Jehova kwa horowere Jeremiya a kare muporofete govantu womoJuda. Age kwa mu tanterere asi a zuvhisire vantu nokuvarondora va hageke yininke yoyidona. Jeremiya ta tanta asi: ‘Jehova, ame simpe ni munona. Kapi na diva kuuyunga.’ Jehova ta mu tantere asi: ‘Wa ha tjira. Ngani ku tantera eyi ngo uyunga. Ngani ku vatera.’

Jehova ta tantere Jeremiya asi a pongaike masimbi, makura a taure kavaza komeho zawo nokutanta asi: ‘Jerusarema ngava zi zonagura po ngwendi kavaza aka.’ Apa ga rugene Jeremiya eyi ga mu tanterere Jehova, masimbi kwa handukire unene. Mupristeli gedina Pasihuru ta toona Jeremiya nokumumanga. Jeremiya kapi ga vhulire kuligumagura masiku nagenye. Ngurangura, Pasihuru ta mu mangurura. Jeremiya ta tanta asi: ‘Kapi nani twikira hena. Tani hageke kuudisa.’ Nye ga hagekere sili ndi? Hawe. Apa Jeremiya ga gazadarere ko unene, ta tanta asi: ‘Mbudi zaJehova kuna fana ngwendi mundiro guna kutwera mwange. Kapi tani hageke kuudisa.’ Jeremiya ga twikilire kurondora vantu.

Apa pwa pitire nomvhura, tapa kara hompa gomupe moJuda. Vapristeli novaporofete woyimpempa kwa nyengere mbudi zaJeremiya. Tava tantere marenga asi: ‘Mugara ogu ana fire kufa.’ Jeremiya ta tanta asi: ‘Nsene nomu dipaga nge, tomu dipaga mugara ga hana nzo. Ame kuuyunga nonkango daJehova, kapisi danyamwange.’ Apa ga yi zuvhire marenga, ta ga tanta asi: ‘Mugara ogu kapi ana fire kufa.’

Jeremiya kwa twikilire kuudisa,  ano marenga ta ga handuka unene. Tava tantere hompa a dipage Jeremiya. Hompa ta va tantere va rugane Jeremiya nkenye eyi vana hara. Tava gusa Jeremiya va mu zugumine metope lyetata, nokugazara asi ta fire mo. Makura Jeremiya ta tameke kudama metata.

Erenga lyedina Ebedi-mereki tali ka tantera hompa asi: ‘Marenga gana zugumine Jeremiya metope lyetata. Nsene tu mu sigilira, ta fu. Hompa ta pangere Ebedi-mereki a ze novagara 30 va ka koke mo Jeremiya metope. Nose kuvhura tu kare ngwendi Jeremiya ogu ga dilire kupulisira nkenye eyi yi mu hagekese kuzuvhisa ndi?