Jesus kwa kere novakaume vendi vatatu ava va tungire moBetani. Awo kwa kere Rasarusa novamumbya vendi wovakadi, Mariya naMalita. Ezuva limwe, apa Jesus ga kere mesinya mwina lyaJorodana, Mariya naMalita tava mu tumine mbudi asi: ‘Rasarusa kuna kuvera unene. Wiza usimbu!’ Nye Jesus kapi ga zire. Jesus ta likaresa kooko mazuva gavali, ano konyima ta tantere varongwa vendi asi: ‘Tu zeni koBetani. Rasarusa kuna ponyoka, nye tani zi ni ka mu pindure.’ Vapositoli tava tanta asi: ‘Nsene Rasarusa kuna ponyoka, na veruka.’ Jesus ta va tantere asi: ‘Rasarusa ana fu.’

Apa Jesus ga ka sikire koBetani, Rasarusa ana kara nare mazuva gane montoko. Vantu wovanzi kwa wizire va ya hengagwide Malita naMariya. Ano Malita apa ga zuvhire asi Jesus ana ya siki, ta mu simbagwire. Makura ta tantere Jesus asi: “Hompa, ngano yipo ko kere, ngano mpanzange kapi ka fire.” Jesus ta mu tantere asi: ‘Mpanzoge na vhumbuka. Malita, ono yi pura eyi ndi?’ Malita ta mu limburura asi: ‘Na yi diva asi nga vhumbuka pezuva lyevhumbuko.’ Jesus ta mu tantere asi: “Nyame evhumbuko nomwenyo.”

Malita makura ta zi a ka zigide Mariya nokumutantera asi: ‘Jesus ana ya siki.’ Mariya ta katuka usimbu a ze kwaJesus, ano mbunga tazi mu kwama. Mariya ta tu nongoro kosipara saJesus, oku ta lili. Age ta tanta asi: ‘Hompa, ngano yipo ko kere, ngano mpanzange kapi ka fire.’ Apa Jesus ga mwene Mariya kuna kulira, nage ta tameke kulira. Apa mbunga za mwene Jesus kuna kulira, tazi tanta asi: ‘Tara omu ga here Rasarusa.’ Nye vamwe tava lipura asi: ‘Eyi yokuninka asi kaume kendi ga ha fa yiyo nayi mu vhura po ndi?’ Yisinke ga rugene ko Jesus?

Jesus ta zi kontoko, oku va zedilire emanya lyenene. Age ta tanta asi: ‘Guseni ko emanya!’ Malita ta mu tantere asi: ‘Eli ezuva lyaune ana kara montoko. Apa ana kara kuna kunuka.’ Awo makura tava gusa ko emanya, Jesus ta kanderere asi: ‘Tate, tani ku pandura,  morwa ove kuzuvha nge. Na yi diva asi ove kuzuvha nge nkenya apa, yiyo nina kuuyungira eyi, nkumwe vantu va pure asi nyove wa tuma nge.’ Makura ta zigire nezwi lyenene asi: “Rasarusa, pwaga mo!” Va liharuka ko, Rasarusa kuna kupwaga montoko, age kuna mu dingire makehe. Jesus ta va tantere asi: “Mu dingununeni a ze.”

Wovanzi ava va mwene eyi ya horokere, tava pura mwaJesus. Nye vamwe po tava zi va ka yi tantere Vafalisayi. Kutunda kezuva olyo, Vafalisayi ngava liyongo asi va dipage Rasarusa naJesus. Gumwe powo murongo 12 gedina Judasa Isikalyoto, ta zi koVafalisayi nokuvapura asi: ‘Yisinke ngomu pa nge, nsene ni mu horwera Jesus?’ Awo tava mu futu yimaliwa 30 yosisiliveli, makura ta papara mpito zongwa zokuhorora Jesus koVafalisayi.