RUHA 1
Usili woUhompa
TO MONO murongwa goge goBibeli ana tetuka apa ana kukwata egano mausili gomomatjangwa aga muna resa kumwe. Makura ta uyunga asi: “Ono hara kutanta asi Bibeli kuronga asi ngatu paruka narunye moparadisa paapa pevhu?” Ogu ono kuzuvhisa nendi ta menyuna nokupura murongwa goge asi: “Yisinke ono resa moBibeli?” Murongwa goge age ana hafa nokulinyunga komutwe ta tanta asi: “Kapi na kuyipura morwa kapi va yi ronga nge rumwe eyi!” To diworoka hena asi murongwa goge kwa uyungire yokulifana moyivike yongandi ya ka pita apa ga lirongere sikando sendi sokuhova edina lyaKarunga, Jehova.
Ya ku horokera oyo ndi? Vantu vaKarunga wovanzi ya va horokera. Yininke yimwe kuvhura kutudiworokesa uhwi womulyo ou twa gwana: ediwo lyousili! Ngapi omu wa gwene uhwi owo? Moruha oru natu ka konakona epuro olyo. Monkedi omu vantu vaKarunga ava gwana mauzera, ayo kulikida asi Uhompa waKarunga yipo wa kara. Nomvhura dononzi, Hompa gwawo Jesus Kristusa kwa divilisa asi vantu vaKarunga va va ronge usili.
MORUHA ORU
EGAUNUNO 3
Jehova ta horora sitambo sendi
Uhompa woUmesiyasa kwa kere ruha rositambo saKarunga apa ga sitire uzuni ndi? Ngapi Jesus ga horwere Uhompa?
EGAUNUNO 4
Jehova ta fumanesa edina lyendi
Yisinke wa sikisa mo Uhompa kuhamena edina lyaKarunga? Ngapi no lihameka mo mokupongora edina lyaJehova?
EGAUNUNO 5
Hompa ta gava uzera kuhamena Uhompa
Lironga o kwate egano kuhamena Uhompa waKarunga novapangeli vamo nava ngau ka pangera ntani eyi va hepa kusikisa mo.
