Josuwa kwa pitisilire vantu vaJehova nomvhura dononzi, makura ta ya fu age nonomvhura 110. Siruwo esi ga parukire, Vaisraeli kwa karerere Jehova. Nye apa ga fire, tava tameke kukarera yikarunga yoyimpempa ngwendi Vakanani. Jehova yipo ga pulisilire hompa goVakanani Jabini a va hepeke. Vantu kwa hundilire Jehova a va kwafe. Jehova yipo ga va pere mupitisili gomupe Baraka. Ogu ga vaterere vantu va tengure kwaJehova.

Debora muporofete gomukadi kwa zigidire Baraka. Age kwa kere nombudi za tundire kwaJehova asi: ‘Zende novagara 10 000 mu ka rwe novakwayita vaJabini pomukuro gwaKisoni. Oko yiko no ka fundira Sisera mupitisili govakwayita vaJabini.’ Baraka ta limburura asi: ‘Ntudi tatu zi nove.’ Makura Debora ta tanta asi: ‘Nawa tupu, nani za nove. Nye diva asi kapisi nyove no ka dipaga Sisera. Jehova kuna tanta asi mukadi na ka mu dipaga.’

Debora kwa zire naBaraka ntani novakwayita vendi kondundu zaTaboro va ka liwapaikire yita. Apa ga yi zuvhire Sisera ta pongaike yikarukara yoyita novakwayita vendi momuramba pepi  nondundu zaTaboro. Debora ta tantere Baraka asi: ‘Naina Jehova ta ku pe efundo.’ Baraka novakwayita vendi 10 000 tava tundu ko kondundu va ka rwe novakwayita wononkondo vaSisera.

Jehova ta ninkisa mukuro gwaKisoni gu zure mema. Yikarukara yoyita yaSisera kwa patamenene metata. Sisera ta sigi karukara kendi a duke. Baraka novakwayita vendi va fundire vakwayita vaSisera, nye Sisera ta henduka. Ta ka vanda motenta zomukadi gedina Jayeli. Ta mu pe masini ta nu, makura ta mu kudumike nguwo. Makura Sisera ta ponyoka. Jayeli ta gusa ntungo nohamara ta zi pampara momutwe gwaSisera, makura ta fu.

Baraka ta wiza a ya papare Sisera. Jayeli ta tantere Baraka asi: ‘Hwilira, ni ku likide mugara ogu ono kupapara.’ Baraka ta hwilire ta mono Sisera ana fu. Baraka naDebora kwa dimbire rusumo va hamberere Jehova morwa ga va vaterere va funde nonkore dawo. Nomvhura 40 edi da kweme ko, Vaisraeli kwa kere mombili.