EGAUNUNO 4
Jehova ta fumanesa edina lyendi
1, 2. Ngapi Bibeli New World Translation za fumanesa edina lyaKarunga?
MOUVALI kongurangura, 2 Sindimba 1947, kambunga kovanavazinyetugara wovagwavekwa moBeteli moBrooklyn, New York, kwa tamekere kutoroka Bibeli. Konyima zonomvhura 12, moSondaha 13 Nsinano 1960, yipo va mene kutoroka. Konyima zomakwedi gatatu, 18 Pembagona 1960, munazinyetu Nathan Knorr ta pwagesa ruha rokuhulilira roBibeli New World Translation of the Holy Scriptures posigongi esi sa kere moManchester, Ingiranda. Muuyungi kwa pwagesere malizuvho ganavenye pokutanta asi: ‘Naina ezuva lyoruhafo lyoNombangi daJehova uzuni mudima!’ Sininke simwe somulyo sa kere metoroko lyepe esi sa reterere vantu ruhafo kuna kara edina lyaKarunga.
Bibeli New World Translation of the Christian Greek Scriptures kwa zi pwagesere mo-1950 posigongi Uhompa tau ligwederere (Rumoho: Sira saYankee, moNew York City; Rulyo: Ghana)
2 Matoroko gomanzi goBibeli kapi ga tumbura edina lyaKarunga. Nye vakareli vaJehova wovagwavekwa va rwanesere po ekoto lyaSatana lyokuhara kuninka vantu va divare edina lyaKarunga. Etwaromo lyoBibeli ozo New World Translation kwa tente asi: “Sininke somulyo po metoroko eli kuna kara kutengwidira mo edina lyaKarunga apa lya wapera.” Bibeli ozo kwa ruganesa edina lyaKarunga, Jehova, yikando yokupitakana po-7 000. Etoroko eli kwa fumanesa edina lyaGuhyetu gemeguru, Jehova!
3. (a) Yisinke va kwete egano vanavazinyetu kuhamena ntanto zedina lyaKarunga? (b) Ngapi natu kwata egano Exodus 3:13, 14? (Tara kakende “ Eyi ali tanta edina lyaKarunga.”)
3 Nomvhura danare, Valirongi woBibeli kwa gazarere asi edina lyaKarunga kutanta asi: “AME NYAME.” (Ex. 3:14) Yipo nye sifo soRuhungu 1 Murongagona 1926 kwa tente asi: “Edina lyaJehova kutanta asi . . . ogu ga dira etameko nouhura.” Nye komeho vatoroki va ka tameke kurugana Bibeli New World Translation, Jehova ga vaterere vantu vendi va kwate egano asi edina lyendi kapi tupu ali tanta asi kapi ga kara netameko nouhura, nye unene po asi age Karunga gositambo. Awo va lirongere asi edina Jehova kutanta asi: “Age kuninka yi kare po.” Age yige ga ninka uzuni novantu yi kare po, ntani age kuna kutwikira kuninka mpango zendi nositambo sendi yi kare po. Morwasinke ya karera nomulyo edina lyaKarunga li fumane, ntani ngapi natu li fumanesa?
Kupongora edina lyaKarunga
4, 5. (a) Yisinke atu hundire apa atu kanderere asi: “Edina lyoge ava li pongore”? (b) Siruwoke nga pongora Karunga edina lyendi?
4 Jehova kuna hara edina lyendi li fumane. Aso sitambo sendi sokupongora edina lyendi, ngomu lya yi horora ehundiro lyokuhova mekanderero lyaJesus eli asi: “Edina lyoge ava li pongore.” (Mat. 6:9) Apa atu kanderere ngoso, yisinke tuna kuhundira?
