EPURO 1
Ame muntu musinke?
YISINKE NO RUGANA?
Tu tante asi Karen kuna kara popati. Konyima zonominute dongandi ta zuvhu ezwi lyomundambo konyima zendi.
“Yisinke ono sikamene nyovelike?”
Karen ta setuka nokumona Jessica ana kwaterere makende gavali, ago kuna kumoneka asi gomarovhu. Jessica ta tambeke ekende limwe kwaKaren nokutanta asi: “Wa ha lininkisa asi kapi o nu.”
Karen ana hara kunyoka nye kapi ana hara kuguvisa kaume kendi Jessica. Ano kapi ana hara kumoneka asi kapi ga diva eparu. Ntani Jessica kuna kara gumwe govakadona wovawa. Karen ta gazara asi: ‘Kapisi epuko nsene asi Jessica nage kuna kunwa. Ago marovhu tupu, kapisi epangwe.’
Ngano nyove Karen, yisinke ngano no rugana?
GAZADARA KO!
Mokutura po etokoro lyewa moukaro ou, wa hepa kulidiva nyamoge. Ayo kwa kwatera mo kudiva asi ove muntu musinke nositambo soge. Nsene o kara nediwo olyo, ngo tura po matokoro ganyamoge meparu lyoge nokudira kupulisira wopeke va ku tokwere po.—1 Vakolinte 9:26, 27.
Ngapi no vhura kulidiva nyamoge? Mapuro gana kukwama ko kuvhura ga ku vatere.
1 UNANKONDO MUSINKE NA KARA NAWO?
Kudiva eyi o vhuru kurugana ntani yikara yoyiwa eyi wa kara nayo ngayi ku vatera o kare nouradi.
SIHONENA SOMOBIBELI: Mupositoli Paurusa kwa tjenge asi: “Mpili ngomu kwa puka nge kuuyunga nawa, kapisi asi nediwo kwa pira nge.” (2 Vakolinte 11:6) Paurusa morwa ga divire unene Matjangwa, age ga kere nouradi wokulimburura ava va mu rwanesere. Age kapi ga pulisilire nonkango dawo donondona di mu ninkise a dire uradi.—2 Vakolinte 10:10; 11:5.
LIKONAKONA: Tjanga konhi udivi ou wa kara nawo.
Tjanga sikara sosiwa esi wa kara naso. (Pasihonena, ove kupakera mbili vantu ndi? ugavi ndi? kuvhura kukuhuguvara ndi? kapi o hulilire ndi?)
2 UPIRANKONDO MUSINKE NA KARA NAWO?
Nsene o dira kudiva upirankondo woge, kuvhura u ku pangere nokurundurura nkareso zoge.
SIHONENA SOMOBIBELI: Paurusa ga divire upirankondo wendi. Age kwa tjenge asi: “Komutjima gwange ame Veta zaKarunga kwa zi panda unene. Nye ame kumona hena veta zapeke ezi azi rugana morutu rwange. Veta ozo kurwisa Veta zomomutjima gwange. Azo yizo za tura nge moupika wononzo edi adi pangere morutu rwange.”—Varoma 7:22, 23.
LIKONAKONA: Maupirankondo musinke wa hepa kulironga kupangera?
3 YISINKE YITAMBO YANGE?
Kuvhura o ronde taxi nokutantera musingi a ku singagure tupu mositarate dogoro maholi gendi ga pwe ndi? Owo ugova ntani ta ku futisa yimaliwa yoyinzi!
Yisinke natu lirongera ko? Nsene o litulira po yitambo meparu ngo diva eyi no rugana. Kapi ngo hepeka tupu siruwo soge pokurugana yininke ya hana mulyo.
SIHONENA SOMOBIBELI: Paurusa kwa tjenge asi: “Ame ko kapi nina kuduka mawoko-woko.” (1 Vakolinte 9:26) Paurusa kapi ga ndindilire asi yininke yi horoke pwayene meparu, nye ga litulilire po yitambo nokurugana ko yuma yipo a yi sikise mo.—Vafilipi 3:12-14.
LIKONAKONA: Tjanga konhi yitambo eyi ono hara kusikisa mo mvhura ezi.
4 MATOKORO MUSINKE NA TURA PO?
Nsene o lidiva nyamoge ngo pama ngwendi sitji sokupama esi nazi dira kuganda mpepo
Nsene kapi wa tura po matokoro meparu, ove kapi ngo diva eyi ngo rugana. Ngwendi rugongoro ogu a tjindji ruvara rwendi kuliza neyi yina mu kundurukida, ove ngo kwama tupu vakaume woge mevango lyokutura po matokoro ganyaamoge.
Nsene ngo rugana kuliza nomatokoro goge ove kapi ngo kwama tupu yovakaume woge.
SIHONENA SOMOBIBELI: Apa Ndaniyera ga kere simpe mudinkantu, age kwa “tokwere” asi nga limburukwa noVeta daKarunga nampili a kare ure nekoro lyendi. (Ndaniyera 1:8) Pokurugana ngoso, age kwa kwaterere komatokoro gendi. Age kwa parukire kuliza nomatokoro gendi.
LIKONAKONA: Matokoro musinke wa tura po? Pasihonena: Wa pura mwaKarunga ndi? Nsene yimo, morwasinke? Yisinke ayi ku likida asi yipo ga kara?
Wa yi pura asi kuvhura o gwanene mo uwa monompango daKarunga ndi? Morwasinke?
Ono hara kukara ngwendi sihako esi azi pepagura mpepo ndi ngwendi sitji sokupama azi dili kuvhura kuganda mpepo? Nsene o kwaterera komatokoro goge, ngo fana ngwendi sitji oso. Ano eyi ngayi ku vatera o limburure epuro eli, ame muntu musinke?
