Apa ga kere Josefa modorongo, hompa goVaegipite Farawo, kwa rotere nzodi ezi za kere udigu kufaturura. Mukareli gumwe gwaFarawo ta mu tantere asi Josefa kuvhura a faturure nzodi zoge. Makura Farawo ta tumu mukareli gwendi a ka rete Josefa.

Farawo ta pura Josefa asi: ‘Kuvhura o faturure nzodi zange ndi?’ Josefa ta limburura asi: ‘Nomvhura ntambali moEgipite ngamu kara nondya dononzi, konyima zoyo ngaku kwama hena nomvhura ntambali donzara. Horowora nye mugara gonondunge a pongaike nondya yipo vantu ngava dire kufa nzara.’ Farawo ta limburura asi: ‘Nyove nina horowora! Ntani nyove ngo pangera Egipite!’ Yilye ga vaterere Josefa a faturure nzodi zaFarawo? Jehova.

Monomvhura ntambali, Josefa kwa pongaikire nondya dononzi. Moomu ga yi uyungire Josefa, nzara kwa kere mosirongo nasinye. Vantu ngava wiza va ya rande nondya kwaJosefa. Oguhwe Jakopo apa va zuvhire asi moEgipite nondya mo, tava tumu vana vawo murongo va ka rande nondya.

Vana vaJakopo kwa zire kwaJosefa, ogu ga va dimbwilire. Nye vakuru vendi kapi va mu dimbwilire. Awo kwa tongamenene Josefa ngamoomu tupu ga yi rotere apa ga kere munona. Josefa kwa here kudiva nsene vakuru vendi va siga nkareso zomfudu. Makura tava tantere asi: ‘One vakorokotji, kuna wiza mu ya tare sirongo ngomu ya tu rwise.’ Awo tava limburura asi: ‘Hawe! Ose kwa kere 12. Gumwe ga fa, ano gomunona po kweli kotate koKanani.’ Makura Josefa tava tantere asi: ‘Ngomu ka rete mumbyeni gomunona po, ntani ngani ya yi pura.’ Awo makura ta va tengura kembo.

Apa da ka pwire nondya, oguhwe Jakopo tava va tumu hena koEgipite. Sikando esi, awo kwa zire namumbyawo gomunona po Mbenyameni. Mokuheteka vakuru vendi, Josefa ta tura nkinda zendi zosisiliveli monsako zaMbenyameni zonondya nokumurundira asi yige ana zi vaka. Apa vakareli vaJosefa va gwene nkinda ozo monsako zaMbenyameni, vakuru vendi kwa tukukire. Makura tava lihenge Josefa asi a sige Mbenyameni.

Makura yipo Josefa ga yi dimbwilire asi vakuru vendi va siga nkareso zawo zanare. Josefa ya mu vhulire kulididimikira. Makura ta vareke kulira nokutanta asi: ‘Nyame mumbyeni Josefa! Otate poveli ndi?’ Vakuru vendi kwa tetukire. Age tava tantere asi: ‘Mwa ha lizuvha udona kweyi mwa rugana nge. Karunga yige ga tuma nge oku ni ya mu parure. Zendeni usimbu mu ka rete otate.’

Awo yipo va zire kembo nokukatantera guhyawo ntani nokukamureta koEgipite. Makura Josefa noguhwe tava tungu hena kumwe.