1. Yisinke ga mwene Hesekiyeli eyi nayi tu ninkisa tu lizuvhe ruhafo?

GAZARA asi ove kuna kumona emoneko eli ga mwene muporofete Hesekiyeli. Memoneko, to hedere ntembeli zokupaima. Muengeli ta ku likida evango olyo lyewa! To rondo yirondero ntambali eyi nayi ku twara komarungavero gatatu. To lizuvhu ruhafo pokugamona. Ago ure wago kusika nometa 30. Momarungavero, to mono nonzugo denomeneno. Mekuma kwa tjokwera mo nomurunga.—Hes. 40:1-4, 10, 14, 16, 22; 41:20.

2. (a) Yisinke azi fanekesa ntembeli zopampepo? (Tara hena nondanda dokonhi.) (b) Yisinke aga fanekesa maruha gontembeli?

² Eli kuna kara emoneko lyontembeli zopampepo. Hesekiyeli kwa zi singonona mouporofete wendi ou wa kara megaununo 40 dogoro 48 mobuke zendi. Ntembeli ezi kufanekesa mawapaiko goukareli wousili waJehova. Nkenye ruha rwa kara nontanto moukareli wetu momazuva aga gopouhura. * Yisinke marungavero aga fanekesa? Ago kutudiworokesa asi ava ava karere Jehova moukareli wendi wousili va hepa kuparuka kuliza nonompango dendi. Nomurunga nado kutanta yuma, mosiruwo soBibeli ado kwa fanekesere uhungami. (Epis. 92:12) Ano nonzugo denomeneno yisinke adi fanekesa? Owo ava dili kufumadeka nompango daKarunga kapi ava va pulisire va hwilire moukareli wousili.—Hes. 44:9.

3. Morwasinke vasikuli vaKristusa va hepere kuvakuhura?

³ Ngapi omu emoneko lyaHesekiyeli lya sika mo? Ngomu va didilika mEgaununo 2 lyobuke ezi, Jehova kwa ruganesa Kristusa mokukuhura vantu vendi kutundilira 1914 dogoro ketamekero 1919. Ekuhuro lina kwa hagerere poopena ndi? Hawe! Monomvhura 100 da ka pita, Kristusa kwa twikira mokuvatera vakareli vaJehova va paruke kuliza nonompango dendi. Vasikuli vendi va hepere kuvakuhura. Morwasinke? Morwa Kristusa kwa pongaika vasikuli vendi mouzuni wokunyata ntani Satana kuna kukondja kuvatengwidira koukaro  wokunyata. (Resa 2 Peturusa 2:20-22.) Tu konakoneni nonkedi ntatu omu Kristusa ga twikira kukuhura vasikuli vendi. Zokuhova, tatu ka konakona omu ga va kuhura konomukaro dokunyata, nomu ga kuhura mbungakriste ntani ngendeseso zomapata.

4, 5. Siraha musinke ga ruganesa Satana, ntani noyitundwamo musinke?

⁴ Morwa eharo lyawo lyokukwaterera konompango daJehova, vantu vendi kutambura nkenye apa mavyukiso gendi. Tu konakoneni yihonena yimwe.

⁵ Ruhonda. Jehova kwa wapaikira eligwanekero panyama yipo va li hafere valikwali monkedi zongwa zokukuhuka. Satana kuzeda vantu va ruganese uhwi owo monkedi zondona yipo Karunga a dire kuvahafera. Satana kwa mu tompokere kuruganesa siraha esi mosiruwo saBaramu, ntani kuna kusiruganesa unene momazuva aga gopouhura.—Num. 25:1-3, 9; Ehor. 2:14.

6. Mugano musinke va pwagesere moRuhungu, ngapi omu va gu ruganesere, ntani morwasinke va ya gu hagekesere po? (Tara hena nondanda dokonhi.)

⁶ Mokunyokera po siraha esi saSatana, Ruhungu 15 Pembagona 1908, kwa pwagesere mo mugano ogu asi: “Ame ngani tekura nkenye mukadi ndi mugara monkedi zefumadeko yi kare asi nyoselike tuna kara ndi moyitarameho.” * Nampili ngomu za dilire kukara veta, wovanzi kwa kwatesere ko mugano ogo nokugava madina gawo va ga pwagese moRuhungu. Mwaza nomvhura, mugano ogu kwa ya gu hagekesere po, morwa vantu ngava gana tupu mawoko-woko. Nye simpe va fumadekere mpango zaKarunga kuhamena eligwanekero panyama.

