1-3. Yisinke ga rugene Jesus apa ga ka gwene ntembeli zina nyata?

JESUS kwa fumadekere unene ntembeli zomoJerusarema morwa ga divire eyi za karerere po. Azo kwa kere evango lyoukareli wousili pevhu. Nye evango olyo lya hepere kukara lina kuhuka. Gazareni tupu omu Jesus ga lizuvhire apa ga zire kontembeli momvhura 33 moNisani 10 nokukazigwana zina nyata. Yisinke ya horokere?—Resa Mateusa 21:12, 13.

² Meharango lyontembeli, varandesi novasinti yimaliwa ngava fukire vakareli ava ngava reta nonzambo kwaJehova. * Jesus makura ‘ta tjida mo varandi novarandesi navenye montembeli. Yitafura yovasinti woyimaliwa noyipundi yovarandesi ta yi gandanga.’ (Hetakanesa Nehemiya 13:7-9.) Age kwa nyokerere vagara vena va ninkire nzugo zoGuhwe zi kare “sipwapwa sovamahaka.” Jesus kwa likidire efumadeko kontembeli neyi za karerere po. Ukareli woGuhwe wa hepere kukara una kuhuka.

³ Konyima zonomvhura dononzi, apa va mu tumbire ngaHompa goUmesiyasa, Jesus ga ya kuhwire hena ntembeli ezi za karera po navenye owo vana hara kukarera Jehova monkedi ezi a tambura. Ntembeli musinke ga ya kuhwire?

4, 5. (a) Ngapi vasikuli vaJesus wovagwavekwa va va kuhwire kutundilira 1914 dogoro ketamekero lyo-1919? (b) Yipo lya hagerere ekuhuro lyovantu vaKarunga ndi? Faturura.

⁴ MEgaununo 2 mobuke ezi, kwa likida asi konyima apa va mu tumbire ngaHompa mo-1914, Jesus noGuhwe kwa wizire va ya konakone ntembeli zopampepo. * Apa va ya rugene ekonakono, Jesus ga ya mwene asi Vakriste wovagwavekwa ndi “vapristeli,” va hepere ekuhuro. (Mara. 3:1-3) Kutundilira mo-1914 dogoro ketamekero lyo-1919, ‘Muzeresi,’ Jehova, kwa pulisilire vantu vendi va pite momahepeko nomaudigu gokulisiga-siga aga ga va kuhwire. Vagwavekwa owo va pitire mo mekuhuro nokukara vana wapere ntani va kere neharo lyokukwatesa ko Hompa goUmesiyasa.

 ⁵ Yipo lya hagerere ekuhuro lyovantu vaKarunga ndi? Hawe. Momazuva gopouhura, Jehova, kupitira mwaHompa goUmesiyasa, kwa twikira kuvatera vasikuli vendi va kare vana kuhuka yipo va kare montembeli zendi zopampepo. Momagaununo gavali gana kukwama ko, ngatu ka lironga omu ga wapukwilire nkareso nongendeseso zombunga zendi. Pomuhowo, tu zogereni omu ga wapukwilire mapuliro gawo. Ayo kunkondopeka epuro mokumona eyi ga rugana Jesus mokuwapukurura mapuliro govasikuli vendi.

6. Ngapi mpangera zaJehova koVajuda nazi tu vatera tu kwate egano nonkango “likuhureni nyaamweni”?

⁶ Yisinke da tamba nonkango “likuhureni nyaamweni”? Mokugwana elimbururo, tu konakoneni nonkango edi Jehova ga tanterere Vajuda ava va tundire mounkwate moBabironi. (Resa Jesaya 52:11.) Awo kwa tengwire koJerusarema nositambo sokukatungurura ntembeli nokukatengwidira po ukareli wousili. (Esir. 1:2-4) Jehova kwa here vantu vendi va sige nayinye ya likwatakana noukareli waBabironi. Age kwa va pangerere asi: “Mwa ha guma kweyi yokunyata; likuhureni nyaamweni mu tunde mo.” Jehova kapi ga hara ukareli wendi wokukuhuka va u nyateke noukareli woyimpempa. Kulikuhura nyamwetu kwa kwatera mo kunyokera po mapuliro nonompo doukareli woyimpempa.

