Apa Nebukadenesara ga twere vantu vemezimo lyouhompa waJuda koBabironi, age kwa tanterere vakwayita vendi va papare mo vamati wononkondo wonondunge mokatji kawo. Vamati owo kwa va dewire nomvhura ntatu. Edeuro olyo kwa va vaterere va kare marenga moBabironi. Nebukadenesara kwa tulire erenga lyendi lyenene, Asipenasi, li va takamese. Vamati va hepere kulironga kuresa nokutjanga nokuuyunga eraka lyoVababironi. Awo kwa va pangerere asi va lye nondya edi nga li hompa novantu womombara zendi. Vamati owo, kwa kere mo vamati vane, Ndaniyera naHananiya naMisayeli ntani Asaliya. Ano Asipenasi ta va ruku madina goSibabironi: Belitesasara naSaduraka  naMesaka ntani Abetenego. Erongo olyo va gwene lya va ninkisire va hageke kukarera Jehova ndi?

Vamati vane kwa tokwere kulimburukwa Jehova. Awo va yi divire asi nokuvhura si kulya nondya edi a li hompa morwa Veta zaJehova kwa tente asi da nyata. Makura tava tantere Asipenasi asi: ‘Kapi natu lya nondya dahompa.’ Age ta va tantere asi: ‘Nsene kapi nomu lya, makura hompa nga mu mone ngwendi tomu vere, nga dipaga nge!’

Ndaniyera ta tantere ogu nga va tarere asi: ‘Tu pa ehidi nomema mazuva murongo. Makura ngo tu hetakanese novamati ava ava li nondya edi a li hompa.’ Ogu nga va tarere ta yi rugana.

Konyima zomazuva murongo, Ndaniyera novakwawo vatatu marutu gawo kwa wepe kupitakana govamati vapeke. Jehova kwa hefe morwa va mu limburukwire. Ta pe Ndaniyera nondunge a faturure mamoneko nononzodi.

Apa lya pwire edeuro, Asipenasi kwa twere vamati kwaNebukadenesara. Makura hompa ta va uyungisa ta mono asi Ndaniyera naHananiya naMisayeli naAsaliya kwa kere nonondunge kupitakana vamati vakwawo. Ta va horowora va rugane mombara zendi. Hompa ngava pura va mu pe ko magano. Jehova kwa va pere nondunge va pitakane vanandunge nonompure nadinye dahompa.

Nampili ngomu va kere mosirongo sapeke, Ndaniyera naHananiya naMisayeli naAsaliya, kapi va divarere asi awo vantu vaJehova. Nove kuvhura o diworoke Jehova nampili kapi ono kara novakurona woge ndi?