Konyima zapa hompa Nebukadenesara ga rotere nzodi zefano, makura ta rugana efano lyenene lyongorodo. Age kwa li dikire moDura makura ta zigida vantu womulyo mosirongo, kukwatera mo Saduraka naMesaka naAbetenego va ya sikame komeho zefano. Hompa ta gava mpangera asi: ‘Apa nomu zuvha ezwi lyonombendo noyiumba noyisiko peke-peke, tomu tongamene efano! Nkenye ogu na dira kulitongamena tava mu zugumine mesuga lyomundiro gokutwera.’ Yisinke va rugene Vahebeli vena vatatu?

Makura hompa ta pangere va tameke kusika nombendo. Vantu navenye tava tongamene efano, nye Saduruka naMesaka naAbetenego kapi va li tongamenene. Apa va yi mwene vantu makura tava ka tantera hompa asi: ‘Vahebeli vatatu vana nyoka kutongamena efano lyoge.’ Nebukadenesara tava zigida nokuvatantera asi: ‘Tani mu pe siruwo mu tongamene efano. Nsene kapi nomu li tongamena tani mu zugumine mesuga lyomundiro. Kwato Karunga ogu na vhura kumuparura.’ Awo tava limburura asi: ‘Kapi tuna hepa siruwo. Karunga gwetu na tu parura. Nye nampili a dire kutuparura, kapi tatu tongamene efano lyoge.’

Nebukadenesara ta handuka unene. Ta tantere vantu vendi asi: ‘Pyapyarekeni esuga rutano-naruvali kupitakanena!’ Makura ta tantere vakwayita vendi asi: ‘Mangeni vagara ava, mu va zugumine mesuga lyomundiro!’ Esuga kwa pyapyarere unene, apa va hedere ko  vakwayita, tava fu poopo. Vahebeli vatatu tava gwire mesuga lyomundiro. Nye apa Nebukadenesara ga tere momundiro, ta mono vagara vane vana kugendagura momundiro. Age kwa tukukire unene makura ta pura marenga gendi asi: ‘Nani kapisi vagara vatatu katu zugumine momundiro? Ame kuna kumona mo vagara vane, gumwe gwawo kuna kumoneka ngwendi muengeli!’

Nebukadenesara ta hedere kesuga lyomundiro ta zigida asi: ‘Tundeni mo, one vakareli vaKarunga gekeguru-guru!’ Vantu navenye kwa tetukire pokumona Saduraka naMesaka ntani Abetenego kuna kutunda mo momundiro va hana kupya. Sipapa nonohuki dawo ntani yikoverero yawo kapi ya pire, awo hena kapi va nukire musi.

Nebukadenesara ta tanta asi: ‘Karunga gwaSaduraka naMesaka naAbetenego munene. Age kuna tumu muengeli gwendi a ya va parure. Kwato Karunga ga mu fana.’

Nove ono tokomene kuhuguvara mwaJehova ngwendi Vahebeli vatatu nampili momaudigu ndi?