Ezuva limwe, Nebukadenesara kwa rotere nzodi zokutjilisa. Azo kwa mu tjilisire makura kapi ga rere. Ta zigida nompure dendi nokuditantera asi: ‘Fatwilireni nge nzodi zange.’ Awo tava tanta asi: ‘Tu tantera nzodi zoge hompa.’ Nebukadenesara ta va tantere asi: ‘Hawe! Tantereni nge eyi kani rotere ndi tani mu dipaga.’ Tava mu tantere hena asi: ‘Tu tantera tupu eyi ko rotere, makura tu ku fatwilire.’ Age ta va tantere asi: ‘One kuna hara kugenda nge yineya. Tantereni nge eyi kani rotere!’ Tava tantere hompa asi: ‘Kwato muntu gokuvhura kurugana eyi ono kupura. Eyi ono kupura yidigu.’

Nebukadenesara ta handuka unene makura ta gava mpangera asi vanadunge navenye va va dipage. Kukwatera mo Ndaniyera naSaduraka naMesaka naAbetenego. Ndaniyera ta pura hompa a mu pe ko siruwo. Makura nage novakwawo tava kanderere va hundire Jehova a va vatere. Yisinke ga rugene ko Jehova?

Memoneko, Jehova ta horwere Ndaniyera nzodi zaNebukadenesara ntani neyi za tente. Ezuva lyokukwama ko, Ndaniyera ta zi komukareli gwahompa nokumutantera asi: ‘Wa ha dipaga vanandunge. Kuvhura ni faturure nzodi zahompa.’ Makura mukareli ta twara Ndaniyera kwaNebukadenesara. Ndaniyera ta tantere hompa asi: ‘Karunga ana ku divisa yokomeho. Ezi yizo nzodi ko rotere: Ove ko mwene efano lyenene lyomutwe gongorodo, nturo nomawoko galyo yosisiliveli, ano ezimo nombunda zalyo yongoporo, maguru galyo gosivera ntani nompadi dalyo dosivera nerova. Emanya eli ka li bamukire kondundu, ka li deye nompadi dosivera sefano. Efano kwa li hanagwire po ngwendi rungu ano mpepo tazi rerura po rungu oro. Emanya ta li nenepa li kare ndundu zonene nokuzwida uzuni naunye.’

 Ndaniyera makura ta tanta asi: ‘Eyi yiyo zina kutanta nzodi: Mutwe gongorodo, uhompa woge. Sisiliveli, uhompa ou ngau kwama ko. Ngoporo uhompa wautatu ou ngau pangera evhu nalinye. Ano uhompa ou ngau kwama ko ngau kara nononkondo ngwendi sivera. Makura ntani ngapa kara uhompa ou ngava gaununa, ruha rumwe ngaru kara nononkondo ngwendi sivera ano rukwawo kapi ngaru kara nononkondo ngwendi erova. Ano emanya eli lya kere kondundu kuna kara Uhompa waKarunga. Awo ngau ya zonagura po mauhompa nagenye nokuyakara dogoro narunye.’

Nebukadenesara ta ligandere pevhu komeho zaNdaniyera. Ta tanta asi: ‘Karunga goge ana ku fatwilire nzodi. Kwato Karunga ga mu fana.’ Mevango lyokudipaga Ndaniyera, Nebukadenesara kwa mu tulire a kare mukurona nomupangeli gwaBabironi. Ono dimburura omu Jehova ga limbwilire ekanderero lyaNdaniyera ndi?