5 Ngwendi moomu twa lironga mEgaununo 1 lyobuke ezi, ehundiro “edina lyoge ava li pongore” kuna kara limwe lyomahundiro gatatu gemekanderero lyaJesus aga ga likwatakana nositambo saJehova. Mahundiro gavali gokukwama ko kuna kara asi: ‘Uhompa woge au wize. Mpango zoge ava zi sikise mo.’ (Mat. 6:10) Ngwendi moomu atu hundire Jehova asi Uhompa wendi u wize nompango zendi zi sike mo, ose kuhundira Jehova a rugane ko yuma mokupongora edina lyendi. Ose kuhundira Jehova asi a rugane ko yuma mokuzeresa edina lyendi keswau eli va li retera kutundilira merwaneso lyomoEdeni. Ngapi Jehova nga limburura makanderero ogo? Age kwa tanta asi: “Ngani likida nomuhoko upongoki wedina lyange lyenene-edina eli mwa fisa nomuga mokatji kawo.” (Hes. 36:23; 38:23) PoHarumagedoni, apa nga ka gusa po vadinikarunga, age nga ka pongora edina lyendi komeho zoyisitwa nayinye.
6. Ngapi natu lihameka mo mokupongora edina lyaKarunga?
6 Jehova kwa pulisira vakareli vendi va lihameke mo mokupongora edina lyendi. Yimo, kapi tatu vhuru kugwederera ko koupongoki wedina lyaKarunga. Alyo nare lya pongoka. Ngapi natu li pongora? Jesaya kwa tente asi: “Ame HOMPA Munankondo nadinye, ni mupongoki; ame nyame nomu tjira po.” Ntani Jehova mwene ga uyungire kuhamena vantu vendi asi: “Nyame Karunga, Mupongoki gwaIsraeli. Ove ngo fumadeka nge.” (Jes. 8:13; 29:23) Yipo nye, ose kupongora edina lyaKarunga pokulitara asi alyo lya lisiga ntani lya zeruka kupita madina nagenye, nokufumadeka eyi lya karera po nokuvatera vapeke va li pongore. Ose kufumadeka edina lyaKarunga apa atu tambura Jehova ngoMupangeli gwetu nokumulimburukwa nomutjima nagunye.—Yis. 3:1; Ehor. 4:11.
Kwa liwapaikilire kuvazigidisa kedina lyaKarunga nokulifumanesa
7, 8. (a) Morwasinke ya gusilire siruwo komeho vantu vaKarunga va va zigidise kedina lyendi? (b) Nonkedi musinke ntatu natu ka tara?
7 Vakareli vaKarunga kwa ruganesa edina lyendi moyimbapiratjangwa yawo kutundilira kwanare. Pasihonena, sifo soRuhungu saSiwogedi 1879 nobuke zomarusumo Songs of the Bride, ezi va pwagesere mvhura ozo, kwa tumbura mo edina Jehova. Nye komeho Jehova a pulisire vantu vendi va va zigidise kedina lyendi lyokupongoka, va hepere kusikisa mo yihepwa yongandi. Ngapi Jehova ga wapaikilire Valirongi woBibeli va va zigidise kedina lyendi?
8 Koyiha yo-1900, Jehova kwa vaterere vantu vendi va kwate egano mulyo gwedina lyendi. Tu tareni nonkedi ntatu omu ga yi rugene.
9, 10. (a) Morwasinke sifo soRuhungu pomuhowo sa demenene kwaJesus? (b) Erunduruko musinke lya horokere kutundilira mo-1919 ntani noyitundwamo musinke? (Tara hena kakende “ Omu sifo soRuhungu sa fumanesa edina lyaKarunga.”)
9 Nkedi zokuhova, vakareli vaJehova kwa ya kwete egano mulyo gedina lyaKarunga. Valirongi woBibeli kwa tere sizoweseso asi yilyo erongo lyomulyo po moBibeli. Eyi yiyo sifo soRuhungu sa demenene kwaJesus. Pasihonena, momvhura ezi va pwagesere sifo oso, amo kwa tumbwire mo edina Jesus yikando murongo kupitakana edina Jehova. Kuhamena Valirongi woBibeli, sifo soRuhungu 15 Nsinano 1976 kwa tente asi awo “kwa fumadekere unene” Jesus. Nye Jehova ga va vaterere va kwate egano asi Bibeli kwa fumadeka edina lyendi. Ngapi ya kundamene Valirongi woBibeli? Kutundilira mo-1919, sifo sooso kwa tente asi “awo va tamekere kufumadeka Jehova, Guhya Mesiyasa.” Monomvhura murongo da ya kweme ko, sifo soRuhungu kwa tumbwire edina lyaKarunga yikando yokupitakana 6 500!