7. Mo-1935, moRuhungu udigu musinke va pwagesere mo, ntani yisinke rwa tente Ruhungu?

⁷ Mahomokero gaSatana kwa didire. Ruhungu 1 Nsinano 1935, kwa pwagesere udigu ou wa kere mombunga zaKarunga. Vamwe kwa gazarere asi nsene to lihameke unene moyirugana yokuzuvhisa kapi ya kara epuko kuhondera. Ruhungu kwa tente asi: “Kulihameka mokuzuvhisa kapisi yiyo yelike ya hepa po. Nombangi daJehova kwa mu karera po noUhompa wendi, yipo nye va hepa kukara nonkareso zongwa.” Sirongwa kwa geve mapukururo kuhamena nonkwara ntani eligwanekero panyama mokuvatera vantu vaKarunga va ‘nyokere po ruhonda.’—1 Kol. 6:18.

8. Morwasinke Ruhungu rwa nkondopeka etanto lyonkango ruhonda?

⁸ Mosiruwo setu, Ruhungu kwa nkondopeka etanto lyonkango ruhonda ezi va toroka konkango zoRugereka asi porneya. Ruhonda kapi tupu rwa tamba keligwanekero panyama. Nye kwa kwatera mo yirugana yoyinzi yokunyata, ngwendi eyi ava rugana yikumbu. Sinzi sovantu  mouzuni kwa gwira monkareso ozo zokunyata, nye vasikuli vaKristusa kwa va popera.—Resa Vaefeso 4:17-19.

9, 10. (a) Yisinke rwa uyungire Ruhungu mo-1935? (b) Yisinke azi rongo Bibeli kuhamena kunwa marovhu?

⁹ Unkorwe. Ruhungu 1 Nsinano 1935, kwa tente asi: “Ayo kwa yi nongonona asi vamwe kulihameka moyirugana yokuzuvhisa nomoyitumbukira yomombungakriste awo vana nu marovhu. Moukaro musinke Matjangwa ga pulisira kunwa marovhu? Ngapi nsene muntu a dira kusikisa mo yirugana yomombunga morwa kunwa marovhu?”

¹⁰ Ruhungu kwa geve malimburururo komapuro ogo gomoNonkango daKarunga. Bibeli kapi za silika kunwa marovhu ndi vhinyu nye kwa silika unkorwe. (Epis. 104:14, 15; 1 Kol. 6:9, 10) Kombinga zokurugana yirugana yaKarunga ove ono nu marovhu, vakareli vaKarunga kwa va diworokesa sihorokwa sovana vaArona ava ga dipagere Karunga morwa kuzamba mundiro gokudira kupongoka. Bibeli za horora eyi ya ninkisire vagara owo va zambe nzambo zepuko, veta zaKarunga kwa silikire vapristeli asi va ha nwa vhinyu nsene kuna kurugana yirugana yawo yokupongoka. (Lev. 10:1, 2, 8-11) Pokukwama mpango ozo, vasikuli vaKristusa kapi ava lihameke moyirugana yokupongoka awo vana nu marovhu.

11. Mauwa musinke va gwana vantu vaKarunga morwa kukwata egano eruganeso lyomarovhu?

¹¹ Vakriste vamwe kwa kere moupika wokunwa marovhu nkenye ezuva, nye va gwana evatero kupitira moyimbapiratjangwa yetu. Vamwe va lironga kulipangera, ano vamwe va hageka kunwa marovhu. Ano sinzi setu kapi twa gwira monkareso ozo morwa twa gwana mapukururo gomawa gomombunga zaJehova. Kapisi hepero o pulisire marovhu ga ku guse mfumwa ndi ga zonagwise epata lyoge ntani unene po situmbukira sokukarera Jehova.

12. Ngapi vasikuli vaKristusa va tere kukoka makanya nampili komeho zomazuva gopouhura?

¹² Makanya. Vasikuli vaKristusa kwa tamekere kunyokesa kukoka makanya nampili komeho zomazuva gopouhura. Nomvhura da ka pita, munazinyetugara gokukurupa Charles Capen, ta diworoka sikando sendi sokuhova ga ligwanekerere naCharles Taze Russell. Capen age opo nomvhura dendi 13 kwa zire namukurwendi novamumbya vendi vavali koNzugo zaKarunga moAllegheny, moPennsylvania. Apa ga ya pitire Russell ta va pura asi: “One vamati kuna koko ndi? Kuna kufumbwira musi gomakanya.” Awo tava mu tantere asi kapi vana koko. Eyi ya va ninkisire va kwate egano omu munazinyetu Russell ga tere makanya. MoRuhungu 1 Siwogedi 1895,  munazinyetu Russell kwa uyungire kuhamena 2 Vakolinte 7:1 pokutanta asi: “Ayo kapi ayi yererepeka Karunga koMukriste mokuruganesa makanya mwankenye nkedi. . . . Kapi tatu vhuru kundindira tu mone Hompa kuna kukoka ndi kuna kututumuka musi mokana kendi.”