7. Yilye ga tulire po Jesus mokuvatera vasikuli vendi va wapukurure mapuliro gawo?

⁷ Mo-1919, Hompa Jesus kwa tulire po mukareli gokulimburukwa gonondunge a vatere vasikuli vendi va wapukurure mapuliro gawo. (Mat. 24:45) Momvhura ozo, Valirongi woBibeli awo nare va sigire mapuliro gomanzi goukareli woyimpempa. Nye va hepere simpe kuwapukurura mapuliro gawo gamwe. Kupitira momukareli gokulimburukwa, Kristusa kwa vaterere vasikuli vendi va dimburure nompo nomapuliro gamwe aga va hepere kunyokera po. (Yis. 4:18) Tu konakoneni yihonena yimwe oyo.

8. Yisinke va dimbwilire nare Valirongi woBibeli kuhamena Krismesa, nye hepero musinke va dilire kudimburura?

⁸ Valirongi woBibeli nare va dimbwilire asi Krismesa kwa tundilira kovapagani ntani Jesus kapi va mu hampurukire mo-25 Sindimba. MwaSindimba 1881, Ruhungu kwa tente asi: “Mamiliyona govantu govapagani kwa ga reta mongereka. . . . vapristeli wovapagani kwa va tumbwire asi vapristeli woVakriste ano yipito yovapagani tava ya yi tumbura asi yipito yoVakriste, Krismesa kuna kara simwe soyo yipito.” Momvhura 1883, sirongwa: “Siruwoke va hampuruka Jesus?” esi sa pwege moRuhungu kwa uyungire asi Jesus kwa mu hampurukire ketamekero lyaSikukutu. * Nye  Valirongi woBibeli simpe kapi va dimbwilire hepero zokuhageka kudana Krismesa. Azo kwa twikilire kuzidana nampili Vabeteli womoBrooklyn. Konyima zo-1926, tapa horoka marunduruko. Morwasinke?

9. Yisinke va ya nongwenene Valirongi woBibeli kuhamena Krismesa?

⁹ Apa Valirongi woBibeli va konakonene hena ntundiliro zoKrismesa va ya nongwenene asi sipito oso kuswaura Karunga. Sirongwa “Ntundiliro zoKrismesa,” mosifo The Golden Age, 14 Sindimba 1927 kwa fatwilire asi Krismesa kuna kara sipito sovapagani, esi sa demenene kokulihafesa ntani kwa hamenene mo ukareli womafano. Sifo sa fatwilire nawa-nawa asi Kristusa kapisi yige ga totere po sipito oso, ntani sifo kwa hulisire nononkango edi asi: “Mokumona asi uzuni noMuzonaguli kwa hara sipito oso . . . navenye ava va ligava nomutjima nagunye kwaJehova va hepa kunyokera po kudana sipito oso.” Kutunda opo Vabeteli yipo va hagekere kudana Krismesa.

10. (a) Mafatururo musinke gamwe va gwene mo-1928 aga ga tulire poruzera sipito soKrismesa? (Tara hena kakende “ Ntundiliro zoKrismesa nositambo sazo.”) (b) Ngapi vantu vaKarunga va va pukwilire kuhamena yipito eyi va hepere kunyokera po? (Tara kakende “ Kutura poruzera yipito yimwe.”)