10 Pokuruganesa unene edina Jehova, vanavazinyetu va likidire eharo lyawo kedina olyo. Ngwendi Mosesa, awo kwa tamekere ‘kutanga edina lyendi.’ (Deut. 32:3; Epis. 34:3) Ngomu ga yi tumbwidira moMatjangwa, Jehova ga mwene eharo eli va likidire kedina lyendi makura ta va tungike.—Epis. 119:132; Heb. 6:10.
11, 12. (a) Marunduruko musinke ga ya kere moyimbapiratjangwa yetu konyima zo-1919? (b) Kosinke ga here Jehova vakareli vendi va demenene, ntani morwasinke?
11 Nkedi zauvali, Vakriste wousili va kwete egano sirugana esi ga va pere Karunga. Konyima tupu zo-1919, vanavazinyetugara wovagwavekwa ava ngava pitisire kwa tamekere kukonakona uporofete waJesaya. Kutunda opo, yimbapiratjangwa yetu kwa nkondopekere sirugana sokuzuvhisa. Morwasinke erunduruko olyo lya karerere “nondya posiruwo sado”?—Mat. 24:45.
12 Komeho zo-1919, Ruhungu kapi rwa zogerere nonkango daJesaya asi: “One nyone nondipo dange; ame kwa ku horowora o kare mukereli gwange.” (Resa Jesaya 43:10-12.) Nye konyima zo-1919, yimbapiratjangwa yetu kwa ya demenene konovelise odo, pokukorangeda vagwavekwa navenye va lihameke mo mosirugana esi ga va pa Jehova sokugava undipo ndi umbangi kumuhamena. Kutundilira mo-1925 dogoro 1931, etjangwa lyaJesaya egaununo 43 kwa li zogerere moyifo yoRuhungu yokusika po-57, ntani mwankenye sifo nonkango daJesaya kwa di tambeserere koVakriste wousili. Monomvhura odo, Jehova kwa here vakareli vendi va demenene kosirugana esi ga va pere va rugane. Morwasinke? Kwa here “kuvatara tanko.” (1 Tim. 3:10) Komeho va va zigidise kedina lyaKarunga, Valirongi woBibeli va hepere kuyilikida kwaJehova kupitira moyirugana yawo asi awo sili nondipo ndi nombangi dendi.—Ruk. 24:47, 48.
13. Sininke musinke somulyo po unene da horora Nonkango daKarunga?
13 Nkedi zautatu, vantu vaJehova va ya kwete egano mulyo gokupongora edina lyendi. Mo-1920, awo va ya kwete egano asi kupongora edina lyaKarunga kwa kara sininke somulyo po unene. Ngapi Nonkango daKarunga da horora usili owo? Konakona yihonena yivali. Konda musinke zomulyo zeyi Karunga ga parwire Vaisraeli moEgipite? Jehova kwa uyungire asi: “Yeeyi asi edina lyange ngava li zuvhise mouzuni mudima.” (Ex. 9:16) Morwasinke Jehova ga likidire nkenda koVaisraeli apa va mu rwanesere? Jehova kwa tente asi: “Na yi rugene morwaedina lyange, va dire kuliswaura nomuhoko dapeke.” (Hes. 20:8-10, NW) Yisinke va lirongerere ko Valirongi woBibeli kononkango odo ntani noyihorokwa yimwe yomoBibeli?
14. (a) Koyiha yo-1930, yisinke va kwete egano vantu vaKarunga? (b) Ngapi ekwato egano lyoValirongi woBibeli lya kundamene sirugana sokuzuvhisa? (Tara hena kakende “ Konda zomulyo zeyi atu zuvhisire.”)
