gwane ruhafo pokumukarera. Ose ngatu gwana ruhafo rorunene pokudiva asi ose kuna kukarera Jehova morwa twa mu hara.—Episarome 63:1-5.

Jehova kuna ku harere o tengure kwendi. Ngapi omu no yi diva? Mbungagendesi kwa kanderere unene komeho va ka wapaike sifo esi. Nampo mukuronambunga ndi mupuli mukweni ga si ku retera. Makura yipo wa si resa nokutambura mbudi zamo. Nayinye eyi kulikida asi Jehova kapi ga ku divara. Nye age kuna kukukokera kwendi.—Johanesa 6:44.

Ose kuvhura tu gwane ehengagwido pokudiva asi Jehova kapi ga divara vakareli vendi wokuzumbana. Yimo ngoso ga yi dimbwilire munazinyetukadi Donna. Age kwa tente asi: “Ame kwa sigire usili kanunu-kanunu, nye nkenye apa ngani diworoka Episarome 139:23, 24, eli lya tanta asi: ‘Konakona nge Karunga, o dive mutjima gwange; tara nge, o koneke magazaro gange. Tara, nsene asi monzira zezumbano na kara, ove o gendese nge hena monzira zanarunye.’ Na ya yi dimbwilire asi kapi na hamena kouzuni nye kwa hamena kombunga Jehova. Makura yipo na dimbwilire asi Jehova kapi ga sigilire nge, na hepere tupu kutengura kwendi. Na hafa kweyi na tengwire!”

“Makura yipo na dimbwilire asi Jehova kapi ga sigilire nge, na hepere tupu kutengura kwendi”

Tuna si huguvara asi nove ngo gwana hena “ehafo lyomwaHOMPA.” (Nehemiya 8:10) Kapi ngo livera nsene o tengura kwaJehova.

Malimbururo komapuro kuhamena kutengura kwaJehova

NGAPI NANI TAMEKA?

Muntu ogu ga verere, kutameka yirugana yendi kanunu-kanunu. Mokulifana, kuvhura o nkondopeke elikwatakano lyoge naJehova pokulya nondya dopampepo kanunu-kanunu nkenye ezuva. Wa ha lizuvha asi wa hepa kurugana nayinye posiruwo simwe tupu. Nampo kuvhura o ruganese nominute dongandi mokuresa ndi mokupurakena komakwateko goBibeli ndi o rese simwe soyimbapiratjangwa yetu ndi o tare koIntaneta zetu ndi o tarere elikwamo lyetu lyokoIntaneta tv.pr418.com. Tameka hena kuza komapongo. Kanderera kwaJehova a ku vatere. Bibeli kutanta asi: “Mu peni yinka yeni nayinye, yeeyi age kumupakera mbili.”—1 Peturusa 5:7.

Eeva kwa tente asi: “Apa na tengwire monyima, ngani lizuvhu nomuga kukanderera. Apa na kere nononkondo dokukanderera, mukuronambunga kwa ya dingwire nge. Age ga vaterere nge ni dimburure asi Jehova kapi ga sigilira nge. Yipo ga tanterere nge asi ni tameke kuresa Bibeli nkenye ezuva. Apa na tamekere, yipo na gwene nonkondo dokuza komapongo. Mwaza siruwo, yipo na tamekere kuzuvhisa hena. Ame nina hafa asi Jehova kapi ga sigilira nge.”

NGAPI NGAVA TARA NGE WOMOMBUNGAKRISTE ?

Womombungakriste ngava ku tambura neharo. Awo kapi ngava ku pangura nye ngava ku likida eharo nokukukorangeda. —Vahebeli 10:24, 25.

Javier kwa tente asi: “Ame kwa lizuvhire nomuga kutengura koSinyanga soUhompa. Kwa kere nosinka omu nava ka tare nge womombungakriste. Munazinyetukadi gumwe gomukurupe gomombungakriste zetu kwa tambwire nge pokutanta asi: ‘Twa ku tambura munwange!’ Nonkango odo kwa gumine nge komutjima. Kwa lizuvhire sili asi vana tambura nge.”

Marco kwa tente asi: “Apa na zire koSinyanga soUhompa ame kwa hingilire oku nava dira kumona nge usimbu. Nye wovanzi va dimbwilire nge morwa ngani zi komapongo kutunda unona wange. Awo kwa tambwire nge nokulidingira nge, ano na lizuvhire mbili. Ame kwa lizuvhire asi vana tambura nge.”

NGAPI NGAVA VATERA NGE VAKURONAMBUNGA?

Vakuronambunga ngava ka ku tekura neharo. Ngava ka ku pandura kweyi ono hara kutengwidira po ‘eharo lyoge eli wa kere nalyo muhowo.’ (Ehororo 2:4) ‘Monkedi zongwa,’ ngava ka ku vatera o wapukurure mapuko goge. (Vagarata 6:1; Yisewe 28:13) Vakuronambunga ngava tura po ewapaiko yipo gumwe nga lironge nove, nampo mobuke ngwendi Draw Close to Jehovah ndi “Omu kare meharo lyaKarunga.” Awo ngava ku hengagwida nokukuvatera.—Jesaya 32:1, 2.

Victor kwa tente asi: “Monomvhura ntantatu edi na tengwire monyima, vakuronambunga va twikilire kuheteka kuvatera nge. Ezuva limwe, mukuronambunga kwa likidire nge mafano gamwe aga ga tu fanekere nare. Ago kwa ninkisire nge ni diworoke ruhafo oru ngani lizuvhu apa ngani karere Jehova. Awo kwa vaterere nge ni tengwidire po elikwatakano lyange naJehova.”

“Nga ku nkondopeka”

Buke zetu zononsumo, Dimbireni Jehova, mwa kara nonsumo dononzi edi nadi ku hengagwida nokukukorangeda o tengure kwaJehova. Pasihonena, rusumo 60, oru va gusa mwa-1 Peturusa 5:10, rosiparatjangwa “Nga ku nkondopeka.”

Momutjima goge Jehova ga mwene

Eharo lyoge lyokumudiva.

Makura Jehova ga ku koka kwendi

Yipo o ya hame kouzera.

Wa ligava kwendi o mu kwame,

Age narunye nga kara nove.
Mbeli zendi, age ga mu ku pa mwene

Ga hara asi yi ku tompoke.

Mokumona asi ga tu pere Mbeli,

Nga ka tu pa nayinye yapeke.

Kapi nga divara uwa woge,

Age nga ku vatera narunye.

(CHORUS)

Ga ku randa ndiro, kwaKarunga wa hama.

Nga ku nkondopeka nokukupameka.

Nga ku gendesa ntani nokukupopera,

Nga ku nkondopeka nokukupameka.