¹⁰ Mvhura za kweme ko, Valirongi woBibeli kwa gwene hena mafatururo gamwe aga ga tulire poruzera sipito soKrismesa. Mo-12 Sindimba 1928, Munazinyetu Richard H. Barber, gumwe nga rugana koBeteli, kwa geve siuyungwa koradio esi sa tulire poruzera ntundiliro zosipito oso. Ngapi vantu vaKarunga va tere mavyukiso gokutunda koBeteli? Munazinyetu Charles Brandlein ta diworoka apa nage nepata lyendi va hagekere kudana Krismesa, age kwa tente  asi: “Kapi ya tu digoperere kuhageka kudana sipito oso . . . Ayo kwa fene ngwendi kuna kuhutura sikoverero sokunyata nokusizuguma.” Munazinyetu Henry A. Cantwell, ogu ga ya kere mutareli gonombungakriste, kwa tente asi: “Ayo ya tu hafesere kusiga yininke oyo mokulikida eharo lyetu kwaJehova.” Vasikuli vaKristusa wovalimburukwi va tulire po marunduruko ntani kapi va lihamekere mo hena mosipito sokutunda koukareli wokunyata. *—Joh. 15:19; 17:14.

11. Ngapi natu kwatesa ko Hompa goUmesiyasa?

¹¹ Valirongi woBibeli kwa tu tulira po sihonena sosiwa. Pokugazadara ko kosihonena sawo, twa hepa kulipura asi: ‘Ngapi omu ani tara mavyukiso gokutunda komukareli gokulimburukwa? Ame kugatambura nomutjima nagunye nokugatura pasirugana ndi?’ Eharo lyetu lyokulimburukwa kulikida asi twa kwatesa ko Hompa goUmesiyasa, ogu ana kuruganesa mukareli gokulimburukwa a gave nondya dopampepo posiruwo sado.—Yirug. 16:4, 5.

12. Monomvhura dononzi, ngapi Valirongi woBibeli va tere sikuruse?

¹² Monomvhura dononzi, Valirongi woBibeli kwa tere sikuruse asi sidimbwiliso soUkriste. Kapi ngava karere sikuruse morwa va kwete egano asi epuko kukarera mafano. (1 Kol. 10:14; 1 Joh. 5:21) Mo-1883, Ruhungu kwa vyukilire kuuyunga asi: “Karunga kwa nyenga kukarera mafano.”  Nye simpe Valirongi woBibeli kapi va dimbwilire asi epuko kuruganesa sikuruse. Pasihonena, awo ngava dwara mbandi zokufaneka sikuruse nonkata zosiuhompa. Mbandi ozo kwa va diworokesere asi nsene va limburukwa dogoro konomfa, ngava ka gwana nkata zomwenyo. Kutamekera mo-1891, sidiviso sosikuruse nonkata zosiuhompa ngasi moneka kontunda zosifo soRuhungu.

13. Efatururo musinke va gwene vasikuli vaKristusa kuhamena sikuruse? (Tara hena kakende “ Efatururo kuhamena sikuruse.”)

¹³ Valirongi woBibeli kwa here unene sidiviso sosikuruse nonkata zosiuhompa. Nye, momvhura 1928, vasikuli vaKristusa va ya kwete egano asi epuko kuruganesa sikuruse. Munazinyetu Grant Suiter, ogu ga ya kere gomoMbungagendesi, kwa simwitilire eyi ya horokere posigongi momvhura ozo esi sa kere moDetroit, Michigan, moAmerika asi: “Posigongi, sidiviso sosikuruse nonkata zosiuhompa kwa yi fatwilire asi epuko kuyiruganesa.” Nomvhura da ya kweme ko, pwa ya kere hena mafatururo gamwe. Ayo ya zerere asi epuko kuruganesa sikuruse moukareli wokukuhuka.

14. Ngapi vantu vaKarunga va tere mavyukiso aga va gwene kuhamena sikuruse?

¹⁴ Ngapi vantu vaKarunga va tere mavyukiso aga va gwene kuhamena sikuruse? Awo va twikilire kuruganesa sidiviso sosikuruse nonkata zosiuhompa, yininke eyi va here unene ndi? Lela Roberts, ogu ga karera Jehova nomvhura dononzi, kwa tente asi: “Ose twa hagekere kuyiruganesa apa twa ya dimbwilire eyi ya karera po.” Munazinyetukadi gumwe gomulimburukwi, Ursula Serenco, nage kwa pwagesere malizuvho gendi asi: “Twa ya yi nongwenene asi eyi twa gazarere asi kwa fanekesere nomfa daHompa gwetu ntani neligawo lyetu ngoVakriste ayo kwa kere youpagani. Kuliza noYisewe 4:18, ose twa hefe asi nzira zetu kwa zerere unene.” Vasikuli vaKristusa wovalimburukwi kapi va here kuhama kwankenye yininke yokunyata youkareli woyimpempa.

