Tu tante asi Julia kuna kulitara montarero nye ta lizuvhu asi ana nete. Ta tanta asi: “Na hepa kutongama ko,” nampili ngomu vakondi vendi novakaume ava mu tantere asi kapi ga neta.

Julia kuna kugazadara a dire kulya mazuva gongandi yipo a tongame . . .

Ngano nyove Julia, yisinke ngano no rugana?

Kapi ya kara epuko kukara nosinka kuhamena emoneko lyoge. MoBibeli namo kwa tumbura emoneko lyewa lyovakadi novagara vamwe ngwendi Sara naRakera naAbigayili naJosefa ntani Ndafita. Bibeli kwa tumbura Abisaga mukadona “gomuwa unene.”—1 Vahompa 1:4.

Nye vadinkantu wovanzi kwa kara nosinka sosinene kuhamena emoneko lyawo. Oyo kuvhura kutwaredesa komaudigu gomanzi. Pasihonena:

• Mekonakono limwe vakadona wokusika konoperesenta 58 kwa tente asi awo kwa neta unene nye wokusika konoperesenta 17 yiwo va kere asi wokuneta.

• Ano mekonakono limwe lyovakadi wokutongama, noperesenta 45 kwa gazarere asi awo kwa neta unene.

• Morwa kuhara kutongama, vadinkantu vamwe kuyavera uvera wosiponga ava tumbura asi anorexia wokuhageka kulya.

 Nsene to dimburura asi wa kara nouvera wangoso, gwana evatero. Tantera vakondi woge ndi mukurona ogu wa huguvara. Bibeli kutanta asi: ‘Vantu namukwawo kulihara nokulikwafa moudigu.’—Yisewe 17:17.

Eyi ayi ninkisa muntu a wape kuna kara yikara yendi nye kapisi emoneko. Pasihonena, Bibeli kuuyunga kuhamena Abisaromo, munwahompa Ndafita, asi:

“MoIsraeli mudima kapi mwa kere ogu ga fumanene mouwa ngwendi Abisaromo, kapi ga kere nosipo.”—2 Samwere 14:25.

Nye, mudinkantu ogo kwa linenepekere nokuhara efumano! Yipo nye, Bibeli kusingonona Abisaromo asi mugara gomudona gokudira kulimburukwa ntani gonyanya.

Eyi yiyo Bibeli azi tu korangedere asi:

‘Dwareni muntu gomupe.’—Vakorosi 3:10.

‘Maliwapaiko geni ga ha kara gokontunda tupu, nye ga kare gomuntu gomonda.’—1 Peturusa 3:3, 4.

Nampili ngomu ya dira kukara epuko kuhara kumoneka nawa nye diworoka asi yomulyo po kuna kara yikara yoge. Eyi ngayi ninkisa wopeke va ku hare kuna kara yikara yoge yoyiwa nye kapisi rutu roruwa ndi rononkondo. Felicia kwa tanta asi: “Emoneko lyewa kulinongonona usimbu, nye yikara yoge yoyiwa yiyo ngava diworoka po vantu unene.”

Emoneko lyoge kukuguvisa ndi?

Wa gazadara kuranda nomutji ndi kuza kwandokotora ndi kuhageka kulya yipo rutu roge ru wape ndi?

Ngano wa kere nononkondo dokutjindja emoneko lyoge, yisinke ngano no tjindja? (Didilika eyi no tjindja)

• URE

• SIVIHA

• NOHUKI

• RUTU

• SIPARA

• SIPAPA

Nsene ove kuna limburura asi nhi komapuro gavali gokuhova nokudidilika yininke yitatu kepuro lyautatu, diworoka asi: Nampo vantu kapi ava ku mono asi o mudona ngomu o limono nyamoge. Ayo ureru kukara nosinka sosinene kuhamena emoneko lyoge.—1 Samwere 16:7.