Jehova kwa rugene sikunino, Edeni. Mosikunino kwa kere mo nombya noyitji noyikorama. Makura ta gusa evhu a site muntu gokuhova, Adamu, nokumuheserera munku momazuru gendi. Ono diva asi yisinke ya horokere? Makura muntu ta tameke kuparuka! Jehova ta tantere Adamu a pakere mbili sikunino nokuruka yikorama nayinye madina.

Jehova kwa pere Adamu veta. Ta mu tantere asi: ‘Enyango lyokoyitji nayinye kulya tupu, kugusa ko lyokositji simwe. Nsene ngo lya ko, ngo fa.’

Konyima, Jehova ta tanta asi: ‘Ame tani ruganene ko Adamu mukwafi.’ Makura Karunga ta ponyokesa Adamu monompofu dononene, ta mu gusa rupatji ta ru rugana mukadi. Mukadi ogo edina lyendi Eva. Adamu naEva makura tava kara epata lyokuhova. Ngapi  omu ga lizuvhire Adamu apa ga gwene mukadi? Adamu kwa hefe unene, ta tanta asi: ‘Jehova ana ruganene nge mukadi gomuwa, ogu ga fana nge!’

Jehova ta tantere Adamu naEva va rete vanona yipo evhu li zure. Karunga kwa va harerere va ninke evhu nalinye li kare paradisa ndi sikunino sosiwa ngwendi saEdeni. Nye kapi va yi sikisire mo. Ono diva asi morwasinke? Elimbururo natu ka li gwana mosirongwa sokukwama ko.