1, 2. Sihorokwa musinke sosinene po esi sa retere marunduruko gomanene mouzuni, ntani morwasinke vantu va dilire kusimona?

YININKE eyi ava rugana monombara nomonomberewa vantu kapi ava yi diva. Nye yitundwamo kuvhura kuyakundama vantu wovanzi, nokuretesa po marunduruko gomanene mouzuni.

² Ngapi kuhamena sihorokwa sosinene po esi sa retere marunduruko gomanene mouzuni? Sihorokwa oso kwa kundamene eparu lyovantu wovanzi. Vantu kapi va mwene sihorokwa oso. Aso kuna kara etameko lyepangero lyoUhompa waKarunga meguru, epangero lyoUmesiyasa eli ngali ya zonagura po uzuni ou. (Resa Ndaniyera 2:34, 35, 44, 45.) Mokumona asi vantu kapi va mwene sihorokwa oso, ngoso kuna kutanta asi Jehova kapi ga here vantu va si mone ndi? Ndi ga wapaikilire vantu vendi komeho si ka horoke? Tu tareni.

3-5. (a) Yilye ‘ntumi ezi za ya udisire egwanekero’? (b) Yisinke ya horokere komeho “ntumi” ozo zi wize kontembeli?

³ Nare-nare, kupitira mwaMarakiya, Jehova kwa pumbire asi nga wapaikira vantu vendi etameko lyepangero lyoUhompa woUmesiyasa. MwaMarakiya 3:1 ga pumbire asi: “Ngani tuma ntumi zange, zi wapekere nge nzira. Makura ngomu liharuka HOMPA ogu omu papara ta wiza kontembeli zendi. Ntumi ezi muna diworoka kumona, tazi wiza zi ya udise egwanekero lyange.”

⁴ Mosiruwo setu, siruwoke “HOMPA” Jehova ga wizire a ya konakone owo ngava rugana meharango lyontembeli zendi zopampepo zepevhu? Uporofete kwa faturura asi Jehova kwa wizire ‘nontumi zi ya udise egwanekero.’ Yilye ozo ntumi? Yige Jesus Kristusa, Hompa goUmesiyasa! (Ruk. 1:68-73) NgaHompa gomupe, age kwa wizire a ya konakone nokuyakuhura vantu vaKarunga pevhu.—1 Pet. 4:17.

 ⁵ Yilye “ntumi” zokuhova va tumbura mwaMarakiya 3:1? Ntumi ezi kwa kere po komeho zekaropo lyaHompa goUmesiyasa. Nomvhura dononzi komeho zo-1914 pweli ogu ga ‘wapaikire nzira’ komeho a wize Hompa goUmesiyasa ndi?

6. Wolye va kere “ntumi” zokuhova ezi za wapaikilire vantu vaKarunga koyihorokwa yokomeho?

⁶ Mobuke ezi, ngatu ka gwana malimbururo komapuro ogo moyihorokwa yovantu vanaina vaJehova. Koyiha yomvhura 1870, kwa kere kambunga kovantu wovalimburukwi woVakriste wousili, aka ka ya divikwire asi Valirongi woBibeli. Charles. T. Russell novakwawo yiwo ngava pitisire, awo kwa kere “ntumi” ezi va pumbire ngazi gava mavyukiso kovantu vaKarunga nokuvawapaikira yihorokwa yokomeho. Tu tareni nonkedi ne omu za yi rugene “ntumi.”

7, 8. (a) Wolye va tulire poruzera erongo lyoyimpempa lyomwenyo gwa ha fu? (b) Marongo musinke goyimpempa va tulire poruzera C. T. Russell novakwaawo?

⁷ Kupitira melirongo lyoMatjangwa, Valirongi owo woBibeli va gwene usili nokuuhanesa. Nomvhura nonomvhura, nongereka kwa kere momundema gopampepo morwa marongo gawo gomanzi kwa kere gosipagani. Erongo limwe kuna kara mwenyo gwa ha fu. Koyiha yo-1850, pwa kere vamwe ava va konakonene erongo olyo makura tava ya dimburura asi kapisi lyomoNonkango daKarunga. Henry Grew naGeorge Stetson naGeorge Storrs kwa tjenge nokugava yiuyungwa eyi ya tulire poruzera erongo olyo lyaSatana lyoyimpempa. * C. T. Russell novakwawo va gwanenene mo uwa kweyi va rugene vagara owo.