15, 16. Ngapi natu yi likida asi tuna tokomene mokudira kunyateka eharango lyepevhu lyontembeli zaJehova?

¹⁵ Nose tuna kara netokomeno lyokulifana. Ose twa yi diva asi Kristusa kuna kuruganesa mukareli gokulimburukwa gonondunge a vatere vantu vendi va nyokere po mapuliro goyimpempa. Apa atu gwana nondya dopampepo edi adi tu rondora kuhamena yipito nonompo domoukareli woyimpempa, ose kulimburukwa usimbu marondoro ogo. Ngwendi vanavazinyetu ava va parukire ketamekero lyekaropo lyaKristusa, nose tuna tokomene mokudira kunyateka eharango lyepevhu lyontembeli zaJehova.

¹⁶ Momazuva aga gopouhura, Kristusa kwa popera nombungakriste daJehova kovantu ava nava vhura kunyateka mapuliro gawo. Ngapi ga yi rugana? Tu ka yi konakoneni.

17, 18. Mosifanekeso sekwe, yisinke ayi tanta (a) kutega ekwe, (b) ‘kukwata nkenye rudi ronomfi,’ (c) kuhogwera “nomfi donongwa moyipako, ntani (d) kuzugumina kwina nomfi donondona?

¹⁷ Hompa Jesus Kristusa kuna kutwikira kutakamesa nombungakriste dovantu vaKarunga uzuni mudima. Mononkedi edi atu dili kumona, Kristusa novaengeli kuna kuhangura vantu. Jesus kwa singwenene sirugana esi mosifanekeso sekwe. (Resa Mateusa 13:47-50.) Yisinke asi tanta sifanekeso oso?

¹⁸ Kutega ‘ekwe mediva.’ Ekwe kwa fanekesa sirugana sokuzuvhisa Uhompa esi vana kurugana mouzuni mudima. ‘Kukwata nkenye rudi ronomfi.’ Mbudi zongwa kukoka vantu wokulisiga-siga, vamwe kutura po marunduruko va ya kare Vakriste, ano vamwe kulikida elituromo nye kapi ava tura po marunduruko va kwatese ko ukareli wousili. * Kuhogwera “nomfi donongwa moyipako.” Vantu wovawa kuna kuvapongaikira moyipako ndi monombungakriste omu nava vhura kukarera Jehova monaruwa. Kuzugumina kwina nomfi “donondona.” Momazuva gopouhura, Kristusa novaengeli kuna kuhangura “wovadona kovahungami.” * Ngoyitundwamo, owo vana kudira kusiga marongo nononkareso depuko kapi vana kuvapulisira va nyateke nombungakriste. *

19. Ngapi ono kulizuvha kuhamena eyi ana kurugana Kristusa mokugamena ukareli wousili nokuvatera vantu vaKarunga va nyokere po mapuliro goyimpempa?

¹⁹ Ayo kutuhengagwida pokudiva asi Hompa gwetu Jesus Kristusa kuna kupopera vantu vendi. Ntani ayo kutuhengagwida pokudiva hena asi age simpe ana kara nomupampi koukareli wousili ngwendi moomu ga kere nawo apa ga zeresere ntembeli apa ga kere pevhu. Ayo kutuhafesa asi Kristusa kuna kugamena ukareli wousili nokuvatera vantu vaKarunga va nyokere po mapuliro goyimpempa. Ose kukwatesa ko Hompa noUhompa wendi pokunyokera po nkenye eyi ya likwatakana noukareli woyimpempa.