13. Ngapi omu ga kuhwire Kristusa vasikuli vendi mo-1973?

¹³ Mo-1935 Ruhungu kwa tumbwire makanya asi “simeno sokunyata” ntani kwa tente hena asi nkenye ogu na koka ndi na takina makanya kapi ta kara gumwe gepata lyoBeteli ndi muzuvhisi gokukarerera ndi mutareli gonombungakriste. Mo-1973 Ruhungu 1 Pembagona kwa fatwilire asi nsene Mbangi zaJehova kukoka makanya nokuvhura si kukara gumwe gomombungakriste. Ava va nyokere kuhageka kuruganesa makanya kwa va gusire mo mombunga. * Monkedi zangoso, Kristusa kwa kuhwire hena vasikuli vendi.

14. Yisinke mpango zaKarunga kuhamena honde, ntani ngapi etamburo honde lya ya lihanenene mouzuni mudima?

¹⁴ Kutambura honde. Momazuva gaNowa, Karunga kwa uyungire asi epuko kulya honde. Age kwa yi nkondopekere moVeta ezi ga geve komuhoko goVaisraeli ntani hena koVakriste apa ga va pangerere asi: ‘Walye omu li honde.’ (Yirug. 15:20, 29; Gen. 9:4; Lev. 7:26) Mosiruwo setu, Satana kwa ninkisa wovanzi va teze po mpangera ozo zaKarunga. Nomvhura 200 da ka pita vandokotora ngava hetekere ko kutura vantu honde, ano konyima yipo va ya kere noudivi kuhamena honde. Mo-1937 tava tameke kugusa honde nokuzipungura, ano poyita yauvali youzuni etamburo honde yipo lya ligwederere. Konyima, etamburo honde kwa ya lihanenene mouzuni mudima.

15, 16. (a) Ngapi Nombangi daJehova da ya tere etamburo honde? (b) Evatero musinke va gwene vasikuli vaKristusa kuhamena etamburo honde, ntani noyitundwamo musinke?

¹⁵ Mo-1944, Ruhungu kwa fatwilire asi etamburo honde kwa fana ngwendi kuna kulya honde. Mvhura za kweme ko, efatururo olyo lyoPatjangwa kwa ya li nkondopekere. Mo-1951, mapuro nomalimbururo kwa ga pwagesere mokuvatera vantu vaKarunga va fatwilire vandokotora. Uzuni mudima vasikuli vaKristusa wovalimburukwi kwa nyokere kutambura honde nampili ngomu ngava va swaura nokuvahepeka. Nye Kristusa kwa twikira kuvatera mbunga zendi. Mauzera gomanzi kwa ga pwagesere moyimbiratjangwa.

¹⁶ Momvhura 1979 vakuronambunga vamwe kwa tamekere kudingura yipangero nokuvatera vandokotora wovanzi va kwate egano mutaro gwetu goPatjangwa gohonde ntani nokuvalikida omu nava vhura kuhakura pwa hana honde. Mo-1980, vakuronambunga womoyitata  39 womoAmerika kwa gwene edeuro lyokudingura vandokotora. Mwaza siruwo, Mbungagendesi za geve epulisiro lyokutulisa po Nokomitiye doUhaku uzuni mudima. Yitundwamo musinke ya kara? Naina, mayovi govandokotora kuna kuruganena kumwe novaveli woNombangi pokufumadeka etokoro lyetu lyokudira kutambura honde. Yipangero yoyinzi kuhakura pwa hana honde ano va yi dimburura asi yiwo uhaku wouwa po. Ayo kuhafesa pokumona eyi ga rugana Jesus mokupopera vasikuli vendi kwaSatana, ogu ana kuhara kuvanyateka.—Resa Vaefeso 5:25-27.

17. Ngapi natu likida asi twa hafera nkedi omu Jesus ga kuhura vasikuli vendi?

¹⁷ Ya wapa tu lipure asi: ‘Ose kuhafera nkedi omu Jesus ga kuhura vasikuli vendi nokuturonga tu kwaterere konompango daJehova ndi?’ Nsene yimo, twa hepa kudiworoka asi Satana kuna hara a tu guse ko kwaJehova naJesus pokutuninka tu dire kufumadeka nompango daKarunga. Mokurwanesa po epukiso olyo, mbunga zaJehova kuna kuturondora u dire kutunyateka uzuni  ou. Tu kareni tuna vangarara nokutambura nokulimburukwa mapukururo gaJehova.—Yis. 19:20.

