Apa Jesus ga kere novapositoli vendi monzugo zekeguru, age kwa va tanterere asi: ‘Masiku ganaina, namuvenye tomu ka zumba nge.’ Peturusa ta tanta asi: ‘Nampili navenye va ka ku zumbe, ame nokukuzumba si.’ Nye Jesus ta tantere Peturusa asi: ‘Masiku ganaina sikondomboro sa hana kuziga, ove nare ono patana nge rutatu.’

Apa vakwayita va kwete Jesus nokumutwara kembo lyaKayifasa, sinzi sovapositoli kwa dukire. Nye vapositoli vavali kwa kweme mbunga. Gumwe gwawo, Peturusa. Age kwa zire ta ka sika meharango lyembo lyaKayifasa makura ta hingire komundiro a lidurure. Mukareli gomukadi kwa mwene tupu Peturusa, makura ta tanta asi: ‘Na ku diva! Nove kwa kere naJesus!’

Peturusa ta tanta asi: ‘Ame eyi ono kutanta, kapi nina kuyizuvha.’ Makura ta zi kevero. Ano mukareli gumwe gomukadi ta mu mono nokutantera mbunga asi: ‘Ogu mugara nage kumwe naJesus ga kere!’ Peturusa ta tanta asi: ‘Ndangame ame, muntu ogu kapi na mu diva!’ Mugara gumwe ta tanta asi: ‘Yosili nove kwaJesus wa hamena, yeeyi ruuyungo roge kuna kulitanta asi nove o Mugalireya.’ Nye Peturusa ta gana asi: ‘Ndangame ni mu dive!’

Poopo ngoso, sikondomboro tasi zigi. Jesus makura ta piruka a tare Peturusa. Peturusa ta diworoka nonkango daJesus, ta pwaga, ta ka lira makurulira.

Kutunda opo, wosigongi somasimbi tava gusa Jesus va mu tware membo lyaKayifasa va ka mu pangure. Awo kwa tokwere mokudipaga Jesus, yipo va paparere umbangi wokumudipagesa. Nye kapi va u gwene. Konyima, Kayifasa ta pura Jesus asi: ‘Ove MunwaKarunga ndi?’ Jesus ta limburura asi: ‘Nhi.’ Kayifasa ta tanta asi: ‘Ana swaura Karunga. Nombangi dasinke hena natu hepeni?’ Mbunga ta zi limburura asi: ‘Dina mu fire nomfa!’ Awo tava toona Jesus  nonkusi nokumufizagera mazeze, nokumukudumika komeho oku tava mu toona nononyongo nokutanta asi: ‘Nsene o muporofete, tu tantera asi, yilye ogu ana ku toona!’

Apa lya sire ezuva, tava twara Jesus kosigongi somasimbi nokukamupura hena asi: ‘Ove ngoso MunwaKarunga ndi?’ Jesus ta va limburura asi: ‘Muna yi tanta sa asi nyame.’ Tava mu tokwere usima wokuswaura Karunga, makura tava mu twara kombara zaPontiusi Piratusa, mupangeli goVaroma. Yisinke ya kweme ko? Natu ka yi gwana mosirongwa sokukwama ko.