⁸ Kambungagona koValirongi woBibeli ka ya nongwenene asi pwa kere hena marongo goyimpempa aga ga pukisire vantu ngwendi asi vantu navenye wovawa kuza meguru ntani Karunga kuhwika vantu wovadona momundiro gwanarunye. Russell novakwaawo kwa tulire poruzera marongo ogo kupitira moyimbapiratjangwa.

9. Ngapi sifo soRuhungu sa tulire poruzera erongo lyaKarunga-Mutatu gumwe?

⁹ Ntani hena, Valirongi woBibeli kwa tulire poruzera erongo lyaKarunga-Mutatu gumwe. Mo-1887, sifo soRuhungu kwa tente asi: “Matjangwa ga faturura nawa-nawa malisigo pokatji kaJehova naHompa gwetu Jesus.” Sirongwa oso kwa uyungire asi ayo kutetukisa “omu lya lihana nokudivikwa erongo lyaKarunga-Mutatu gumwe. Nye mokumona asi yimo ya kara ngoso, ayo kulikida asi nongereka kwa rere apa gonkore ga retere mapukiso.”

10. Ngapi Ruhungu rwa likidire asi 1914 kwa kere mvhura zomulyo?

¹⁰ Sifo soRuhungu unene po kwa demenene komauporofete gokuhamena ekaropo lyaKristusa. Vagwavekwa wovalimburukwi  ava va tjenge sifo oso va mwene asi uporofete waNdaniyera kuhamena “nomvhura ntano-nambali,” kwa pumbire siruwo sesikiliromo lyositambo saKarunga kuhamena Uhompa woUmesiyasa. Koyiha yo-1870, awo va ya nongwenene asi 1914 yipo da ya hege nomvhura ntano nambali douporofete. (Ndan. 4:25; Ruk. 21:24) Nampili ngomu vanavazinyetu kapi va kwete nawa egano eyi ngayi horoka momvhura ozo, awo va divisire nakunye eyi va divire.

11, 12. (a) Kwalye ga geve munazinyetu Russell mfumwa kweyi nga rongo? (b) Nomvhura dononzi komeho zo-1914, ngapi Russell novakwaawo va tere sirugana sokuzuvhisa?

¹¹ Russell novakwaawo wovalimburukwi kapi va likangangere asi yiwo va gwene nokukwata egano mausili gomoBibeli. Russell kwa geve mfumwa kwava va mu hoverere. Nye unene po mfumwa kwa zi geve kwaJehova Karunga, ogu a rongo vantu vendi eyi va hepa kudiva posiruwo sokuwapera. Jehova ga tungikire Russell novakwaawo kelituromo lyawo lyokudivisa usili. Mwa za nomvhura, awo va ligusire ko konongereka doyimpempa.

 ¹² Sirugana sovagara owo wovalimburukwi sokudivisa marongo gousili nomvhura dononzi komeho zo-1914 kwa kere sokutetukisa! Sifo soRuhungu 1 Mangundu 1917, kwa tente asi: “Mamiliyona govantu ga manguruka koupika woutjirwe womundiro gwanarunye ntani nomarongo gamwe goyimpempa . . . Epaparo usili, eli lya tameka nomvhura nomurongo ne da ka pita, simpe kuna kutwikira kuza komeho dogoro evhu mudima ngali gwane usili nampili varwanesi va hetekere ko kuhagekesa ehaneso usili.”

13, 14. (a) Ngapi “ntumi” za wapaikilire nzira Hompa goUmesiyasa? (b) Yisinke natu lirongera ko kovanavazinyetu vena vanare?

¹³ Lipura asi: Ngano vantu vaKarunga kapi va divire malisigo pokatji kaJesus noGuhwe, Jehova, ngano va vhulire kuliwapaikira ekaropo lyaKristusa ndi? Hawe. Ngano va gazarere asi vantu navenye kwa kara nomwenyo gwa ha fu ndi asi Karunga kuhepeka vantu momundiro gwanarunye, awo ngano kapi va liwapaikilire ekaropo lyaKristusa. Yimo, “ntumi” kwa wapaikilire nzira Hompa goUmesiyasa.

¹⁴ Ngapi ose naina? Yisinke natu lirongera ko kovanavazinyetu vena vanare? Nose twa hepa kukara neharo lyokuresa nokulironga Nonkango daKarunga. (Joh. 17:3) Mouzuni ou wonzara zopampepo, ngano tu kare neharo lyenene lyonondya dopampepo.—Resa 1 Timoteusa 4:15.

