1, 2. (a) Yisinke va hafera kurugana vakareli vaJehova? (b) Yisinke a tara Jehova asi mulyo?

VAKARELI vaJehova wovalimburukwi kwa hafera sirugana setungo esi asi yererepeke edina lyendi. Pasihonena, Vaisraeli kwa lihamekere mo mokutunga nononkondo nkongoronzugo ntani va geve neharo yiruganeso yokuzitungisa.—Ex. 35:30-35; 36:1, 4-7.

² Jehova kapi a tara yiruganeso asi yiyo yomulyo po mokumuyererepeka. (Mat. 23:16, 17) Yomulyo po kwendi kuna kara ukareli womutjima nagunye ntani noupampi wovakareli vendi. (Ex. 35:21; Mar. 12:41-44; 1 Tim. 6:17-19) Morwasinke? Morwa matungo kuzonauka po. Pasihonena, nkongoronzugo nontembeli ya zonauka po. Nampili ngoso, Jehova kapi ga divara yirugana yovakareli vendi wovalimburukwi ava va kwatesere ko sirugana setungo.—Resa 1 Vakolinte 15:58; Vahebeli 6:10.

3. Yisinke natu ka konakona megaununo eli?

³ Vakareli vaJehova mosiruwo setu nawo kwa rugana nononkondo mokutunga mavango goukareli. Ano eyi twa sikisa mo mepitisiro lyaHompa gwetu Jesus Kristusa kutetukisa! Yosili, Jehova kwa tungika yirugana yetu. (Epis. 127:1) Megaununo eli, tatu ka konakona yirugana yimwe eyi twa sikisa mo ntani nomu ya yererepeka Jehova. Ntani hena natu ka resa eyi va uyunga ko vamwe ava va lihameka mo mosirugana esi.

4. (a) Morwasinke tuna hepere mavango gomanzi goukareli? (b) Morwasinke va pakererera kumwe Nobeteli dimwe? (Tara kakende “ Kutunga Nobeteli kuliza noyihepwa.”)

⁴ Ngomu twa yi konakonene mEgaununo 16, Jehova kwa hara asi tu ponge mokumukarera. (Heb. 10:25) Mapongo kapi tupu aga nkondopeke epuro lyetu nye hena kutukorangeda tu kare noupampi mosirugana sokuzuvhisa. Ngomu tuna kuhedera pouhura wouzuni, Jehova kuna kugenderesa sirugana sokuzuvhisa. Ano vantu wovanzi kuna kugogomokera kombunga zendi. (Jes. 60:22) Ngomu sivaro sovakwatesiko woUhompa sina kuvhuka, pana kara hepero zokurugana yimbapiratjangwa yoBibeli. Ntani tuna hepa hena mavango gomanzi goukareli.

5. Morwasinke edina Sinyanga soUhompa lya wapera kevango lyoukareli? (Tara hena kakende “ Ngereka zomauzera gomape.”)

 ⁵ Momazuva goValirongi woBibeli, awo va mwene hepero zokukara nomavango gavene gokupongera. Evango lyawo lyokuhova lyoukareli kwa li tungilire koUtokero waVirginia moAmerika mo-1890. Koyiha yo-1930, vantu vaJehova kwa tungire nokuwapukurura yinyanga yoyinzi, nye kapi ya kere nedina. Apa munazinyetu Rutherford ga ka dingwire Hawaii mo-1935, omu va dikire sinyanga sosipe kumwe noBeteli zompe, yipo va mu pulire omu nava tumbura etungo olyo. Munazinyetu Rutherford kwa limbwilire asi: “Mokumona asi ose kurugana sirugana sokuzuvhisa mbudi zongwa zoUhompa, ngapi nsene tu li tumbura asi ‘Sinyanga soUhompa’?” (Mat. 24:14) Edina olyo lyokuwapera kapi va li geve tupu kosinyanga oso, nye hena komavango nagenye aga ava ruganesa vantu vaJehova mouzuni mudima.

6, 7. Umbangi musinke azi gava ngendeseso zokugenderera kutunga Yinyanga yoUhompa?

