Timoteusa kwa kere mudinkantu mombungakriste zomoLisitira. Oguhwe Vagereka, ano ozina Vajuda. Ozina Eunike nozinakuru wovakadi Roise kwa mu rongere kuhamena Jehova kutunda unona wendi.

Apa Paurusa ga ka dingwire Lisitira, ta dimburura asi Timoteusa ga here vapuli vakwawo ntani ga here kuvavatera. Paurusa kwa tanterere Timoteusa va ze kumwe. Mwaza siruwo, Paurusa kwa ya dewire Timoteusa a kare muzuvhisi nomurongi gombudi zongwa.

Mpepo zokupongoka kwa pitisilire Paurusa naTimoteusa nkenye oku ngava zi. Esiku limwe, Paurusa kwa mwene emoneko asi Mumakedoniya ana ya mu sikamene a mu hundire ekwafo. Paurusa naTimoteusa naSirasa naRukasa makura tava zi va ka udise nokukatulisa po nombungakriste.

MoMakedoniya sitata saTesaronika, vagara novakadi wovanzi kwa ya kere Vakriste. Nye Vajuda vamwe kwa zuvhilire mfudu Paurusa novakwawo. Awo kwa zedagwilire mbunga zi tware Paurusa novakwawo kovapangeli wositata nokuzigira asi: ‘Vagara ava nonkore dahompa gwaRoma!’ Paurusa naTimoteusa kwa kere mosiponga, makura masiku tava dukire koBereya.

Vantu womoBereya kwa here kudiva mbudi zongwa, makura tava kara vapuli. Nye apa Vajuda vamwe va tundire koTesaronika va ya va yoronganese, Paurusa ta zi koAtena. Timoteusa naSirasa kwa kere moBereya va kondopeke vapuli vakwawo. Mwaza siruwo, Paurusa ta tumu Timoteusa koTesaronika a ka kwafe vapuli vakwawo va lididimikire maheteko gomanene. Konyima, Paurusa ta tumu Timoteusa a ka dingure nombungakriste nokukadikorangeda.

 Paurusa ta tantere Timoteusa asi: ‘Ava va hara kukarera Jehova ngava va hepeka.’ Timoteusa nage kwa mu hepekere nokumutura modorongo morwa epuro lyendi. Age kwa hefe morwa ga likidire ulimburukwi wendi kwaJehova.

Paurusa ta tantere Vafilipi asi: ‘Tani mu tumine Timoteusa. Age nga ya mu ronga eyi ayi tanta kugenda mousili, ntani nga ya mu deura kuzuvhisa.’ Paurusa ga yi divire asi kuvhura a huguvare Timoteusa. Awo ngava ruganene kumwe ngovakaume nomvhura dononzi.