15. Yisinke va ya dimbwilire Valirongi woBibeli? (Tara hena nondanda dokonhi.)

¹⁵ Valirongi woBibeli kwa rongere asi ya kara hepero kuligusa ko konongereka domouzuni. Mo-1879, sifo soRuhungu kwa tumbwire “ngereka zoBabironi.” Yisinke sa tembe? Vapapa, ndi ngereka zoVakatolika? Nongereka doVaporotestande ngadi tumbura ngereka zaKatolika asi Babironi. Nye, Valirongi woBibeli va ya dimbwilire asi “Babironi” kufanekesa nongereka nadinye doyimpempa. Morwasinke? Morwa nadinye ngadi rongo marongo goyimpempa aga tuna tumbura. * Mwa za siruwo, yimbapiratjangwa yetu kwa tumbwire kuvyukilira eyi va hepere kurugana ava va hamenene konongereka daBabironi.

16, 17. (a) Buke Millennial Dawn ntani sifo soRuhungu, yisinke ya korangedere vantu va rugane kuhamena ukarelikarunga woyimpempa? (b) Yisinke ya ninkisire marondoro ogo ga dire kukara nononkondo? (Tara nondanda dokonhi.)

¹⁶ Pasihonena, mo-1891, buke Millennial Dawn ruha 3, kwa zogerere omu Karunga ga tere Babironi asi: “Maukarelikarunga nagenye ogo kwa ga nyoka.” Azo kwa tente hena asi “navenye ava ava dili kukwatesa ko marongo nonompo doyimpempa kuna kuvazigida va liguse ko vene.”

¹⁷ Mo-1900, mwaMurongagona, sifo soRuhungu kwa geve mapukururo kowo madina gawo ga kere simpe monongereka  doyimpempa ava ngava uyunga asi: “Ame kukwatesa ko usili naunye ntani kapi ani zi konongereka dapeke.” Sifo sa pulire asi: “Ayo ya wapa kuhama koukareli wapeke ntani o hame hena koBabironi ndi? Ou yiwo ulimburukwi au hafesa ndi a tambura Karunga ndi? Hawe. Muntu pokuhama kongereka age kuna tura po elikwatakano nazo ntani age ga hepa kusikisa mo nayinye eyi ya hamena mo melikwatakano olyo dogoro . . . nga yi divise moyitarameho asi ana ligusa ko.” Mwa za nomvhura, epukururo olyo kwa ya li nkondopekere. * Vakareli vaJehova va hepa kuhagekesa po malikwatakano gawo nomaukareli goyimpempa.

18. Morwasinke ya karere hepero kovantu va pwage mo ‘moBabironi zonene’?

¹⁸ Ngano marondoro gokupwaga mo moBabironi zonene kapi va twikilire kugadivisa, ngano Kristusa Hompa gomupe ga ya gwene mbunga zovakareli wovagwavekwa pevhu vana liwapaikire ndi? Hawe, morwa Vakriste ava ava ligusa ko koBabironi yiwo velike wokuvhura kukarera Jehova “moMpepo nomousili.” (Joh. 4:24) Nose tuna tokomene kuligusa ko komaukarelikarunga goyimpempa ndi? Tu twikireni kulimburukwa mpangera ezi asi: “Pwageni mo mositata oso, one womuhoko gwange”!—Resa Ehororo 18:4.

19, 20. Ngapi sifo soRuhungu sa korangedere vantu vaKarunga va ponge kumwe?

¹⁹ Valirongi woBibeli kwa rongere asi vapuli vakwaawo va hepa kuponga kumwe. Kapi tupu ya gwanena po koVakriste wousili va liguse ko komaukarelikarunga goyimpempa. Ayo ya kara nomulyo kulihameka koukarelikarunga wousili. Sifo soRuhungu kwa korangedere owo ngava si resa va ponge kumwe. Pasihonena, mo-1880 mwaPembankuru, munazinyetu Russell kwa uyungire omu ga gwene ekorangedo momapongo ogo apa ga ka dingwire vanavazinyetu. Yipo ga korangedere vantu va tume yitundwamo yomapongo gawo, ano yitundwamo yimwe ngava yi tjanga moRuhungu. Nositambo musinke? “Tu diviseni . . . omu Hompa ana kumutungika; nsene asi one kuna kutwikira kuponga kumwe nowo va kara nepuro.”