14 Koyiha yo-1930, vantu vaKarunga kwa kwete egano eyi ga uyungire Jesaya nomvhura 2 700 da ka pita. Kuhamena Jehova, age kwa uyunga asi: “Age kugendesa vantu vendi, ta fumadekesa edina lyendi.” (Jes. 63:14) Valirongi woBibeli kwa kwete egano asi yomulyo po kapisi ezoworo lyawo nye kupongora edina lyaKarunga. (Jes. 37:20; Hes. 38:23) Mo-1929, buke Prophecy kwa kwatakanesere usili owo pokutanta asi: “Edina Jehova kuna kara sininke somulyo unene koyisitwa nayinye.” Erunduruko olyo kwa ya tumangedere vakareli vaKarunga va gave umbangi kumuhamena nokupongora edina lyendi keswau eli va li retera.
15. (a) Koyiha yo-1930, yisinke va kwete egano vanavazinyetu? (b) Siruwo musinke sa sikire?
15 Koyiha yo-1930, vanavazinyetu va kwete egano mulyo gedina lyaKarunga nosirugana esi ga va pere va rugane ntani nomulyo gokupongora edina lyendi. Siruwo sa sikire Jehova a pe vakareli vendi mfumwa zokuvazigidisa kedina lyendi. Tu tareni omu ya horokere oyo.
Jehova ta paparere ‘edina lyendi mbunga zovantu vendi’
16. (a) Nkedi musinke zimwe zokulikarera omu Jehova ga fumanesere edina lyendi? (b) Pwanare, mbunga musinke ngava zigidisa kedina lyaKarunga?
16 Nkedi zimwe zokulikarera omu Jehova ga fumanesere edina lyendi, pokukara nombunga zovantu ava nava zigidisa kedina lyendi. Momvhura 1513 komeho zokuwiza Kristusa pevhu, muhoko goVaisraeli kwa karere po Jehova ngovantu vendi. (Jes. 43:12) Nye kapi va sikisire mo egwanekero lyawo naKarunga, ano momvhura 33 yipo va zumbanesere elikwatakano lyawo lyokulikarera nendi. Konyima zokaruwogona, Jehova kwa ‘paparere edina lyendi mbunga movapagani.’ (Yirug. 15:14) Vantu owo va ya horowere kwa ya va tumbwire asi ‘muhoko gwaKarunga,’ omu mwa hamena vasikuli vaKristusa wovagwavekwa wokonomuhoko dokulisiga-siga.—Gar. 6:16.
17. Yisinke ya tompokere Satana kurugana?
17 Momvhura 44, varongwa vaKristusa kwa ya va rukire “romuhoverera asi Vakriste.” (Yirug. 11:26) Pomuhowo edina olyo kwa likarerere, morwa kwa tembe tupu koVakriste wousili. (1 Pet. 4:16) Nye konyima, ngomu ga yi likidire Jesus mosifanekeso sendi soyilya nomau, Satana ya mu tompokere mokuruganesa edina Vakriste kwanavenye ava ngava lininkisa asi Vakriste. Ngoyitundwamo, kapi ya kere ureru kudimburura Vakriste wousili nava woyimpempa. Nye oyo ya ya rundurukire posiruwo ‘sokuteza-teza,’ esi sa tamekere mo-1914. Morwasinke? Morwa vaengeli kwa tamekere kuhangura Vakriste woyimpempa kwava wousili.—Mat. 13:30, 39-41.
18. Yisinke ya vaterere vanavazinyetu va dimburure asi vana hepa edina lyepe?
18 Konyima zokutumba mukareli gokulimburukwa mo-1919, Jehova kwa vaterere vantu vendi va kwate egano sirugana esi ga va pere. Awo va ya dimbwilire asi kuzuvhisa tunda embo zende embo kwa va ninkisire va lisige noVakriste woyimpempa. Konyima tava ya dimburura hena asi edina “Valirongi woBibeli” kapi lya gwanenene po. Morwa sitambo sawo kapi sa kere tupu sokulironga Bibeli nye sokugavera umbangi kuhamena Karunga nokufumanesa edina lyendi. Edina musinke lya waperere sirugana sawo? Epuro olyo kwa ya li limbwilire mo-1931.
Elikwamo lyosigongi somo-1931
19, 20. (a) Ediviso musinke lyokuhafesa va ka geve kosigongi mo-1931? (b) Ngapi va lizuvhire vanavazinyetu apa va gwene edina lyepe?
