EPURO 9
Kuvhura ni pure melisinto ndi?
YISINKE NO RUGANA?
Tu tante asi Alex ana piyagana. Age kwa pura mwaKarunga ntani mesito. Nye mitili gwawo kuna kunkondopeka asi elisinto usili kuliza nekonakono lyovadiviunsitwe. Alex kapi ana hara kumoneka asi age mugova. Ta uyunga momutjima asi: ‘Nsene asi vadiviunsitwe va yi likida asi elisinto usili, kapi tani vhuru kuyipatanesa.’
Ngano nyove Alex, kuvhura o pure melisinto morwa nobuke dokosure da yi likida asi usili ndi?
GAZADARA KO!
Rorunzi vantu kunkondopeka yininke eyi va pura va hana kudiva eyi va yi pulira.
-
Vamwe kwa pura mesito morwa kwa yi va ronga kongereka.
-
Ano vamwe kwa pura melisinto morwa kwa yi va ronga kosure.
MAPURO NTAZIMWE WA HEPA KULIPURA
Bibeli kutanta asi: “Nkenye embo muntu a li tungu, nye mutungi gwanayinye, yige Karunga.” (Vahebeli 3:4) Oyo usili ndi?
Pokutanta asi eparu kwa wiza po tupu lyene kuna kara ngwendi kuna kutanta asi ezi nzugo kwa wiza po zene
MAGANO GOVANTU: Nayinye eyi ya kara mouzuni kwa wiza po morwa koyili ya cukire makura ta yi liforoma yene.
1. Nsene asi koyili ya cukire, yilye ndi yisinke ya yi retesere po?
2. Yipi no pura po, yininke nayinye kwa wiza po pwayene ndi kweli gumwe ga yi retesa po?
MAGANO GOVANTU: Vantu kwa tunda komangwanza.
3. Nsene asi vantu kwa tunda komangwanza, morwasinke vantu va karera nonondunge kupitakana mangwanza?
4. Ntani morwasinke ya karera udigu kukwata egano omu lya wiza po eparu?
MAGANO GOVANTU: Elisinto usili.
5. Muntu ogu ga uyunga oyo ga kara noumbangi wayo ndi?
6. Vantu vangapi va pura melisinto morwa kwa va tantera asi sinzi sovantu ava va lironga unene kwa yi pura?
Julia kwa tanta asi: “Nsene o za mowiza o gwane nzugo zongwa, kuvhura o tante asi ‘yitji kwa gwa yene makura yiyo ya kara nzugo ndi?’ Hawe. Kapi tayi horoka oyo. Morwasinke nye no pulira asi yininke nayinye mouzuni kwa wiza po pwayene?”
Gwen kwa tanta asi: “Gazara asi gumwe ta ku tantere asi koyili yina cuka monkondwa zokundurukira ano inka yiyo zina nafaukire kekuma nokomaparafona makura yiyo zina liforoma zi kare bukenkango. Kuvhura o yi pure oyo ndi?”
MORWASINKE NO PULIRA MWAKARUNGA?
Bibeli kutukorangeda tu ruganese “nondunge.” (Vahebeli 5:14) Eyi kutanta asi kapisi o pure tupu mwaKarunga morwa:
-
MALIZUVHO (Ame kulizuvha asi pweli gumwe ga kara nononkondo unene)
-
MPO (Ame kwa tunga momukunda omu mwa kara maukarelikarunga)
-
MAGANO GOVANTU (Vakondi vange kwa ronga nge ni pure mwaKarunga, na hepa tupu kuyitambura)
Nye wa hepa kukara nonokonda dousili deyi wa pulira mwaKarunga.
Teresa kwa tanta asi: “Apa mitili a faturura omu a ru rugana rutu, ayo kufaturukira nge nawa-nawa asi Karunga yipo ga kara. Nkenye ruha romorutu kwa kara noyirugana yaro, nampili maruha gomanunu, yimwe eyi aga rugana kapi atu yi dimburura. Rutu romuntu kutetukisa sili unene!”
Richard kwa tanta asi: “Apa ani mono matungo gomare ndi matuwa, ame kulipura asi: ‘Yilye ga yi rugana?’ Pwa hepa muntu gonondunge mokupangera etuwa, morwa lya kara noyivera yoyinzi eyi ya hepa kuruganena kumwe yipo li gende. Nsene pweli ogu ga pangera matuwa, vantu nawo ntudi pweli ogu ga va sita.”
Anthony kwa tanta asi: “Moomu na lirongere unene unsitwe, yimo hena na dilire kupura melisinto. . . . Kwange ame, ayo ureru kupura moMusiti kupitakana melisinto.”
GAZADARA KO
Nomvhura dononzi vadiviunsitwe kwa rugana epaparo nye simpe kulipatana kuhamena elisito. Nsene asi awo kulipatana, hepero o pure melisinto ndi?
