Johanesa, muna Sakaliya naElisabeta, apa ga kulire kwa kere muporofete. Jehova kwa ruganesere Johanesa a ronge vantu ewizo lyaMesiyasa. Age nga zuvhisire momburundu kapisi monosinagoge ndi monodoropa. Vantu kwa tundilire koJerusarema nokoJudeya va ya purakene kwaJohanesa. Age kwa va rongere asi mokuhafesa Karunga, va hepa kuhageka kurugana yininke yoyidona. Konyima zokupurakena kwendi, wovanzi kwa litezwilire kononzo dawo, makura age nga va kuhwire momukuro gwaJorodana.

Johanesa kwa demenene kweyi yomulyo. Age nga dwara sikoverero sonohuki dongameru ntani nga li simbonde nousi womowiza. Vantu kwa here kumona Johanesa. Nampili Vafalisayi noVasadukayi nawo kwa wizire kwendi. Johanesa ta va tantere asi: ‘Mwa hepa kurundurura nkareso zeni nokulitezurura. Mwa ha gazara asi one mwa likarera morwa vana vaAbirahamu. Eyi kapi ayi tanta asi one ngoso vana vaKarunga.’

Wovanzi kwa wizire kwaJohanesa nokumupura asi: ‘Yisinke natu rugana yipo tu hafese Karunga?’ Johanesa ta va limburura asi: ‘Ogu ga kara noyikoverero yivali, a pe ko ogu ana si hepa.’ Ono diva eyi ga uyungilire ngoso ndi? Age kwa here varongwa vendi va dive asi mokuhafesa Karunga, va hepa kuhara vantu.

Johanesa kwa tanterere vafutisi womutero asi: ‘Walye omu futisa yokupitakana pweyi va mu tantera.’ Ta tantere vakwayita asi: ‘Nokuhakana si vantu ndi mu va kumbagere.’

 Vapristeli noVarevhi nawo tava wiza kwaJohanesa nokumupura asi: ‘Nyove yilye? Vantu vana hara kukudiva.’ Age ta va limburura asi: ‘Nyame ezwi lyokuzigira momburundu, nokuwapaikira vantu kwaJehova, ngamoomu ga tente muporofete Jesaya.’

Vantu kwa here eyi ga va rongere Johanesa. Wovanzi kwa gazarere asi Johanesa yige Mesiyasa. Nye age kwa va tanterere asi: ‘Ogu ana kuwiza ga pitakana nge mononkondo. Ame kapi na wapera kuditura tuliva tononkaku dendi. Ame kuna kumukuhwa nomema, nye age nga ya mu kuhwa nompepo zokupongoka.’