1, 2. (a) Udigu musinke va ligwanekerere nawo Vakriste womoJudeya? (b) Sirugana musinke seharo va limonene?

MOMVHURA 46, moJudeya kwa kere mo erumbu lyenene. Varongwa woVajuda vaKristusa kapi va kere noyimaliwa yokuranda nondya edi da kere ndiro. Awo kwa va kwete nzara zonene. Nampili ngoso, Jehova ga poperere varongwa vaKristusa monkedi ezi va dira kuvapopera rumwe. Yisinke ya horokere?

² Vakriste woVajuda nava wovapagani womoAntiyokiya zomoSiliya kwa pongaikire yimaliwa mokuvatera Vakriste womoJerusarema nava womoJudeya ava va kere moruhepo. Yipo va horowere Baranabasa naSauru, va ka gave yimaliwa yekwafo kovakuronambunga womoJerusarema. (Resa Yirugana 11:27-30; 12:25.) Eharo eli va va likidire vakwaawo womoAntiyokiya kwa hafesere sili vapuli womoJudeya!

3. (a) Ngapi vantu vaKarunga naina vana kukwama sihonena soVakriste womoAntiyokiya? Gava sihonena. (Tara hena kakende “ Ekwafo lyenene lyokuhova momazuva getu.”) (b) Mapuro musinke natu ka konakona megaununo eli?

³ Sihorokwa esi, yiso sokuhova va tjanga moBibeli omu Vakriste womosirongo simwe va kwafe vakwaawo womosirongo nasopeke. Naina, ose kukwama sihonena sovanavazinyetu womoAntiyokiya. Apa atu zuvhu kuhamena simpagwa ndi eyi yina kuhorokera vapuli vakwetetu womonomukunda nadopeke, ose kuvakwafa. * Mokukwata egano omu yirugana yetu yokukwafa vanavazinyetu ya liza kumwe noyirugana yoUhompa, tu konakoneni mapuro gatatu: Morwasinke sirugana sokukwafa vanavazinyetu natu si tarere asi sa pongoka? Morwasinke atu si ruganene? Mauwa musinke atu gwanena mo mosirugana oso?

4. Yisinke ga tanterere Paurusa Vakolinte kuhamena sirugana soVakriste?

⁴ Mombilive zendi zauvali koVakolinte, Paurusa kwa fatwilire asi Vakriste kwa kara nomaruha gavali goyirugana. Nampili ngomu mbilive zaPaurusa za tembe koVakriste wovagwavekwa, naina nonkango edi kwa tamba hena ‘kononzwi dapeke.’ (Joh. 10:16) Ruha rumwe rosirugana setu kuna kara ‘sirugana sokuninka vantu va likwatakane naKarunga,’ kutanta asi sirugana sokuzuvhisa nesi sokuronga. (2 Kol. 5:18-20;  1 Tim. 2:3-6) Ntani ruha rwauvali kuna kara sirugana sokukwafa vapuli vakwetetu. Paurusa kwa tembe kosirugana esi apa ga tumbwire ava “ava kwafa vantu vaKarunga.” (2 Kol. 8:4) Nonkango edi asi ‘sirugana sokukwatakanesa’ ntani ‘kukwafa vantu vaKarunga,’ kwa tunda konkango zoRugereka ezi asi diyakoni. Yinke ga tembe Paurusa?

5. Morwasinke Paurusa ga tumbwilire sirugana sokukwafa ngosirugana sokupongoka?

⁵ Paurusa kwa ruganesere nkango ozo zoRugereka zokulifana mokulikida asi sirugana sokukwafa sa lifana noyirugana eyi ngava rugana mombungakriste. Pomuhowo, age kwa tente asi: ‘Yirugana yinzi ya kara, nye ogu ava ruganene, Hompa gumwe tupu. . . . Nayinye eyi Mpepo zimwe tupu azi yi rugana.’ (1 Kol. 12:4-6, 11) Paurusa kwa hetakanesere yirugana yokulisiga-siga yomombungakriste ‘keruganenokarunga’ ndi kosirugana sokupongoka. * (Rom. 12:1, 6-8) Eyi yiyo ya mu ninkisire a lizuvhe asi yina mu fire mokuruganesa siruwo sendi ‘mokukwafa vapongoki.’—Rom. 15:25, 26.

