Konyima zoPaska, Jesus novarongwa vendi kwa pitire moSamaliya apa va tengwire koGalireya. Jesus kwa pwizumukire pondjombo zaJakopo, pepi nositata saSikara. Ano varongwa vendi kwa zire kositata va ka rande nondya.

Makura pondjombo ta pa wiza mukadi gumwe a ya vhete mema. Jesus ta mu hundire asi: ‘Kwafeni nge ko mema ni nwe.’ Mukadi ta limburura asi: ‘Morwasinke muna kuuyungisira nge? Ame Musamaliya. Amesi Vajuda kapi ava uyunga noVasamaliya.’ Jesus ta mu tantere asi: ‘Nganosi kuna diva ogu ana kuuyunga none, ngano none muna mu hundire mema ano age ngano ana mu pe mema gomwenyo.’ Mukadi ta pura asi: ‘Yisinke muna tamba? One kapi muna kara hena nosipako.’ Jesus ta mu limburura asi: ‘Nkenye ogu gokunwa mema aga gokumupa ame, narumwe si hena kufa enota.’ Mukadi ta mu tantere asi: “Tate, kwafeni nge nye mema ogo no.”

Jesus ta mu tantere asi: ‘Ka zigideni mugara gweni.’ Age ta limburura asi: ‘Ame kapi na kara nomugara’. Jesus ta mu tantere asi: ‘Hawe yimo, yeeyi one vagara vatano mwa kere nawo, nye ogu muna hingire nendi ngesi, kapisi mugara gweni.’ Mukadi ta tanta asi: ‘Nina mu mono asi one mu vaporofete. Vantu vange kwa pura asi kuvhura tu karere Karunga kondundu ezi, nye Vajuda kutanta asi moJerusarema yimo tupu mwelike natu vhura kumukarera. Na yi pura asi apa nga wiza Mesiyasa, nga ya tu ronga omu natu karera  Karunga.’ Makura Jesus ta mu tantere eyi ga dilire kutantera nkenye muntu asi: ‘Nyame Mesiyasa.’

Mukadi makura ta zi kositata, ta ka tantera vaSamaliya asi: ‘Nampo nina gwana Mesiyasa. Age ga diva nayinye kuhamena nge. Tu zeni mu ka mu tare!’ Makura tava mu kwama nokukapurakena kweyi ga rongere Jesus.

Vasamaliya tava zigida Jesus a ka kare nawo. Jesus kwa kere nawo mazuva gavali nokuvaronga, ano vantu wovanzi kwa pulire mwendi. Vasamaliya tava tantere mukadi asi: ‘Kuliza neyi tuna zuvhu kwendi, ngesi tuna yi pura asi nani yige sili Muzowoli gouzuni.’