Jesus kapi tupu ga verwire vaveli nokupindura vafe nye hena nga pangere mpepo nomvhura. Apa ga mene kukanderera kondundu, Jesus ta tara mEfuta lyaGalireya nokumona emumpepo. Vapositoli vendi kwa kere mowato, awo kwa kondjere kufunda po emumpepo. Jesus kwa humburukire kondundu nokugenda pomema a wize kowato. Apa vapositoli va mwene muntu kuna kugenda pomema, tava tukuka. Nye Jesus ta va tantere asi: ‘Nyame, mwa ha tjira.’

Peturusa ta tanta asi: ‘Hompa, nsene asi nyove, ninka nge name ni gende pomema ni wize koge.’ Jesus ta tantere Peturusa asi: ‘Wiza!’ Alyo emumpepo kuna kupepa, makura Peturusa ta tundu mowato, ta gendi nage pomema a ze kwaJesus. Ngomu ga hederere pepi, Peturusa ta mono emumpepo kuna kudida, makura ta tukuka. Ta lizuvhu asi kuna kutameka kudama. Peturusa ta zigire asi: ‘Hompa, popera nge!’ Jesus ta gonyonona kuwoko kwendi a mu nyangure, nokutanta asi: ‘O munepurogona ove, wa singanyekera yisinke?’

Jesus naPeturusa tava perama mowato, emumpepo nalyo tali litura. Omu ono kugazara, ngapi va lizuvhire vapositoli? Awo kwa tente asi: ‘Yosili nani o MunwaKarunga.’

Esi kapisi yiso sikando selike Jesus ga pangerere mpepo zi mwene. Posiruwo simwe, apa Jesus novapositoli vendi va rutire efuta va ze mesinya mwina, age kwa ponyokere konyima zowato. Apa ga rere, emukurukundungu tali pinduka. Ano mankumpi taga hompyaukire mowato, dogoro tau hara kuzura mema. Vapositoli tava mu nyungu a pinduke nokuzigira asi: ‘Murongi, tatu lifire! Tu popera!’ Jesus makura ta pinduka, ta kava efuta asi: ‘Mwena tee-te!’ Poopo ngoso, mpepo nefuta tazi litura, tayi mwena tee-tee. Jesus ta va pura asi: ‘Nani simpe ha mwa pilira epuro?’ Awo tava lipuragere vene navene asi: ‘Nampili mpepo nefuta kumulimburukwa.’ Vapositoli va lirongere asi nsene va huguvara mwaJesus, awo kapi ngava tjira nkenye eyi.