²⁰ Mo-1882, moRuhungu mwa monekere sirongwa esi asi: “Kuponga kumwe.” Sirongwa oso kwa korangedere Vakriste va ponge kumwe yipo “va lironge nokulikorangeda nokulipameka-pameka.” Aso kwa tente asi: “Yi kare asi wa lironga ndi hawe. Nkenye ogu a simbe Bibeli nosipepa nopena ndi nkenye eyi nayi vhura kumuvatera. To  horowora sirongwa soge, nokuhundira mpepo zi ku vatere o kwate egano sirongwa oso, makura resa nokuteda ko nokuhetakanesa matjangwa ano ayo ngayi ku vatera o dive usili.”

21. Sihonena musinke va tulire po womombungakriste zaAllegheny kuhamena mapongo nokuvatera womombunga?

²¹ Mberewa zoValirongi woBibeli kwa kere moAllegheny, Pennsylvania, mosirongo saAmerika. Awo ngava tura po sihonena sokuponga kumwe va sikise mo mpangera zomoVahebeli 10:24, 25. (Resa.) Munazinyetu gomukurupe gedina Charles Capen ga diworokere asi nga zi komapongo ogo age simpe mumatigona. Age kwa tjenge asi: “Ame simpe kudiworoka etjangwa limwe eli va tjenge pekuma lyosinyanga sokuruganena yigongi. ‘Murongi gweni gumwe tupu, one hena namuvenye vezimo limwe tupu.’ Kapi na divara etjangwa olyo, movantu vaJehova kapi mwa kara ogu ga pita vakwaawo.” (Mat. 23:8) Munazinyetu Capen ga diworokere hena erongo nomakorangedo  nga gwana momapongo ntani nelituromo lyenene lyamunazinyetu Russell lyokuvatera nkenye ogu gomombungakriste.

22. Ngapi vantu wokulimburukwa va tere epukururo lyokuponga kumwe, ntani yisinke natu lirongera ko?

²² Vantu wovalimburukwi va kweme sihonena oso nokutambura mapukururo aga va va pere. Nombungakriste kwa di tulisire po hena moyitata yimwe ngwendi Ohio naMichigan ntani komaruha gamwe gaAmerika nokoyirongo yimwe. Lipura asi: Ngano vantu wovalimburukwi kapi va va rongere va limburukwe epukururo lyokuponga kumwe, awo ngano va vhulire kuliwapaikira ekaropo lyaKristusa ndi? Hawe. Ngapi ose naina? Nose twa hepa kutokomena kuza komapongo nagenye nokukapapara nompito dokukalikorangeda-korangeda.

23. Ngapi sifo soRuhungu sa likidire nawa-nawa asi vagwavekwa navenye va hepa kuzuvhisa?

²³ Valirongi woBibeli kwa rongere asi vagwavekwa navenye va hepa kuzuvhisa. Mo-1885, Ruhungu kwa tente asi: “Twa hepa kudiworoka asi nkenye mugwavekwa kwa mu gwavekera a kare muzuvhisi (Isa. 61:1).” Ruhungu romo-1888 kwa tumangedere asi: “Sirugana setu twa si diva . . . Nsene tu si ncenuna tu dire kulihameka mo, ose ngatu kara vakareli woudwa, kapi twa fira kugwana mfeto ezi va tu zigidira.”

24, 25. (a) Kugusa ko kukorangeda vantu va zuvhise, yisinke Russell novakwaawo va rugene? (b) Ngapi muzuvhisi gokukarerera ga fatwililire sirugana sokuzuvhisa posiruwo sina?

 ²⁴ Munazinyetu Russell novakwaawo kapi tupu ngava korangeda vantu va zuvhise. Awo kwa tamekere kutjanga yitratate ngava tumbura asi Bible Students’ Tracts, konyima tava ya yi tumbura asi Old Theology Quarterly. Ava ngava resa Ruhungu ngava gwana yitratate oyo nokuyihanesa kovantu pwa hana mukoso.

