Vafalisayi ngava limonekesa. Nkenye yininke yoyiwa ngava rugana, ngava yi ruganene yipo va va mone vantu. Awo ngava kanderere mononzira yipo va va mone. Awo ngava kwata makanderero gomare momutwe ntani nokukanderera monosinagoge nomononzira yipo va va zuvhe. Vantu va tetukire apa Jesus ga va tanterere asi: ‘Walye omu kanderere ngwendi Vafalisayi. Awo kugazara asi Karunga kuvazuvhira morwa unzi wononkango dawo, nye Karunga kapi ava zuvhu. Ekanderero kuna kara pokatji koge naJehova. Walye omu rugurura-rugurura nonkango. Jehova kuna hara o mu tantere kutundilira komutjima.

‘Omu kanderere ngesi asi: “Guhyetu gemeguru. Edina lyoge ava li pongore. Uhompa woge au wize. Mpango zoge ava zi sikise  mo pevhu ngwendi meguru.”’ Jesus kwa va rongere hena asi va hepa kukanderera kuhamena nondya dawo dankenye ezuva, noyininke eyi vana hepa ntani nokuvadongwenena po nonzo dawo.

Jesus kwa tente asi: ‘Mwa ha hageka kukanderera. Twikireni kuhundira Guhyeni, Jehova, yininke yoyiwa. Nkenye mukurona kwa hara kupa munwendi yininke yoyiwa. Nsene munwendi a mu hundira mboroto, kuvhura a mu pe emanya ndi? Ano eyi na mu hundira mfi, kuvhura a mu pe ezoka ndi?’

Makura Jesus yipo ga fatwilire asi: ‘Kumwe nyone mwa diva kupa vana veni yininke yoyiwa, ngaGuhyeni Jehova, yireru pokugava mpepo zokupongoka kwava vana kumuhundira! Eyi twa hepa kurugana, kuhundira.’ Ove kukwama mavyukiso gaJesus ndi? Yininke musinke o tumbura momakanderero goge?