6. (a) Ngomu Paurusa ga yi fatwilire, morwasinke kukwafa vakwetetu kwa karera ruha roukareli wetu? (b) Faturura omu atu kwafa vakwetetu mouzuni mudima. (Tara hena kakende “ Nsene simpagwa sina horoka.”)

⁶ Paurusa kwa vaterere Vakolinte va dimburure asi kukwafa vakwetetu kwa kara ruha roukareli wetu kwaJehova. Age kwa tente asi Vakriste ava ava gava ekwafo kuyiruganena morwa kulimburukwa ndi ‘kuvhulika kwawo kombudi zongwa zaKristusa.’ (2 Kol. 9:13) Morwa eharo lyawo lyokulimburukwa marongo gaKristusa, Vakriste kukwafa vapuli vakwaawo. Paurusa kwa uyungire asi yirugana eyi ava ruganene vapuli vakwaawo kulikida ‘ufenkenda waKarunga wounene-nene.’ (2 Kol. 9:14; 1 Pet. 4:10) Mokukwatesa ko kegano eli, Ruhungu 1 Sindimba 1975 kwa uyunga kuhamena kukwafa vanavazinyetu asi: “Twa hepa kudiworoka asi Jehova Karunga naMunwendi Jesus Kristusa kutara sirugana esi asi mulyo.” Yosili, kukwafa vakwetetu kuna kara sirugana sokupongoka.—Rom. 12:1, 7; 2 Kol. 8:7; Heb. 13:16.

7, 8. Sitambo musinke sokuhova seyi atu kwafere vakwetetu? Faturura.

⁷ Yitambo musinke atu ruganene sirugana sokukwafa? Paurusa kwa limbwilire epuro eli mombilive zendi zauvali koVakolinte. (Resa 2 Vakolinte 9:11-15.) Monovelise edi, Paurusa kwa tumbwire yitambo yitatu eyi atu sikisa mo pokulihameka ‘moyirugana eyi’ yokukwafa. Tu konakoneni simwe nasimwe.

⁸ Sokuhova, kukwafa vakwetetu kuyererepeka Jehova. Koneka omu Paurusa ga korangedere vapuli vakwawo va gazare Jehova Karunga monovelise odo ntano. Age kwa va diworokesere ‘va pandure Karunga’ ntani ‘va pandese hena Karunga unene.’ (Novelise 11, 12) Paurusa kwa likidire asi kukwafa vakwetetu kuninkisa Vakriste ‘va fumadeke Karunga’ ntani va pande ‘ufenkenda wendi wounene-nene.’ (Novelise 13, 14) Ntani age kwa hagesere nzogera zendi kuhamena kukwafa  vakwetu pokutanta asi: “Tu pandureni Karunga.”—Velise 15; 1 Pet. 4:11.

9. Magazaro musinke asi gusa po sirugana sokukwafa? Gava sihonena.

⁹ Ngwendi Paurusa, vakareli vaKarunga naina kutara sirugana sokukwafa ngompito zokufumadekesa ko Jehova nokufumbura marongo gendi. (1 Kol. 10:31; Tit. 2:10) Ntani hena, kukwafa vakwetetu kugusa po magazaro gepuko aga va kara nago vantu vamwe kuhamena Jehova noNombangi dendi. Pasihonena, mukadi ogu ga tunga momukunda omu mwa horokere ekundungu lyononkondo unene kwa tulire sidiviso pevero lyembo lyendi asi: “Nombangi daJehova—Mwa ha hwilira membo lyange.” Ezuva limwe age kwa mwene varugani kuna kukwafa mokuwapukurura embo eli lya zonaukire lya livyukire nembo lyendi. Ure womazuva gongandi, age kwa nomenene varugani ava woruhafo, makura yipo ga zire a ka pure asi awo vantu musinke. Apa va mu tanterere asi awo Nombangi daJehova, age kwa tetukire nokutanta asi: “Ame kwa mu gazarera momudona.” Yitundwamo, age kwa gusire po sidiviso pevero lyembo lyendi.