²⁵ Muzuvhisi gokukarerera Charles Capen kwa tente asi: “Ame ngani ruganesa nokarata depangero lyaAmerika yipo ni dive mukunda gwaPennsylvania. Nokarata odo kwa likidire nonzira nadinye, ayo ngayi rerupire nge ni gende porupadi komaruha nagenye gomomukunda. Poyiruwo yimwe konyima zomazuva gatatu gokugenda momukunda ni didilike owo va here nobuke Studies in the Scriptures, ngani hundire nkambe nokarukara yipo ni vhure kutwarera vantu nobuke dawo. Poyiruwo yimwe ngani rara ponofarama. Posiruwo sina kapi pwa kere matuwa gomanzi.”

26. (a) Morwasinke vantu vaKarunga va hepere kulitura mo mosirugana sokuzuvhisa mokuliwapaikira ekaropo lyaKristusa? (b) Mapuro musinke twa hepa kulipura?

²⁶ Posiruwo sina yirugana yokuzuvhisa ya hepere uradi noupampi. Vakriste wousili ngano kapi va va rongere mulyo gokuzuvhisa, awo ngano va liwapaikilire ekaropo lyaKristusa ndi? Hawe! Sirugana sokuzuvhisa kwa kara ruha rosidiviso sekaropo lyaKristusa. (Mat. 24:14) Vantu vaKarunga va hepere kuliwapaikira pokutura muhowo sirugana oso meparu lyawo. Nose twa hepa kulipura asi: ‘Sirugana sokuzuvhisa mulyo meparu lyange ndi? Ame kutura po malizambero yipo ni lihameke mo ndi?’

27, 28. Emoneko musinke ga mwene mupositoli Johanesa, ntani yisinke ga rugene Satana novaengeli vendi apa va hampurukire Uhompa?

²⁷ Moruhura, mvhura zomulyo 1914 tazi siki. Ngomu tuna yi tumbura ketamekero, vantu kapi va mwene sihorokwa oso semeguru. Nye, mupositoli Johanesa kwa mu pere emoneko eli lya fatwilire eyi ya horokere. Johanesa kwa mwene “sidiviso sosinene” meguru. Mbunga zaJehova zoyisitwa yopampepo ezi za fanekesa ‘mukadi,’ kwa kere nomarutu gavali makura ta hampuruka munona gomugara. Munona ogo gopasifanekeso “nga pangera nomuhoko nadinye nomburo zosivera.” Tupu va mu hampuruka, munona tava mu “nkweura a kare pwaKarunga, posipundi sendi souhompa.” Makura ezwi lyenene meguru tali zigire asi: “Ntaantani eparu nononkondo noUntungi yaKarunga gwetu, nepangero lyaKristusa gwendi.”—Ehor. 12:1, 5, 10.

²⁸ Johanesa kwa mwene emoneko lyehampuruko lyoUhompa woUmesiyasa. Aso kwa kere sihorokwa  sokuhafesa, nye kapisi navenye va si haferere. Satana novaengeli vendi tava rwanesa vaengeli wovalimburukwi ava va kere mepitisiro lyaMikayera ndi Kristusa. Yitundwamo? Bibeli kutanta asi: “Emukongoro lyenene makura tava li zuguma mo, ezoka lyanare eli ava tumbura asi Muzonaguli ndi Satana, eli ngali pukisa uzuni naunye. Alyo kuna li zugumine pevhu, kuna li zugumine po kumwe novaengeli valyo.”—Ehor. 12:7, 9.

29, 30. Pehampuruko lyoUhompa woUmesiyasa, yisinke ya horokere (a) pevhu? (b) meguru?

²⁹ Nare komeho zomvhura 1914, Valirongi woBibeli kwa uyungire asi maudigu ngaga tameka momvhura ozo. Nye kapi va divire omu maudigu ngaga kara. Kuliza nemoneko lyaJohanesa, Satana kwa tamekere kuhepeka vantu kupitakana pwanare. Bibeli kutanta asi: “Nane vakwetu ava mwa kara pevhu nemefuta, yeeyi Muzonaguli ana hegumukire kweni nehandu lyenene, morwa ana diva asi siruwo sendi esi sina hupu ko, sisupi!” (Ehor. 12:12) Mo-1914 yipo ya tamekere yita yokuhova youzuni ano sidiviso sekarapo lyaKristusa ngahompa kwa tamekere kumoneka mouzuni mudima. Yipo ga tamekere ‘mazuva gopouhura.’—2 Tim. 3:1.

