Tu tareni eyi ya horokere konyima zonomvhura dongandi. Nehemiya mukareli gwahompa Aretaserekesesi, kwa kere Muisraeli ogu ga tungire mositata saSusa, moPeresiya. Mumbyendi gomugara ogu ga tundire koJuda kwa ya mu tanterere mbudi zondona ezi asi: ‘Vantu womoJerusarema ava va tunda koupika kuna kara moudigu. Makuma nomavero gositata aga va zonagwire Vababironi kapi va ga tungurura.’ Eyi kwa guvisire Nehemiya. Age kwa here kuza koJerusarema a ka vatere, yipo ga kandererere asi ngano hompa a mu pulisire a ze.

Konyima , hompa ta dimburura asi Nehemiya ana guwu. Makura ta mu pura asi: ‘Kapi na ku mona rumwe ono guwu. Yisinke ono guvire?’ Nehemiya ta tanta asi: ‘Morwasinke nani dilira kuguva, aso sitata setu Jerusarema va si zonagura?’ Hompa ta mu pura asi: ‘Yisinke ono hara ni ku ruganene?’ Makura, ta kanderere momutjima. Ta tanta asi: ‘Pulisira nge ni ze koJerusarema ni ka tungurure makuma gazo.’ Hompa Aretaserekesesi kwa tanterere Nehemiya asi kuvhura a ze, ntani ga divilisire asi rugendo rwaNehemiya ngano ru wape. Age kwa tulire Nehemiya a kare mupangeli goVajuda nokumupa yitji yokukaruganesa nomuvero domositata.

Apa Nehemiya ga ka sikire koJerusarema, ta konakona makuma gositata. Makura ta pongeke vapristeli novagendesi nokuvatantera asi: ‘Eyi yidona. Twa hepa kutameka kutungurura.’ Vantu va yi kwatesere ko, makura tava tameke kutungurura makuma.

Nye nonkore dawo dimwe kwa va swawire pokutanta asi: ‘Mpili mbanze googu kuvhura a gande ekuma olyo muna kutunga.’ Nye awo kapi va purakenene komaswauro ogo, tava twikire kutungurura. Ekuma tali repa nokupama.

Nonkore tadi tokora kukavarwanesa nokuhomona Jerusarema. Apa va yi zuvhire Vajuda, makura tava tukuka. Nye Nehemiya ta va tantere asi: ‘Mwa ha tjira. Jehova nose ana kara.’ Yipo ga tulire po vanomeni va popere  varugani, ano nonkore kapi da vhulire kuvahomokera.

Makuma nomavero kwa pwire kuyidika momazuva 52. Nehemiya ta twara Varevhi navenye koJerusarema va ka dane sipito sepongoro. Age kwa va tulire monombunga mbali dokudimba. Awo kwa ronderere poyilyatero yepevero lyoRunone, makura tava ligaunuka va kunduruke sitata. Tava fudu nombendo nokusika yiumba noyimburumbumba nokudimbira Jehova. Esira ta zi nombunga zimwe, ano Nehemiya ta zi nonkwawo, navenye tava ka ligwana kontembeli. Vagara novakadi novanona tava gava nonzambo kwaJehova nokumukarera. Ano nzogera zawo zoruhafo kwa zuvhikire nampili koure.