18. Emoneko lyaHesekiyeli, yisinke ali tu rongo kuhamena owo ava rwanesa mowina nompango daKarunga?

¹⁸ Nkedi zauvali omu Kristusa ga kuhwire vasikuli vendi kuna kara kukuhura mbungakriste. Kapisi navenye ava sikisa mo etokoro lyawo lyokutambura nompango daKarunga neligawo lyawo. Vamwe konyima kuyarwanesa nompango odo nokuyazonena mowina. Kuvarugana ngapi vantu vangoso? Elimbururo kuligwana memoneko lyaHesekiyeli lyontembeli zopampepo eli tuna tumbura ketamekero. Diworokeni asi mwankenye erungavero kwa kere mo nonzugo denomeneno. Vanomeni ngava popere ntembeli mokukondera owo ngava “dili kulimburukwa” asi va ha hwilira mo. (Hes 44:9) Eyi kulikida asi mokukara moukareli wousili ntudi woowo tupu ava kondjo mokuparuka kuliza nonompango daJehova. Mokulifana nanaina, kapisi nkenye muntu ava pulisire a kare gomombungakriste.

19, 20. (a) Ngapi omu Kristusa ga vatera vasikuli vendi va wapukurure ngendeseso zokupangura maudigu? (b) Nokonda musinke ntatu deyi ava gusire mo mombunga wokudira kulitezurura?

¹⁹ Mo-1892, Ruhungu kwa tente asi: “Aso situmbukira setu sokugusa mo mombunga owo ava yi likida monkareso zawo asi kapi ava kwatesa ko sizoweseso saKristusa.” (Resa 2 Johanesa 10.) Mo-1904, buke The New Creation kwa fatwilire asi owo ava twikire nonkareso zondona kunyatekesa mbungakriste. Posiruwo sina, mbungakriste nazinye ngazi lihameke mokupangura owo vana tura nzo zonene. Nye kapi ngayi horauka nkenye apa. Mo-1944, Ruhungu kwa fatwilire asi vanavazinyetugara ava va kara noyitumbukira yiwo wokuvhura kupangura maudigu. Mo-1952, ngendeseso zomoBibeli zokupangura maudigu kwa ya zi pwagesere moRuhungu nokudidilika konda zeyi ava gusire mo wokudira kulitezurura asi mokukuhura mbungakriste.

²⁰ Kutunda pena, Kristusa kwa vatera vasikuli vendi va wapukurure ngendeseso zokupangura maudigu. Vakuronambunga kuvadeura yipo va pangura kuliza nompango zaJehova monkedi zongwa zonkenda. Naina twa kwata egano nokonda ntatu deyi ava gusire mo mombunga wokudira kulitezurura: (1) mokuzeresa edina lyaJehova, (2) mokupopera mbungakriste konkareso zondona (3) mokutumangeda ogu ana zono a litezurure.

21. Ngapi omu egusomo mombunga lya retera mauwa vantu vaKarunga?

²¹ Wa dimburura omu egusomo mombunga ali retere mauwa vasikuli vaKristusa ndi? Mosiruwo soVaisraeli,  varwanesi womombunga pamwe ngava pukisa konyara vantu navenye vaJehova. Makura muhoko ngagu retere eswau edina lyaJehova, moruhura ta ya va nyoka. (Jer. 7:23-28) Naina, Jehova kapi ana kuruganena nomuhoko goVaisraeli, nye ana kara nombungakriste. Morwa vantu wokuzonena mowina kuvagusa mo mombungakriste, Satana kapi a vhuru kuvaruganesa va nyateke mbungakriste. Kapi ava vhuru kupukisa navenye womombungakriste. Ngombunga, Jehova kutwikira kutuhafera. Jehova ga tumbwidira asi: “Nosirwiso si simwe esi ngasi ku rwadeka.” (Jes. 54:17) Ose kukwatesa ko vakuronambunga owo va kara nositumbukira sokupangura maudigu gomombunga ndi?

22, 23. Morwasinke natu pandadekera vanavazinyetu vanare, ntani yinke ayi likida asi va hepere kutura po marunduruko kuhamena mapata gawo?

²² Nkedi zautatu omu Kristusa ga kuhwire vasikuli vendi kuna kara kombinga zononkwara nepata. Mutaro gwetu gwepata va gu wapukurura mwaza nomvhura ndi? Nhi. Pasihonena, nomvhura 100 da ka pita, vakareli vaKarunga kwa kere nomupampi mosirugana sokuzuvhisa. Ose kuvapandadeka koupampi wawo wokutura sirugana sokupongoka muhowo meparu lyawo. Nye va hepere kutura po marunduroko gongandi. Monkedi musinke?

