EPURO 3
Ngapi nani uyunga novakondi vange?
YISINKE NO RUGANA?
Tu tante asi kuna kara Utatu kongurova. Geoffrey gonomvhura 17 ana mana yirugana yendi yemembo, makura ana hara kupwizumuka. Ta paturura tivi makura ta hingire posipundi esi ga hara.
Poopo tupu oguhwe nawo tava hwilire nokusikama pevero ntani kapi vana hafa.
Tava mu zigida nezwi lyougara asi: “Geoffrey! Morwasinke ono kumanena siruwo soge mokutarera tivi, wa hana kuvatera mumbyoge noyirugana yendi yokosure? Ove kapi o zuvhu!”
Geoffrey ta vhunguta asi: “Yina tameke hena sa.”
Oguhwe tava mu hedere nokumupura asi: “Yisinke ono kuuyunga?”
Ta limburura asi: “Nayimwesi,” age ana tura ko nonsige.
Oguhwe tava handuka unene nokuuyunga asi: “Ove, nyame ono kulimburura ngoso!”
Ngano nyove Geoffrey, ngapi ngano ono gendesa ukaro ou?
GAZADARA KO!
Euyungokumwe novakondi woge kwa fana ngwendi kuna kusinga etuwa. Nsene kuna kusinga, makura o gwane nzira va zi sitika, ove no rundurukira monzira nazopeke.
PASIHONENA:
Leah kwa tanta asi: “Ayo kudigopera nge kuuyunga notate. Poyiruwo yimwe tani va uyungisa, nye konyima tava pura nge asi: ‘Name ono kuuyunga ndi?’”
LEAH KUVHURA A RUGANE YININKE YITATU:
-
Ta kehura oguhwe.
Leah ta uyunga asi: “Nani eyi na uyunga kwato mulyo kweni?”
-
Ta hageke kuuyunga noguhwe.
Leah ta hageke kutantera oguhwe kuhamena udigu wendi.
-
Ta ndindire siruwo sosiwa nokuzogera udigu wendi.
Leah ta zogere noguhwe ndi tava tjangere udigu wendi mombilive.
Poyininke oyo yitatu, ruha musinke no horowera po Leah?
KONEKA: Oguhwe vaLeah koyili vana kugazara makura kapi vana diva udigu wendi. Nsene Leah na horowora Ruha A, pokuvakehura awo kuvhura va dire kukwata egano eyi ana kuvakehwira. Nsene ava kehura awo kapi nava mu purakena ntani kapi tayi likida asi ga fumadeka oguhwe. (Vaefeso 6:2) Yipo nye etokoro olyo kapi tali reta uwa.
Ngwendi moomu tupu no rundurukira monzira nazopeke, ove kuvhura o gwane nkedi zimwe zokuvhura kulizuvha novakondi woge
Nampili ngomu Ruha B kuna kara etokoro lyoureru nye kapisi etokoro lyewa. Morwasinke? Mokuninka asi yi mu tompoke kukohonona po maudigu gendi, ga hepa kuzogera noguhwe yipo va mu vatere, va hepa kudiva eyi yina kuhoroka meparu lyendi. Kuhageka kuvauyungisa kapi tayi gusa po udigu.
Pokutokora Ruha C, Leah kapi ta hageke kuuyunga noguhwe nye ta ndindire siruwo sapeke mokuvatantera. Ano nsene na tokora kutjangera oguhwe mbilive, age na lizuvha hansa ko.
Pokutjanga mbilive kuvhura yi mu vatere a vhure kugazadara ko eyi ana hara kuuyunga. Apa oguhwe nava ka resa mbilive zendi nayi va vatera va kwate nawa egano udigu wendi. Yipo nye Ruha C kuvhura kuretera uwa Leah noguhwe. Yi kare asi tava uyunga pakana ndi pokuvatjangera mbilive, ya wapa kukwama epukururo lyomoBibeli asi: “Ano atu kondjereni eyi ayi reta mbili.”—Varoma 14:19.
Yisinke hena yimwe na vhura kurugana Leah?
Kuvhura o gazadare ko, nokuyitjanga konhi. Ntani tjanga yitundwamo oku nali twaredera etokoro olyo.
UYUNGA USILI
Diworoka asi eyi o uyunga neyi ava gazara vakondi woge asi yiyo ono tamba pamwe kapi ayi lizi.
PASIHONENA:
Vakondi woge kuvhura va ku pure eyi ono guvire. Ano ove to va limburura asi: “Kapi nina hara kuyizogera.”
Nye vakondi woge kuvhura va gazare asi kapi wa va huguvara ntani no ka tantera tupu vakweni udigu woge.
Tu tante asi ono kara noudigu wounene makura vakondi woge vana hara kukuvatera. Nye to uyunga asi: “Mwa ha kara nosinka. Nani yi kohonona po nyamwange.”
-
Yisinke nampo nava vhura kugazara vakondi woge?
-
Monkedi musinke zongwa nani vhura kuvalimburura?
