Jehova kwa tanterere Samwere asi: ‘Zende kembo lyaIsayi. Munwendi gumwe gomugara yige nga kara hompa goVaisraeli.’ Samwere yipo ga zire kembo lyaIsayi. Samwere apa ga mwene munaIsayi gombeli, ta gazara asi: ‘Nampo yige googu ga horowora.’ Nye Jehova ta tantere Samwere asi kapisi yige. Jehova ta tanta asi: ‘Muntu kumona eyi aga mono meho, nye ame kumona momutjima.’

Isayi ta pitisa hena vana vendi ntazimwe komeho zaSamwere. Nye Samwere ta tanta asi: ‘Jehova kwato ogu ga horowora pwava. Vana woge wovagara ava huru vaava ndi?’ Isayi ta tanta asi: ‘Pweli gumwe hena mumbyawo gomunona po, Ndafita. Age kuna ka lisa nonzwi.’ Apa Ndafita ga wizire, Jehova ta tantere Samwere asi: ‘Yige googu!’ Makura Samwere ta tjire magadi pomutwe gwaNdafita, a mu gwaveke nga kare hompa goVaisraeli.

Vaisraeli kwa rwire yita noVafilisiti, ava va kere nependa eli lya va rwililire po lyedina Golyata. Nkenye ezuva, Golyata nga swaura Vaisraeli. Age ta zigire asi: ‘Tumineni nge mugara ogu natu ya rwa nage. Nsene na ya funda, ose ngatu kara vapika veni. Nye nsene nani ya funda, one ngomu kara vapika vetu.’

Ndafita kwa wizire kokamba zovakwayita woVaisraeli a retere nondya vakuru vendi, ava va kere vakwayita. Age ga zuvhire Golyata makura ta tanta asi: ‘Tani ka rwa nage!’ Hompa Sauru ta mu tantere asi: ‘Simpe o munonagona.’ Ndafita ta limburura asi: ‘Jehova na vatera nge.’

 Sauru ta hetekere ko kupa Ndafita yirwiso yendi, nye Ndafita ta tanta asi: ‘Ame kapi tani vhuru kurwisa yirwiso eyi.’ Ndafita ta gusa sizugumiso sendi makura ta zi kokamukurogona. Ta ka gusa mo tumanya tutano, ta tu tura mondjato zendi. Ndafita makura ta hedere Golyata. Golyata ta zigire asi: ‘Wiza oku mumatigona. Ame tani ya gava nyama zoge koyidira nokoyikorama.’ Ndafita kapi ga tjilire. Ta limburura asi: ‘Ove kuna kuwiza kwange norufuro nomukove, nye ame tani wiza koge medina lyaKarunga, Jehova. Ove kapisi nyose ono kurwisa, nye kuna kurwisa Karunga. Nkenye gumwe na yi mona asi Jehova ga kara nononkondo kupitakana rufuro ndi mukove. Jehova ta ku gava momawoko getu.’

Ndafita ta tura mo kamanya mosizugumiso makura ta ka zuguma nononkondo. Nevatero lyaJehova, kamanya ta ka kwata Golyata mosipara makura ta ka hwilire. Golyata ta ligandere pevhu ta fu. Makura Vafilisiti tava duka. Nove wa huguvara mwaJehova ngwendi Ndafita ndi?