⁶ Koyiha yo-1970, kwa kere hepero zoYinyanga yoUhompa yoyinzi. Vanavazinyetu womoAmerika kwa tulisire po  ngendeseso zongwa zokutunga Yinyanga yoUhompa momazuva tupu gomasesu. Apa za sikire 1983, sivaro soYinyanga yangoso moAmerika nomoKanada kwa ka sikire 200. Mokusikisa mo sirugana esi, vanavazinyetu kwa tamekere kutulisa po nokomitiye detungo lyoyinyanga. Ngendeseso ezi kwa gendere po nawa, yipo nye mo-1986 Mbungagendesi za tambwire ngendeseso ozo. Mvhura zokukwama ko pwa kere Nokomitiye dEtungo Yinyanga yoUhompa dokusika po-60 moAmerika. * Mo-1992, Nokomitiye dimwe hena kwa di tulisire po moArgentina nomoAustralia nomoNdovesiranda nomoYapani nomoMeksiko nomoNoroweyi nomoAfrika Mbindakano ntani moSipanye. Twa hepa kukwatesa ko vanavazinyetu ava vana kurugana unene mokutunga Yinyanga yoUhompa neyi yoYigongi, morwa sirugana oso naso kwa pongoka.

⁷ Ngendeseso zokugenderera kutunga Yinyanga kugava umbangi wouwa monomukunda edi vana kutungira. Pasihonena, saitunga zomoSipanye kwa tente asi: “Epuro kudirura nondundu.” Mokupandadeka sirugana setungo soSinyanga soUhompa modoropa zaMartos, saitunga kwa pulire asi: “Mouzuni ou omu vantu ava ligazara tupu vene, ngapi omu ayi mu tompoka mu kare novalizambeli wokutunda konomukunda dokulisiga-siga [moSipanye] va wize moMartos va ya vatere ketungo eli vana tungu kugenderera kupitakana matungo gapeke?” Saitunga kwa limbwilire pokuruganesa  nonkango doMbangi zimwe zovalizambeli, ezi za tente asi: “Ayo kuhoroka morwa ose kuturonga Jehova.”

8. Mo-1999, ngendeseso musinke zompe za pulisilire Mbungagendesi, ntani morwasinke?

⁸ Koyiha yo-1990, vantu wovanzi womoyirongo yoruhepo kwa gogomokera kombunga zaJehova. Nombungakriste domonomukunda kwa rugene ko yuma mokutunga mavango gokupongera. Moyirongo yimwe, awo ngava va zoro nokuvaswaura morwa Yinyanga yawo yoUhompa kapi ya wepe pokuyihetakanesa nonongereka domonomukunda odo. Kutamekera 1999, Mbungagendesi kwa pulisilire ngendeseso zokugenderera kutunga Yinyanga yoUhompa moyirongo yoruhepo. Yigava yomoyirongo yokuzeruka kwa yiruganesa yipo va dike Yinyanga yoyiwa “yokuhetakana” moyirongo nayinye. (Resa 2 Vakolinte 8:13-15.) Vanavazinyetu wokutunda koyirongo yapeke kwa lizambera mokuvatera mosirugana setungo.

9. Sirugana musinke sa monekere ngwendi udigu, nye yitundwamo musinke?

⁹ Pomuhowo, sirugana kwa monekere ngwendi udigu. Erapoto mo-2001 kwa likidire asi sivaro soYinyanga yoUhompa yokupitakana po-18 300 kwa hepere kuyitunga moyirongo yoruhepo yokusika po-88. Nevatero lyompepo zaKarunga ntani naHompa Jesus Kristusa, sirugana kwa rerupa. (Mat. 19:26) Monomvhura 15 da ka pita, kutundilira 1999 dogoro 2013, vantu vaKarunga kwa tunga Yinyanga yoUhompa yokusika po-26 849 moyirongo yoruhepo  mokuruganesa ngendeseso ezi. * Jehova kuna kutwikira kutungika sirugana sokuzuvhisa, ano eyi kutanta asi kutundilira 2013, simpe vana hepa kudika Yinyanga yoUhompa yokusika po-6 500 moyirongo eyi, ano ngesi kuna kulikida asi yokusika pomafere kuna kuyihepa nkenye mvhura.

