Esitera, mukadona goMujuda ogu ga kere mositata saSusa, moPeresiya. Epata lyawo kwa li twere Nebukadenesara koupika nomvhura dononzi. Age kwa mu rerere sipwa sendi Moredekayi, mukareli gwahompa Serekesesi.

Hompa Serekesesi kwa here mumbanda gomupe. Makura vakareli vendi tava zi mosirongo va ka mu retere vakadona wovawa, kukwatera mo Esitera. Movakadona owo, hompa kwa horowere mo Esitera a kare mumbanda. Moredekayi kwa tanterere Esitera a dire kulihorora asi Mujuda.

Mugara gedina Hamani, kwa kere minisiteli gomukurona. Age kwa here nkenye ogu a mu tongamene. Nye Moredekayi ga nyokere kumutongamena, ano eyi kwa handukisire Hamani nokuhara kudipaga Moredekayi. Apa Hamani ga ya yi divire asi Moredekayi Mujuda, yipo ga tulire po ewapaiko lyokudipaga Vajuda navenye womosirongo. Ta tantere hompa asi: ‘Vajuda varwanesi, wa hepa kuvazonagura po.’ Serekesesi ta tanta asi: ‘Rugana nkenye eyi ono hara kurugana.’ Makura ta mu pe nonkondo a tulise po veta. Hamani kwa tjangerere vantu mbilive asi va dipage Vajuda navenye momazuva 13 gokwedi kwaAdara. Nayinye eyi Jehova ga yi mwene.

Esitera kapi ga divire veta ozo. Moredekayi yipo ga mu tuminine mbilive ozo, nokumutantera asi: ‘Zende o ka uyunge nahompa.’ Esitera ta tanta asi: ‘Nkenye ogu a zi kwahompa ga hana kumuzigida yige kufa. Ngesi pana piti mazuva 30, hompa kapi ana zigida nge! Nye ngani za. Nsene nga ka zerwira nge mburo zendi, ngani paruka. Nye nsene kapisi ngoso, ngani ka fa.’

Esitera ta zi kwahompa. Apa ga mu mwene hompa, ta mu zerwire mburo zendi. Makura hompa ta pura Esitera asi: ‘Mumbanda, yisinke ono hara?’ Age ta limburura asi: ‘Ame kuna hara hompa naHamani  mu ya kare posipito sange.’ Posipito, Esitera ta va zigida hena kosipito sauvali. Posipito sauvali, hompa ta pura hena asi: ‘Mumbanda, yisinke ono hara?’ Esitera ta tanta asi: ‘Kweli gumwe ana hara kudipaga nge novantu vange. Tu parura.’ Hompa ta mu pura asi: ‘Yilye ana hara kukudipaga?’ Age ta limburura asi: ‘Mugara gomudona ogo, Hamani.’ Serekesesi kwa handukire unene nokutokora va dipage Hamani.

Kwato ogu ga vhulire kugusa po veta ozo ga tulire po Hamani, nampili hompa googu. Makura hompa ta tura Moredekayi a kare minisiteli gomukurona nokumupa nonkondo a tjange veta zompe. Veta ozo kwa pulisilire Vajuda va lipopere vene kononkore dawo. Momazuva 13 gokwedi kwaAdara, Vajuda kwa fundire nonkore dawo. Kutunda opo, awo ngava diworoka ezuva olyo nkenye mvhura.