10, 11. (a) Yihonena musinke ayi likida asi ose kuna kusikisa mo sitambo sauvali sosirugana sokukwafa? (b) Simbapiratjangwa musinke asi vatere varugani wokukwafa? (Tara kakende “ Sifo sokuvatera varugani wokukwafa.”)

¹⁰ Sauvali, ose “kuhepurura” vapuli vakwetetu. (2 Kol. 9:12a) Ose kugenderera mokuvatera vapuli vakwetetu noyihepwa yawo. Morwasinke? Morwa natuvenye mombungakriste “rutu rumwe tupu,” ano “nsene pa nyanda ruha rumwe, makwawo nago taga ru nyandesa ko.” (1 Kol. 12:20, 26) Yipo nye, nkenda neharo lyovanavazinyetu kuvatumangeda mokusiga yirugana yawo nokudamuna yiruganeso yawo va ka vatere vapuli vakwaawo ava vana kara mosimpagwa. (Jak. 2:15, 16) Pasihonena, konyima zomamunkupi gomanene aga ga retere ruhanzo moYapani 2011, Beteli zomoAmerika kwa tumine mbilive koNokomitiye dEtungo Yinyanga zomoAmerika, mokuvapura nsene kuvhura va gave ko “vanavazinyetu wokuwapera” va ka vatere mokukatungurura Yinyanga yoUhompa mosirongo sina. Ngapi va limbwilire? Moyivike tupu yongandi, valizambeli wokusika konyara 600 kwa tulire mo mahundiro mokukavatera, ntani awo kwa ruganesere yimaliwa yavene mokuza koYapani! Mberewa zomutayi zaAmerika kwa tente asi: “Sivaro sovanavazinyetu ava va here kukavatera kwa tu tetukisire.” Apa munazinyetu gomoYapani ga pulire mulizambeli gumwe gokosirongo nasopeke eyi ya mu tumangedere mokuwiza a ya vatere, age kwa tente asi: “Vanavazinyetu womoYapani nawo ruha ‘rorutu rwetu.’ Nose kuna kulizuvha kukora oku vana kulizuvha.” Morwa eharo lyosili, valizambeli pamwe kutura eparu lyawo mosiponga yipo va vatere vapuli vakwaawo. *—1 Joh. 3:16.

¹¹ Nampili vantu ava va dira kukara asi Nombangi nawo kwa gava rupandu rwawo kosirugana setu sokukwafa. Pasihonena, konyima zapa sa horokere simpagwa momukunda  gwaArkansas, moAmerika, 2013, saitunga kwa rapotere kuhamena valizambeli woNombangi asi: “Mbunga zoNombangi daJehova kwa wapaika valizambeli vawo ava va kara noudivi wokukwafa moyimpagwa monkedi zongwa zokuwapera.” Ngamoomu ga uyungire Paurusa, ose “kuhepurura” vanavazinyetu vana kara moruhepo.

12-14. (a) Morwasinke kusikisa mo sitambo sautatu sosirugana sokukwafa sa karera nomulyo? (b) Yisinke va uyunga ko vamwe eyi ya karera nomulyo kutengwidira po elikwamo lyoukareli konyima zosimpagwa?