10-12. Ngapi omu etungo lyoYinyanga yoyipe yoUhompa ali yererepeke edina lyaJehova?

¹⁰ Ngapi omu etungo lyoYinyanga yoyipe yoUhompa ali yererepeke edina lyaJehova? Erapoto lyokutunda koBeteli zomoZimbabwe kwa tanta asi: “Mokwedi kokuhova oku ava ruganesa Sinyanga sosipe, sivaro sava ava wiza komapongo kuligwederera unene.” Moyirongo yoyinzi, kumoneka asi vantu kapi va hara kuyaponga nose nsene kapi tuna kara nevango lyewa lyoukareli. Konyima zokudika Sinyanga sosipe, vantu wovanzi kuyaponga nose ntani kuyahepa hena kudika ko nasopeke. Kapisi emoneko tupu lyoSinyanga, nye eharo eli ava likida Vakriste wousili posiruwo sokutunga kukoka unene vantu va wize kombunga zaJehova. Tu tareni koyihonena yimwe.

¹¹ Indonesia. Mugara gumwe kwa tere omu vana kudika Sinyanga soUhompa, apa ga dimbwilire asi varugani navenye kwa kere wokulizambera, age kwa tente asi: “One vantu wokutetukisa sili! Nina mono omu nkenye gumwe gweni ana kurugana unene noruhafo, nampili ngomu omu dili kugwana mfuto. Kwato hena mbunga zoukareli ngwendi zeni!”

¹² Ukraine. Mukadi ogu nga mono omu vana kutunga Sinyanga ga yi dimbwilire asi varugani kwa kere Nombangi daJehova, ntani etungo eli va tungire, Sinyanga soUhompa. Age kwa tente asi: “Ame kwa zuvha kuhamena Nombangi daJehova kwamumbyange goMbangi. Mokunomena sirugana setungo eli, name yipo na tokwere kukara gumwe goNombangi. Ame kwa limonenene omu ava likida eharo.” Mukadi ogo kwa tambwire elirongo lyoBibeli ntani age kwa gwene ekuho mo-2010.

13, 14. (a) Yisinke ono lirongere ko kovalikwali vamwe ava va nomenene sirugana sokutunga Sinyanga? (b) Yisinke no rugana mokudivilisa asi evango lyoukareli weni kuna kuyererepeka edina lyaJehova?

¹³ Argentina. Valikwali vamwe kwa hederere munazinyetu ogu ga gendesere etungo lyoSinyanga. Mugara ta uyunga asi: “Ose kuna nomene sirugana seni setungo, ntani . . . tuna tokora asi tuna hara kulironga kuhamena Karunga. Yisinke natu rugana yipo nose tu wapere mokuyaponga kumwe none?” Valikwali ava kwa tambwire elirongo lyoBibeli, ntani kwa here asi epata lyawo nalinye li lihameke mo. Vanavazinyetu kwa hefe pokulironga nawo.

¹⁴ Nampo kapi wa gwana mpito zokuvatera mokutunga Sinyanga, nye kuvhura o rugane unene pokuvatera kuwapeka nawa evango lyeni lyoukareli mokuyererepeka edina lyaJehova. Pasihonena, kuvhura o zigide varongwa woge woBibeli navamwe hena womomukunda va wize komapongo moSinyanga seni soUhompa. Ntani kuvhura o vatere mokuzeresa  nokuwapukurura evango lyeni lyoukareli. Nsene o pungura ko yimaliwa, ove ngo vhura kugava yigava mokupakera mbili Sinyanga esi o pongere ndi yigava yokutunga Yinyanga yoUhompa mouzuni mudima. (Resa 1 Vakolinte 16:2.) Yirugana nayinye oyo, kuyererepeka edina lyaJehova.

15-17. (a) Wolye ava rugana unene mosirugana setungo? (b) Yisinke ono lirongere ko kweyi va uyunga ko valikwali ava va kara mosirugana sokutunga mouzuni mudima?