³⁰ Nye meguru mwa kere ruhafo. Satana novaengeli vendi kwa va tjidire mo. Johanesa kwa tjenge asi: “Hafa ove eguru nava va kara mo!” (Ehor. 12:12) Satana va mu tjidire mo meguru, ano Jesus tava mu tura ngaHompa goUhompa woUmesiyasa makura ga liwapaikilire mokuvatera vantu vaKarunga pevhu. Yisinke ga rugene? Ngomu tuna yi tumbura ketamekero, Kristusa ‘ngontumi ezi za udisire egwanekero’ kwa wizire a ya kuhure vakareli vaKarunga vepevhu. Yisinke ya tente oyo?

31. Yisinke ga pumbire Marakiya kuhamena siruwo sekuhuro, ntani ngapi wa tamekere kusika mo uporofete owo? (Tara hena nondanda dokonhi.)

³¹ Marakiya ga pumbire asi ekuhuro kapi ngali kara ureru. Age kwa tjenge asi: “Yilye ogu nga vhura kulididimikira ezuva eli nga wiza? Ogu nga vhura kuparuka ezuva eli nga horoka yilye? Age nga kara ngwendi mfewa zononkondo, ngwendi mundiro ogu agu kuhura sivera.” (Mara. 3:2) Nonkango odo da sikire mo! Mo-1914 yi tware komeho, vantu vaKarunga kwa ligwanekerere nomaheteko nomaudigu gomanene. Apa ya didire yita yokuhova youzuni, Valirongi woBibeli wovanzi kwa va hepekere nokuvatura monodorongo. *

32. Maudigu musinke ga horokere mombunga zaKarunga mo-1916?

³² Mombunga zovanavazinyetu namo mwa kere maudigu. Mo-1916 munazinyetu Russell kwa fire age nonomvhura 64. Vantu vaKarunga wovanzi kwa tukukire. Nomfa  dendi da horwere asi vamwe kwa korerere tupu mwendi. Nampili ngomu Russell ga dilire kuhara va mu pe mfumwa zonene, nye wovanzi kwa kere ngwendi nonkareso zokumukarera. Apa ga fire wovanzi kwa gazarere asi epaparo lyousili tali haga ano vamwe kwa nyokere kutwikira komeho. Nkareso ozo za retere urwanesi ou wa gawinine mbunga.

33. Ngapi mandindiro goyininke eyi ya dilire kusika mo ga hetekere vantu vaKarunga?

³³ Mandindiro goyininke eyi ya dilire kusika mo nago kwa retere eheteko. Nampili ngomu Ruhungu rwa tumbwire asi 1914 yizo mvhura sa hege siruwo sovapagani, vanavazinyetu kapi simpe va kwete egano eyi ya horokere momvhura ozo. (Ruk. 21:24) Awo kwa gazarere asi mo-1914, Kristusa ngano ga wizire a ya simbe vagwavekwa a va tware meguru va ka pangere. Nye kapisi yimo ya horokere. Kehagero lyo-1917, Ruhungu kwa divisire asi nomvhura 40 dokuteza-teza ngadi haga mo-1918. Nye yirugana yokuzuvhisa kapi ya hege. Ayo kwa ligwederere nampili konyima zomvhura ozo. Ruhungu kwa geve egano asi etezo lya hege nye epongaiko simpe lya twikilire. Nye, wovanzi va hagekere kukarera Jehova morwa madompeso.

34. Eheteko musinke lyenene lya horokere mo-1918, ntani morwasinke vampitisili wonongereka va gazarere asi vana dipaga po mbunga zoValirongi woBibeli?

³⁴ Eheteko lyenene kwa horokere mo-1918. J. F. Rutherford, ogu ga pinganene po C. T. Russell mokupitisira vantu vaKarunga, kwa mu kwete novakwaawo ntambali. Awo kwa va tomenene siruwo sosire modorongo momukunda gwaAtlanta, moGeorgia, moAmerika. Posiruwo sina, sirugana sovantu vaKarunga kapi sa gendere po nawa. Vampitisili woValirongi woBibeli kwa va tulire monodorongo, mberewa zawo zonene moBrooklyn kwa zi pete ntani yirugana yokuzuvhisa kwa yi hagekesere mo moAmerika nomoEuropa. Vampitisili wonongereka kwa hefe, kwa gazarere asi vana dipaga po mbunga zoValirongi woBibeli. (Ehor. 11:3, 7-10) Nye mepuko va kere.

