Nkenye apa, vantu womoJuda ngava sigi Jehova nokukarera yikarunga yoyimpempa. Jehova ga kondjere kuvavatera nomvhura dononzi. Age nga tumu vaporofete wovanzi va ya va rondore, nye kapi va limburukwire. Awo ngava swaura vaporofete owo. Ngapi Jehova ga hagekesere po ukareli wawo woyikarunga yomafano?

Hompa gwaBabironi, Nebukadenesara kwa fundire yirongo yoyinzi. Sikando sokuhova ga fundire Jerusarema, age kwa kwete hompa Jehoyakini nomarenga novakwayita wononkondo ntani vahambuli, nokuvatwara koBabironi. Age kwa gusire hena maugawo gomontembeli zaJehova. Makura, Nebukadenesara ta tura Sedekiya a kare hompa gwaJuda.

Pomuhowo, Sedekiya kwa limburukwire Nebukadenesara. Nye nomuhoko dopopepi novaporofete woyimpempa tava tantere Sedekiya a rwanese Nebukadenesara. Jeremiya ta mu rondora asi: ‘Nsene to rwanesa, moJuda ngamu kara edipago nerumbu ntani uvera.’

Konyima zokupangera nomvhura ntantatu, Sedekiya kwa tokwere kurwanesa Nebukadenesara. Ta hundire vakwayita woVaegipite va mu vatere. Makura Nebukadenesara ta tumu vakwayita vendi, va ka rwise Jerusarema, tava ya dike notenta dawo pepi nositata. Jeremiya ta tantere Sedekiya asi: ‘Jehova kuna tanta asi nsene o ligava kwahompa gwaBabironi, nove novantu ngano ngomu paruka. Nye nsene o dira kuligava, sitata esi ngava si hwika Vababironi,  ano ove ngava kutwara modorongo.’ Nye Sedekiya ta tanta asi: ‘Na nyoka kuligava.’

Konyima zomvhura noharufa, vakwayita vaBabironi kwa bomwene makuma gositata saJerusarema nokusihwika. Awo kwa hwikire ntembeli nokudipaga vantu ntani tava kwata vantu wovanzi.

Sedekiya ta duka mo moJerusarema, nye Vababironi tava mu tjida. Tava ka mu kwatere pepi naJeliko nokukamureta kwaNebukadenesara. Hompa gwaBabironi ta dipaga vana vaSedekiya komeho zendi. Makura Nebukadenesara ta twiza Sedekiya meho nokumutura modorongo omu ga fililire. Nye Jehova kwa tumbwidilire vantu womoJuda asi: ‘Konyima zonomvhura 70, ngani mu tengwida koJerusarema.’

Yisinke ya horokerere vanona ava va kwete nokuvatwara koBabironi? Va ka limburukwire Jehova ndi?