¹⁵ Yirugana nayinye yetungo Yinyanga yoUhompa neyi yoYigongi ntani noNobeteli kuyirugana vanavazinyetu womomukunda. Poyiruwo yimwe awo kuvakwatesa ko vanavazinyetu wokoyirongo nayopeke ava va kara noudivi wokutunga. Vanavazinyetu vamwe owo kugusa lifa yipo va ya kwatese ko sirugana setungo yivike yongandi. Vamwe kwa ligava vene mokurugana sirugana setungo nomvhura dononzi, makura kurugana tunda etungo zende etungo.

¹⁶ Sirugana sokutunga Yinyanga mouzuni mudima kwa kara nomaudigu gaso, nye kureta hena matungiko. Pasihonena, Timo naLina, ava va likwara nomvhura 25, kwa tunga Yinyanga yoUhompa neyi yoYigongi ntani noNobeteli moAsia nomoEuropa ntani moAmerika Mbindakano. Timo kwa tanta asi: “Monomvhura nadinye edi 30, yitumbukira yange kwa yi rundurura nkenye mvhura zauvali.” Lina kwa tanta asi: “Ame kwa rugana kumwe naTimo moyirongo yokulisiga-siga yokusika pomurongo. Ayo kugusa siruwo nononkondo mokuyika nondya donompe neraka lyepe nonkarapamwe zompe nomukunda gomupe gokuzuvhisira ntani nokutulisa po vakaume wovape.” * Matungiko musinke va gwana? Lina kwa tanta asi: “Nampili ngomu ngatu ligwanekere nomaudigu, ose kwa ya limonena matungiko gomanzi. Twa  limonena eharo eli ngava tu likida vanavazinyetu ntani nepakerombili lyaJehova. Ntani twa limonena hena esikiliromo lyetumbwidiro lyaJesus eli ga geve kovarongwa vendi, lya kara mwaMarukusa 10:29, 30. Ose kwa tu rugwida kuwoko rwefere mokugwana vamumbya novakuru ntani vazinya wopampepo.” Timo kwa tanta asi: “Ayo kuturetera ruhafo rorunene pokuruganesa udivi wetu koyitambo yomulyo, mokukwatesa ko eligwederero lyemona lyaHompa.”

¹⁷ Darren naSarah, ava va vatera mosirugana setungo moAfrika, Asia, Central America, Europa, Amerika Mbindakano, ntani koMbindakano zefuta lyaPacific, kwa tanta asi awo kwa gwana yoyinzi kupitakana eyi va gava. Nampili ngomu va ligwanekera nomaudigu, Darren kwa tanta asi: “Ose kwa hafera kurugana kumwe novanavazinyetu womoyirongo yokulisiga-siga mouzuni mudima. Ame kwa limonena uumwe ou wa kara mokatji kovantu vaJehova morwa eharo lyawo lyokumuhara. Sarah kwa tanta asi: “Ame kwa lirongera ko yoyinzi kovanavazinyetu wokutundilira konompo dokulisiga-siga! Mokumona elizambero eli va tulisa po mokukarera Jehova ayo kutumangeda nge ni twikire kugava paapa na hulira.”

18. Ngapi una kusika mo uporofete ou va tjanga mEpisarome 110:1-3?

¹⁸ Hompa Ndafita kwa pumbire asi nampili ngomu vakwatesiko woUhompa ngava ligwanekera nomaudigu, awo “ngava ligava” vene mokukwatesa ko sirugana soUhompa. (Resa Episarome 110:1-3.) Navenye ava vana kulihameka mo mosirugana esi mokukwatesa ko Uhompa kuna kusikisa mo nonkango douporofete ou. (1 Kol. 3:9) Sivaro somatungo goNobeteli nomafere goYinyanga yoYigongi ntani mayovi nomayovi goYinyanga yoUhompa mouzuni mudima kugava umbangi asi Uhompa waKarunga yipo wa kara ntani awo kuna kupangera ngesi. Aso situmbukira sosinene mokuruganena Hompa Jesus Kristusa mosirugana esi asi retere Jehova eyererepeko eli lya mu fira!