Apa Mosesa ga kere koNdundu zaSinayi, Jehova kwa mu tanterere a tunge nkongoronzugo ezi ngava ruganesa Vaisraeli mokukarera Jehova. Awo va hepere kuzisimba nsene tava diruka.

Jehova ta tantere Mosesa asi: ‘Tantera vantu va gave yigava yipo mu tungise ko nkongoronzugo.’ Vaisraeli kwa geve ngorodo nosisiliveli nongoporo noyimbilingwa. Awo kwa geve hena nohuki dononzwi noyipapa yoyikorama ntani noyininke yimwe. Awo kwa geve yoyinzi dogoro Mosesa ta va tantere asi: ‘Yina gwaneke, hagekeni kugava.’

Vagara novakadi ava va kere noudivi kwa vaterere kutunga nkongoronzugo. Jehova kwa va pere nondunge va sikise mo sirugana oso. Vamwe kwa honzere makehe. Ano vamwe kwa hongere mamanya noyitji ntani kwa hambwire ngorodo.

Vantu kwa tungire nkongoronzugo moomu ga va tanterere Jehova. Awo kwa rugene ekehe eli va tulire monkongoronzugo pokatji kevega lyokupongoka neli lyokupongokerera. Mevega lyokupongokerera kwa kere mo sikesa segwanekero esi va ruganesere koyitji nokongorodo. Ano mevega lyokupongoka kwa kere mo ramba nositafura ntani sizambero seyi yedumba lyewa. Meharango kwa kere mo siyaha songoporo ntani sizambero sosinene. Sikesa segwanekero kwa diworokesere Vaisraeli etumbwidiro lyawo lyokulimburukwa Jehova. Wa diva asi yisinke egwanekero ndi? Alyo kuna kara etumbwidiro lyokulikarera.

 Jehova kwa horowere Arona novana vendi va rugane monkongoronzugo ngovapristeli. Awo va hepere kuzipakera mbili nokuzamba nonzambo kwaJehova. Arona, mupristeli gomunene, gelike va pulisilire kuhwilira mevega lyokupongokerera. Age nga hwilire mo rumwe momvhura yipo a ka gave nzambo zononzo dendi nedi dovana vendi ntani doVaisraeli navenye.

Vaisraeli kwa mene kutunga nkongoronzugo momvhura zimwe, kutunda apa va tundire moEgipite. Awo va kere nevango lyokukarera Jehova.

Jehova kwa zwidire nkongoronzugo nouyerere wendi, ano eremo ngali kara keguru lyazo. Apa eremo ngali kara peguru lyonkongoronzugo, Vaisraeli kapi ngava diruka. Nye apa eremo ngali tundu po, makura tava diruka. Awo ngava zungurura nkongoronzugo nokukwama eremo.