Mosesa kwa tungire moMidiyani nomvhura 40. Ta kwara nokukara novanona. Ezuva limwe apa ga ka lisilire nonzwi pepi noNdundu zaSinayi, age kwa mwene emoneko. Sinhwa sina kutwera mundiro, nye kapi sina kupya. Apa Mosesa ga hedere pepi a tare eyi yina kuhoroka, ta zuvhu ezwi lina kutunda mosinhwa lina kutanta asi: ‘Mosesa! Wa ha heda pepi. Hutura ko nonkaku yeeyi evega eli ono kara kwa pongoka.’ Jehova yige ga uyungire nage kupitira momuengeli.

Mosesa kwa tjilire, makura ta kudumike sipara sendi. Ezwi tali tanta asi: ‘Ame nina mono ruhepo roVaisraeli. Ngani va zowora mo moEgipite nokuvatwara kosirongo sosiwa. Ove nyove ngo pitisira vantu vange va tunde mo moEgipite.’ Oyo ya tetukisire Mosesa, ndi ngapi?

Mosesa ta pura asi: ‘Yisinke nani ka tantera vantu apa nava ka pura nge asi yilye ana tumu nge?’ Karunga ta limburura asi: ‘Ka va tantere asi Jehova, Karunga gwaAbirahamu naKarunga gwaIsaka naKarunga gwaJakopo yige ana tumu nge.’ Makura Mosesa ta tanta asi: ‘Ngapi nsene vantu nava ka nyoka kupurakena nge?’ Jehova kwa pere Mosesa sidiviso esi ngasi mu vatera. Ta tantere Mosesa a zugumine siuro sendi pevhu. Makura ta si lisitunuka ezoka! Apa Mosesa ga kwete ezoka komusira, makura tasi kara hena siuro. Jehova ta mu tantere asi: ‘Apa ngoka rugana sitetu esi, awo ngava ka yi pura asi nyame nina ku tumu.’

Mosesa ta tanta asi: ‘Ame kapi na diva kuuyunga nawa.’ Jehova ta mu tumbwidire asi: ‘Ame ngani kutantera eyi ngo ka uyunga, ntani ngani tuma mukuroge Arona nga ka ku vatere.’ Apa Mosesa ga divire asi Jehova nga mu vatera, ta gusa mukadendi novana vendi wovagara vavali makura ta tengura koEgipite.