19 MwaPembankuru 1931, Valirongi woBibeli 15 000 kwa zire kosigongi moColumbus, Ohio, moAmerika. Pelikwamo kwa kere po nondanda mbali dononene. Vakalimo wovanzi kwa hetekerere kugazarera eyi da tente nondanda odo. Makura moSondaha, 26 Pembankuru, munazinyetu Joseph Rutherford kwa geve ediviso eli lyononkondo asi: “Ose tuna hara va tu dive nokutuzigidisa kedina Nombangi daJehova.” Vakalimo yipo va kwete egano asi nondanda mbali kwa karerere po edina lyetu lyepe, eli lya tundire mwaJesaya 43:10.
20 Vantu kwa zigilire unene nokusakerera siruwo sosire. Kupitira moradio, muhagaro ogo gwa tundire moColumbus kwa zuvhikire konyara mouzuni naunye. Ernest naNaomi Barber womoAustralia kwa tente asi: “Apa vanavazinyetu womoAmerika va sakerere, vanavazinyetu womositata saMelbourne kwa vatukire nokusakerera. Kapi ngatu divara sihorokwa oso.” *
Edina lyaKarunga kuna kufumana uzuni mudima
21. Ngapi edina lyepe lya kundamene sirugana sokuzuvhisa?
21 Vakareli vaKarunga pokuvazigidisa kedina Nombangi daJehova kwa va pere mukumo gokuzuvhisa. Edward naJessie Grimes, valikwali wovazuvhisi wokukarera moAmerika ava va kere posigongi moColumbus momvhura 1931, kwa tente asi: “Ose kwa tundire komambo getu ngoValirongi woBibeli nye twa tengwire ngoNombangi daJehova. Ose twa hefe asi ose ngesi twa kara nedina eli lya tu vaterere tu fumanese edina lyaKarunga gwetu.” Konyima zosigongi, Nombangi dimwe kwa ruganesere nkedi zompe zokuzuvhisa. Apa ngava zi momambo ngava gava komuntu kakarata aka ka kere nombudi asi: “Ame gumwe gonombangi daJEHOVA kuna kuzuvhisa Uhompa waJEHOVA Karunga gwetu.” Vantu vaKarunga va lizuvhire mfumwa pokuvazigidisa kedina Jehova ntani va liwapaikilire mokulidivisa nakunye.—Jes. 12:4.
“Ose kwa tundire komambo getu ngoValirongi woBibeli nye twa tengwire ngoNombangi daJehova”
22. Yisinke ayi ninkisa vantu vaJehova va lisige?
22 Nomvhura nonzi da pita po kutunda apa Jehova ga tumangedere vagwavekwa mokuruganesa edina lyawo lyokulikarera. Kutundilira mo-1931, Satana ya mu tompokere kuhoreka edina lyovantu vaKarunga ndi? Ya mu tompoka mokuninka vantu va dire kutudimburura ndi? Hawe! Ose kwa divikwa unene kupita pwanare asi ose nombangi daKarunga. (Resa Mika 4:5; Marakiya 3:18.) Morwa kutuzigidisa kedina lyaKarunga, nkenye ogu a li ruganesa kumudimburura usimbu asi age gumwe goNombangi daJehova. Nampili ngomu pwa vhuka maukarelikarunga gomanzi goyimpempa, ukareli wousili waJehova ‘kwa repa kupitakana nondundu nadinye.’ (Jes. 2:2) Naina, ukareli waJehova nedina lyendi kuna fumana unene.
23. Kuliza nEpisarome 121:5, usili musinke womulyo kuhamena Jehova au tu nkondopeke?
23 Ee omu tupu ayi nkondopeke pokudiva asi Jehova nga tu popera komahomokero gaSatana ngesi ntani komeho! (Epis. 121:5) Ose kukwatesa ko nonkango demEpisarome edi asi: “Za kara nerago mbunga ezi asi Karunga gwazo [Jehova, NW]; va kara nerago vantu ava ga horowora mwene!”—Epis. 33:12.
^ para. 20 Komauzera kuhamena eruganeso lina lyoradio tara mEgaununo 7, pepenuno 72-74.
