Elisabeta kwa kere nekoro lyendi gedina Mariya, ogu ga tungire mositata saNasareta, moGalireya. Mariya kwa mu vandekerere Josefa, muhongi goyikungu. Apa ga kere Elisabeta makwedi ntazimwe nezimo, yipo muengeli Ngabiliyera ga monekerere Mariya. Age ta tanta asi: ‘Moro, Mariya! Jehova ga ku hara unene.’ Mariya kapi ga kwete egano eyi ga tembe muengeli Ngabiliyera. Muengeli ta mu tantere asi : ‘Ove ngo kara nezimo nokuhampuruka munona gomugara, ngo mu ruke Jesus. Age nga pangera ngaHompa. Uhompa wendi kapi ngau haga po.’

Mariya ta limburura asi: ‘Kapi na kara rumwe nomugara, omu ngani gwana munona ngapi?’ Ngabiliyera ta tanta asi: ‘KwaJehova nayinye ureru. Mpepo zokupongoka ngazi ku wizira, makura ngo hampuruke munona gomumati. Ekoro lyoge Elisabeta nage ngesi nezimo ana kara.’ Mariya makura ta tanta asi: ‘Ame mukareli gwaJehova. Yi horokere nge tupu moomu ono tanta.’

 Mariya makura tazi kositata sonondundu a ka dingure Elisabeta. Apa Mariya ga morwere, Elisabeta ta zuvhu mukeke kuna kuvatauka mezimo lyendi. Makura ta zura mpepo zokupongoka, nokutanta asi: ‘Mariya, Jehova ga ku tungika. Ee, erago musinke eli lina gwana nge lyokuwizira nge ugenda zinyaHompa gwange?’ Mariya ta tanta asi: ‘Tani pandura Jehova nomutjima gwange nagunye.’ Mariya ta kara naElisabeta makwedi gatatu ngoso, makura ta tengura kembo lyawo koNasareta.

Apa ga yi dimbwilire Josefa asi Mariya nezimo lyendi, makura ta gazara kumunyoka mokahore-hore. Nye muengeli ta mu monekere monzodi nokumutantera asi: ‘Wa ha tjira kugusa Mariya a kare mukadoge. Kwato yoyidona eyi ga rugana.’ Makura Josefa ta gusa Mariya a kare mukadendi nokumutwara kembo lyendi.