²³ Vanavazinyetugara ngava sigi mapata gawo makwedi nomakwedi yipo va ka zuvhise ndi va ka dingure nombungakriste. Vanavazinyetu ngava va korangeda va dire kukwara, ntani kapi pwa kere makorangedo gomanzi omu Vakriste nava pameka nonkwara. Yizo simpe nkareso zina kara movasikuli vaKristusa naina ndi? Hawe!

24. Yinke ga rugene Kristusa mokuvatera vasikuli vendi kombinga zononkwara nomapata?

²⁴ Naina, kapi to vhuru kusigilira epata lyoge morwa kulitura mo unene moyirugana yomombungakriste. (Resa 1 Timoteusa 5:8.) Ntani Kristusa ga divilisa asi vasikuli vendi wovalimburukwi pevhu va gwane evatero lyoPatjangwa kuhamena nonkwara nepata. (Efe. 3:14, 15) Mo-1978, yipo va pwagesere buke Making Your Family Life Happy. Apa da pitire po nomvhura 18 tava pwagesa buke Nsapi zokutwaredera koruhafo rwemepata. Ntani hena, sifo soRuhungu kwa kara noyirongwa va wapaika mokuvatera valikwali va ture pasirugana nompango domoMatjangwa mononkwara dawo.

25-27. Ngapi omu vanona va va pakera mbili?

²⁵ Ngapi kuhamena vanona? Mwaza nomvhura, nawo kwa va pakera mbili. Mbunga zaJehova kwa gava yininke  yoyiwa kovanona wonomvhura dokulisiga-siga, ngesi yininke oyo yina ligwederere. Pasihonena, sirongwa “Elirongo lyoBibeli lyovanona” kwa mononekere mosifo The Golden Age kutundilira mo-1919 dogoro 1921. Ano mo-1920 yipo sa pwege sifo The Golden Age ABC ano mo-1941 yipo za pwege buke Children. Koyiha yo-1970 kwa pwagesere buke Listening to the Great Teacher, Your Youth—Getting the Best out of It ntani Buke zange zomasimwititi goBibeli. Mo-1982, mosifo Awake! kwa pwege mo sirongwa “Young People Ask” esi sa ya twaredesere kepwageso lyobuke Questions Young People Ask—Answers That Work mo-1989.

²⁶ Naina tuna kara nonobuke mbali edi ava tumbura asi Young People Ask, ntani yirongwa yovadinkantu simpe kuna kutwikira kuyitura koIntaneta zetu jw.org. Ntani twa kara nobuke Lirongera ko koMurongi goMunene. KoIntaneta zetu kwa kara ko yirongwa yoyinzi yovadinkantu,  kukwatera mo yikarata yovantu va tumbura moBibeli, yirongwa yoBibeli yovakondi novanona, noyidanauka nonovidiyo nayimwe ngoso. Mutaro gwaKristusa kovanona kapi gwa runduruka kutunda pena ga zigidire vanona a va dingire. (Mar. 10:13-16) Ana hara vanona va lizuvhe asi kwa va hara ntani kuvapakera mbili.

²⁷ Jesus ana hara hena kugamena vanona koyininke yoyidona. Mouzuni ou nomukaro kuna kudonapa unene ntani ekwatero kononkondo vanona kuna kuligwederera unene. Yipo nye mavyukiso gokuzera kwa ga tjangera vakurona yipo va popere vana vawo. *

28. (a) Yisinke twa hepa kurugana mokuhwilira montembeli ngomu va yi fanekesa memoneko lyaHesekiyeli? (b) Yisinke ono tokomene kurugana?

²⁸ Ayo kuhafesa mokuteda omu Kristusa ga twikira kukuhura vasikuli vendi nokuvadeura va gwanene mo uwa monompango daJehova. Gazadara ko hena kemoneko lyontembeli eli ga mwene Hesekiyeli. Diworoka marungavero. Ntembeli zina zopampepo. Ose kuhwilira mo, nye kapisi pokuza tupu komapongo, ndi pokuresa Bibeli, ndi pokuzuvhisa. Vayilipaki nawo kuvhura va rugane yininke oyo va hana kuhwilira montembeli zaJehova. Mokuhwilira montembeli ozo twa hepa kurugana yininke oyo ntani hena twa hepa kuparuka kuliza nonompango daJehova nokulihameka moukareli wousili nomutjima gomuwa! Tu hafereni nkenye apa situmbukira oso. Tu twikireni kuhonena upongoki waJehova nokusikisa mo nompango dendi!