Vapristeli tava twara Jesus kembo lyomupangeli. Piratusa ta va pura asi: ‘Nzo musinke muna kumupangwira muntu ogu?’ Awo tava limburura asi: ‘Age kutanta mwene asi yige Hompa!’ Makura Piratusa ta pura Jesus asi: ‘Nani ove hompa goVajuda?’ Jesus ta limburura asi: “Uhompa wange kapisi wouzuni ou.”

Piratusa ta tumu Jesus kwaHerodesa, mupangeli gomoGalireya, a ka tare nsene na ka gwana mo unzoni mwendi. Nye Herodesa kapi ga ka gwene mo unzoni mwaJesus, yipo ga mu tengwidire kwaPiratusa. Piratusa ta tantere vantu asi: ‘NaHerodesa si kapi ana ka gwana mo unzoni mogu mugara. Tani mu sigi a ze.’ Mbunga tazi zigire asi: ‘Mu dipaga! Mu dipaga!’ Makura vakwayita tava toona Jesus oku tava mu fizire nokumuzundagura. Tava mu tura nkata zomega komutwe, oku tava mu zoro nokutanta asi: ‘Moro, hompa goVajuda!’ Piratusa ta tantere mbunga asi: ‘Kapi nina gwana mo nzo mogu mugara.’ Nye simpe tava zigire asi: ‘Mu pampara kositji!’ Piratusa ta gava Jesus va ka mu pampare.

Awo tava twara Jesus kevega eli ngava tumbura asi Gorogata, tava mu pampara kositji, tava si zerura. Jesus ta kanderere asi: ‘Tate, va dongwenena po, yeeyi kapi vana diva eyi vana kurugana.’ Vantu tava mu zoro, tava mu tantere asi: ‘Nsene asi ove MunwaKarunga, tunda ko kositji! Liparura sa nyamoge.’

Mukorokotji gumwe ogu va mu pamparere nage ta mu tantere asi: “Diworoka nge nsene ngo za moUntungi woge.” Jesus ta mu tumbwidire asi: ‘Ngo ka kara name moParadisa.’ Eyi za sikire vili zomutwekatji, mosirongo mudima tamu kara ekurundema novili ntatu. Varongwa vendi vamwe tava sikama pepi nositji, kukwatera mo Mariya zinyaJesus. Makura Jesus ta tantere Johanesa a pakere mbili Mariya ngwendi ozina.

Moruhura, Jesus ta tanta asi: “Yina siki mo!” Ta nyongeke mutwe gwendi, makura tagu pu mo. Poopo ngoso, evhu tali kankama unene. Ekehe lyomontembeli eli lya teta pokatji koNzugo zokupongoka  nezi zokupongokerera tali tauka pavali kutunda keguru dogoro pevhu. Mupitisili govakwayita ta tanta asi: ‘Yosili nani MunwaKarunga ga kere.’