Hompa gumwe goVababironi kwa kere Daliusi goMumede. Daliusi ga mwene Ndaniyera asi ga likarera. Yipo ga mu tulire a kare mukondi govaforomani mosirongo. Vagara owo kwa fililire mfudu Ndaniyera yipo va here kumudipaga. Awo va yi divire asi Ndaniyera nga kanderere kwaJehova yikando yitatu mezuva, tava tantere Daliusi asi: ‘Tura po mpangera nkenye gumwe a ku kanderere. Nkenye ogu na dira kulimburukwa mpangera ozo tava mu zugumine mekoro lyovanyime.’ Daliusi kwa tambwire egano olyo, makura ta tjanga mpangera ozo.

Tupu ga zuvhire Ndaniyera mpangera ozo, ta zi monzugo zendi. Ago makende gana zeguruka, ta tu nongoro a kanderere kwaJehova. Vagara ava va mu fililire mfudu tava hwilire monzugo zendi tava ka mu gwana kuna kukanderera. Makura tava zi kwaDaliusi nokukamutantera asi: ‘Ndaniyera kapi ana kukulimburukwa. Age kuna kukanderera kwaKarunga gwendi rutatu mezuva.’ Daliusi kwa here Ndaniyera ntani kapi ga here asi a fe. Ezuva nalinye age kwa gazarere omu na popera Ndaniyera. Nye kapi ga vhulire kurundurura mpangera. Ta tumu vagara va ka zugumine Ndaniyera mekero lyovanyime.

 Masiku ogo, Daliusi kapi ga rere morwa sinka kwaNdaniyera. Ngurangura ta menekere kekero ta zigire Ndaniyera asi: ‘Karunga goge ana ku parura ndi?’

Daliusi ta zuvhu ezwi lyaNdaniyera! Ta limburura asi: ‘Jehova ana tumu muengeli gwendi a ya kumateke tuna tovanyime. Yiyo vana dili kukwata nge.’ Daliusi kwa hefe! Ta pangere asi Ndaniyera va mu koke mo mekero. Ndaniyera kapi ga kere nosito. Hompa ta panga asi: ‘Zugumineni vagara ava va rundilire Ndaniyera mekero lyovanyime.’ Apa vagara va va zuguminine mekero, vanyime tava va li.

Daliusi ta gava mpangera asi: ‘Vantu navenye va tjire Karunga gwaNdaniyera. Age kwa poperere Ndaniyera kovanyime.’

Nove kukanderera nkenye ezuva kwaJehova ngwendi Ndaniyera ndi?