Mosesa naArona kwa zire va ka tantere Farawo mbudi zaKarunga ezi asi: ‘Nsene kapi ono kusiga vantu vange va ze, ngani tuma nondi dokuhuma mosirongo.’ Momambo goVaegipite kwa zulire nondi dokuhuma, va kare vahepwe ndi nongawo. Sirongo nasinye kwa zulire nondi dokuhuma. Nye moGoseni, omu va tungire Vaisraeli, amo kapi da kere mo. Kutundilira pehepeko lyaune, mahepeko aga ga kweme ko kwa kundamene tupu Vaegipite. Farawo ta lihenge kwaMosesa asi: ‘Kanderera kwaJehova a guse nondi mosirongo. Makura Vaisraeli va ze.’ Nye apa Jehova ga gusire mo nondi dokuhuma, Farawo ta tjindji magano gendi. Farawo ga lirongerere ko ndi?

Jehova ta tanta asi: ‘Nsene Farawo kapi na siga vantu vange va ze, yimuna yoVaegipite ngayi vera nokufa.’ Ezuva eli lya kweme ko, yimuna tayi tameke kufa. Nye yoVaisraeli kapi ya fire. Farawo simpe kapi ga sigire Vaisraeli va ze.

Makura Jehova ta tantere Mosesa a tengwire kwaFarawo nokukazuguma rudirangungu meguru. Mbundu zorudirangungu oro kwa zulire mosirongo nasinye saEgipite. Aro kwa reterere Vaegipite noyimuna yawo masina gokukora. Nampili ngoso, Farawo kwa nyokere kusiga Vaisraeli.

Jehova ta tumu hena Mosesa kwaFarawo nombudi ezi asi: ‘Simpe ha wa nyokera kusiga Vaisraeli  va ze ndi? Mungura, ngani rokesa mvhura zakamanya mosirongo.’ Ezuva eli lya kweme ko, Jehova ta tumu kamanya nomaruvadi ntani nomundiro. MoEgipite kapi mwa kara rumwe mvhura zakamanya zangoso. Azo kwa zonagwire yitji noyimeno nayinye, nye kapi za zonagwire yomoGoseni. Farawo ta tantere Mosesa asi: ‘Kanderera kwaJehova a hagekese po kamanya! Makura ngo mu ze.’ Apa mvhura zakamanya za hege, Farawo ta nyoka hena kusiga Vaisraeli.

Mosesa ta tantere Farawo asi: ‘Ngesi simbonde ngaya lya yimeno eyi ga hupisa po kamanya.’ Simbonde kwa lire yimeno nayinye yomomapya. Farawo ta lihenge kwaMosesa asi: ‘Kanderera kwaJehova a hagekese po simbonde.’ Apa Jehova ga hagekesere po simbonde, Farawo simpe ta nyoka hena kusiga Vaisraeli.

Jehova kwa tanterere Mosesa asi: ‘Lika kuwoko koge keguru.’ Poopo ngoso, emundema tali wiza. Alyo kwa kere ure womazuva gatatu moEgipite, ano nagumwe si ga vhulire kumona. Nye Vaisraeli awo kwa kere mouzera.

Farawo ta tantere Mosesa asi: ‘Nove novantu woge zendeni. Nye yimuna yeni tayi kara.’ Mosesa ta tanta asi: ‘Noyimuna yetu tatu zi nayo yipo ngatu ka zambere Karunga gwetu.’ Farawo kwa handukire unene. Makura ta haruka asi: ‘Tunda po apa! Nsene ngo ka wiza ko hena, ngani ya kudipaga.’