35. Morwasinke Jesus ga pulisilire mahepeko ga gwane vantu vendi, ntani yisinke ga rugene mokuvavatera?

³⁵ Nonkore kapi da dimbwilire asi Jesus kwa pulisilire mahepeko ga gwane vantu vendi morwa Jehova kwa hingilire a “pangure ngwendi gogu a zeresa ta kuhura sisiliveli.” (Mara. 3:3) Jehova naMunwendi va divire asi vantu wovalimburukwi ngava pita mo mezereso nemekuhuro yipo va wapere sirugana sokuruganena Hompa. Ketamekero lyo-1919, mpepo zaKarunga kwa rugene eyi da gazarere nonkore asi kapi tayi vhuru kuhoroka. Vantu wovalimburukwi va katukire hena! (Ehor. 11:11) Posiruwo sina, Kristusa ga sikisire mo ruha rumwe rosidiviso  sopomazuva gopouhura. Age kwa tulire po “mukareli gokulimburukwa gonondunge,” kambunga kovagara wovagwavekwa ava ngava pitisira vantu vendi pokuvapa nondya dopampepo posiruwo sado.—Mat. 24:45-47.

36. Yisinke ya likidire asi vantu vaKarunga va katukire hena?

³⁶ Munazinyetu Rutherford novakwaawo kwa va pwagesere modorongo 26 Nsinano 1919. Tava tura po sigongi mwaSitarara. Tava tura po mawapaiko gokutjanga sifo sauvali, ngava tumbura asi The Golden Age. Sifo oso kwa si wapaikilire yirugana yokuzuvhisa. * Mvhura zoozo yipo va pwagesere simbapira Bulletin, vana kutumbura naina asi Yirugana yetu yoUhompa. Aso kwa si ruganene nositambo soyirugana yokuzuvhisa. Kutundilira mo-1919, yirugana ya tunda embo zende embo kwa yi nkondopekere unene.

37. Mo-1919 yi tware komeho, yisinke va rugene vamwe wokudira kulimburukwa?

³⁷ Sirugana sokuzuvhisa kwa twikilire kukuhura vakareli vaKristusa, morwa wokulinenepeka kapi va here kuzuvhisa. Awo va ya ligusire ko kovantu wovalimburukwi.  Mo-1919 yi tware komeho, vamwe wokudira kulimburukwa va ya tamekere kuswaura nokurwanesa vakareli vaJehova nokukwatesa ko ava ngava va hepeke.

38. Umbangi musinke ali tu pe etompoko lyovasikuli vaKristusa?

³⁸ Nampili ngomu ya kere ngoso, vasikuli vaKristusa pevhu kwa twikilire kuvhuka nokunkondopara. Etompoko lyawo kutupa umbangi asi Uhompa waKarunga kuna kupangera! Vantu wokudira kusikilira mo va vhulire kufunda Satana nouzuni ou woudona mevatero lyaKarunga eli ga geve kupitira mwaMunwendi nomoUhompa woUmesiyasa!—Resa Jesaya 54:17.

39, 40. (a) Yisinke ya kara mo mobuke ezi? (b) Mauwa musinke ngo gwana pokuzilironga?

³⁹ Momagaununo gokukwama ko, ngatu ka konakona eyi wa sikisa mo Uhompa waKarunga pevhu kutunda apa wa tamekere kupangera meguru. Nkenye ruha robuke ezi ngaru ka konakona yirugana yokulisiga-siga yoUhompa apa pevhu. Mwankenye egaununo mwa kara kakende aka no ruganesa o likonakone nsene sili wa yi pura asi Uhompa yipo wa kara. Momagaununo gokuhulilira, ngatu ka zogera eyi natu ndindira apa Uhompa ngau ya zonagura po vadinikarunga nokuninka evhu li kare paradisa. Mauwa musinke ngo gwana pokulironga buke ezi?

⁴⁰ Satana kuna hara o dire kupura moUhompa waKarunga. Nye Jehova kuna hara kunkondopeka epuro lyoge yipo ngali ku popere nokukupameka. (Efe. 6:16) Yipo nye, kuna kukukorangeda o lironge nelituromo buke ezi. Wa hepa kulipura asi: ‘Ame na yi pura asi Uhompa waKarunga yipo wa kara ndi?’ Nsene asi yimo, ove ngo limburukwa nokukwatesa ko noupampi Uhompa owo, dogoro apa vantu navenye ngava diva asi Uhompa waKarunga pouli ntani kuna kupangera.