¹² Sautatu, ose kuvatera ava vana kuhepa va tengwidire po elikwamo lyawo lyoukareli. Morwasinke ya karera nomulyo? Paurusa kwa tente asi ava ava gwana ekwafo ngayi va tumangeda va ‘pandure Karunga unene.’ (2 Kol. 9:12b) Ava sina kundama simpagwa nkedi zongwa zokupandura Jehova kuna kara pokutengwidira po elikwamo lyawo lyoukareli. (Fil. 1:10) Ruhungu romo-1945 kwa tente asi: “Paurusa kwa haferere . . . kupongaika yigava morwa ayo ngayi kwafa . . . Vakriste vakwawo koyihepwa yawo ntani yipo va vhure kutwikira kulihameka mosirugana saJehova sokuzuvhisa noupampi.” Naina nose kuna kara nositambo sokulifana. Mokulihameka hena mosirugana sokuzuvhisa, vanavazinyetu kulinkondopeka vene ntani novamusinda vawo.—Resa 2 Vakolinte 1:3, 4.

¹³ Tu konakoneni eyi va uyunga ko vamwe ava va gwene evatero konyima zosimpagwa, yipo va twikire kuzuvhisa ntani nomu ya va nkondopekere. Munazinyetugara kwa tente asi: “Mokulihameka moyirugana yokuzuvhisa kwa kere etungiko eli lya vaterere epata lyange. Mokuzuvhisira wopeke ayo ya tu vaterere tu divare yinka yetu.” Munazinyetukadi kwa tente asi: “Kudemenena kokuzuvhisa kwa vaterere nge ni divare simpagwa. Ntani kwa ninkisire nge ni lizuvhe mbili.” Munazinyetukadi gumwe kwa tente asi: “Nampili ngomu pwa kere epiyagano, sirugana sokuzuvhisa kwa vaterere epata lyetu tu dive eyi natu rugana. Kutantera ko wopeke kuhamena uzuni woupe kwa nkondopekere ehuguvaro lyetu eli asi yininke nayinye ngayi ka kara yoyipe.”

¹⁴ Kuza komapongo kuna kara hena elikwamo lyoukareli eli va hepa kutengwidira po usimbu-simbu vapuli vakwetetu ava vana kara mosimpagwa. Tarurura eyi ya horokerere munazinyetukadi Kiyoko gonomvhura dokuyiha yo-60. Konyima zokuzumbanesa nayinye mosimpagwa, age kwa kere tupu nosikoverero sokorutu noyicapa eyi ga dwere, ntani kapi ga divire omu na paruka. Mukuronambunga yipo ga mu tanterere asi ngava ruganena mapongo metuwa lyendi. Kiyoko kwa tente asi: “Name nomukuronambunga namukadendi ntani namunazinyetukadi gumwe twa pongere metuwa. Kapi lya kere epongo lyenene, nye lya vaterere nge ni divare kuhamena ruhanzo oru rwa horokere. Ame kwa lizuvhire mbili. Epongo olyo kwa likidire nge mulyo gokuponga kumwe noVakriste vakwetetu.” Munazinyetukadi gumwe ogu nage ga ka pongere  konyima zosimpagwa, kwa uyungire kuhamena mapongo asi: “Kwa vaterere nge ni lididimikire.”—Rom. 1:11, 12; 12:12.

15, 16. (a) Mauwa musinke va gwanenene mo Vakriste womoKolinte noVakriste navenye mosirugana sokukwafa? (b) Ngapi nose natu gwanena mo uwa mosirugana sokukwafa?

¹⁵ Kuhamena kukwafa wopeke, Paurusa kwa fatwililire Vakolinte mauwa aga ngava gwanena mo kumwe noVakriste vakwaawo nsene va lihameka mo mosirugana esi. Age kwa tente asi: “Nawo [Vakriste woVajuda womoJerusarema ava va gwene ekwafo] kumukandererera oku tava mu diworoka unene morwaufenkenda waKarunga wounene-nene kweni.” (2 Kol. 9:14) Yosili, ugavi woVakolinte kwa tumangedere Vakriste woVajuda mokukanderera po vapuli vakwaawo womoKolinte, ano eyi ya nkondopekere eharo lyawo kwawo.

