EPURO 7
Ngapi nani nyokera po ezedo lyokuligwanekera panyama?
YISINKE NO RUGANA?
Tu tante asi Heather kuna kara mukadona gwaMike makwedi gavali tupu. Nye Heather kuna kulizuvha ngwendi ga diva nawa Mike. Nkenye ezuva awo kulitumina nombudi, kuuyunga ure wovili zimwe kongodi ntani hena kulitantera nayinye! Nye Mike kapisi yiyo tupu yelike ana hara.
Momakwedi ogo gavali, Mike naHeather ngava likwata komawoko nokulincumita. Heather kapi ana hara yi twaredere koure. Nye kapi ana hara asi elikwatakano lyawo li hage po. Kwato gumwe a mu ninkisa a lizuvhe asi age muwa ntani mulyo. Age kuuyungira momutjima asi: ‘Name naMike twa lihara . . . ’
Ngano nyove Heather ntani o siki pontambo zokulivandekera, yisinke ngano no rugana?
GAZADARA KO!
Eligwanekero panyama kuna kara uhwi wokutunda kwaKarunga ou ga gava tupu kovalikwali. Kuligwanekera panyama wa hana kukwara kuzonagura uhwi owo. Ayo kwa fana ngwendi kuna kokotesa sikoverero sosiwa esi ga ku pa mukweni.
Nsene o vatuka kositji o heteke kutuka ngwendi sidira, to ligwanekere noyitundwamo yoyidona. Ayo ya lifana tupu nsene o teza po veta ezi asi: ‘Nyokeni ruhonda.’—1 Vatesaronika 4:3.
Yisinke nayi horoka nsene o teza po veta ozo? Bibeli kutanta asi: “Ogu a hondere, kuzonagura rutu rwamwene.” (1 Vakolinte 6:18) Eyi usili ndi?
Valirongi kwa dimburura asi vadinkantu wovanzi ava va hondera kwa ligwanekera noyitundwamo eyi:
-
KULIVERA. Vadinkantu wovanzi ava va ligwanekera panyama va hana kukwara kwa tanta asi awo kwa livera konyima zosiruwo.
-
SINKA. Konyima zokuligwanekera panyama awo kulipura asi: ‘Nalye hena ga ligwanekera nage panyama?’
-
KUDIRA EHUGUVARO. Vakadona wovanzi kulizuvha asi va hepa gumwe gokuvapopera kapisi gokuvarugana momudona. Ano vamati wovanzi kapi va hara vakadona ava va ligwanekera nawo panyama.
-
Eyi wa hepa kudiworoka: Nsene o ligwanekera panyama ove simpe kapi wa kwara, ove kuna kuzumbanesa sininke somulyo. (Varoma 1:24) Rutu roge mulyo unene kapisi rokugava kwankenye muntu!
Likida asi wa kara nononkondo ‘dokunyokera po ruhonda.’ (1 Vatesaronika 4:3) Nsene ngo kwara, ntani nye ngo vhura kuligwanekera panyama nomulikwali goge. Makura ngo yi hafera nye unene, wa hana malizuvho gosinka ndi gokulivera ndi gowoma aga aga wiza po nsene o ligwanekera panyama wa hana kukwara.—Yisewe 7:22, 23; 1 Vakolinte 7:3.
NGAPI ONO KUGAZARA?
-
Muntu ogu ga ku hara, kuvhura a ku rugane yininke eyi nayi kukoresa parutu nopamalizuvho ndi?
-
Muntu ogu ga ku hara, kuvhura a ku zede o teze po elikwatakona lyoge naKarunga ndi?—Vahebeli 13:4.