¹⁶ Kutura pasirugana nonkango daPaurusa kuhamena mauwa aga atu gwanene mo mokukwafa vakwetetu naina, Ruhungu 1 Sindimba 1945, kwa tente asi: “Apa vantu vaJehova ava vatere mbunga zovapuli vakwaawo wokosirongo nasopeke, ayo kureta uumwe wounene!” Eyi yiyo vana kulimonena ava vana kurugana sirugana sokukwafa. Mukuronambunga ogu a vatere mosirugana esi, kwa tanta asi: “Kurugana sirugana esi kwa ninkisa nge ni kare nelikwatakano lyenene novanavazinyetu kupitakana pwanare.” Munazinyetukadi gumwe ogu ga gwene ekwafo, kwa uyungire asi: “Uumwe ou twa kara nawo novanavazinyetu, kureta ruhafo oru aru tu ninkisa tu lizuvhe ngwendi moParadisa.”—Resa Yisewe 17:17.

17. (a) Ngapi nonkango daJesaya 41:13 adi sikisa mo sirugana sokukwafa? (b) Tumbura yihonena yimwe omu sirugana sokukwafa asi yererepeke Jehova nokunkondopeka uumwe wetu. (Tara hena kakende “ Valizambeli mouzuni mudima kugava ekwafo.”)

 ¹⁷ Apa varugani wokukwafa ava ya siki apa sina horokere simpagwa, vanavazinyetu ava vana kara mosimpagwa kulimonena usili wetumbwidiro lyaKarunga eli asi: “Nyame HOMPA Karunga goge; ogu ani ku nkondopeke nina kutanta asi: Wa ha tjira, ame tani ku kwafa.” (Jes. 41:13) Munazinyetukadi gumwe ogu ga parukira simpagwa, kwa tente asi: “Kapi na kere nehuguvaro apa na mwene ezonauko, nye Jehova kwa vaterere nge. Evatero eli na gwene kovanavazinyetu kwa tetukisire nge.” Konyima zosimpagwa momukunda gwawo, vakuronambunga vavali kwa kwaterere mo mbungakriste pokutjanga asi: “Ekankamo lyevhu kwa retesere po kukora kokunene, nye ose twa limonenene ekwafo eli a gava Jehova kupitira movanavazinyetu. Ose ngatu resa kuhamena sirugana sokukwafa, nye ose ngesi twa ya yi limonena nomeho getu.”

18. Yisinke no rugana nsene ono hara kulihameka mosirugana sokukwafa? (Tara hena kakende “ Kwa kundamene eparu lyendi.”)

¹⁸ Nove ono hara kulimonena ruhafo romosirugana sokukwafa ndi? Nsene yimo, diworoka asi valizambeli owo narunye kuvahorowora mwava ava tungu Yinyanga yoUhompa. Tantera vakuronambunga asi ono hara nove kutura mo ehundiro lyokudika Yinyanga. Mukuronambunga ogu ga kara noudivi mosirugana sokukwafa kwa gava ediworokeso eli asi: “Wa ha za kevango lyosimpagwa ntudi nsene Komitiye zevatero lyoyimpagwa zina ku zigida.” Monkedi zangoso, sirugana setu sokukwafa ngasi genda po monkedi zongwa.

19. Ngapi omu sirugana sokukwafa asi vatere mokulikida asi ose sili varongwa vaKristusa?

¹⁹ Sirugana sokukwafa kuna kara nkedi zongwa omu natu limburukwa mpangera zaKristusa ‘zokulihara-hara.’ Kulikida eharo lyangoso, ayo kulikida asi ose sili varongwa vaKristusa. (Joh. 13:34, 35) Ee, etungiko musi tuna kara nalyo naina mokukara novarugani wovanzi wokuligava ava ava yererepeke Jehova ngomu vana kugava ekwafo kwava ava kwatesa ko Uhompa waKarunga!