Jehova kwa pere Vaisraeli vapanguli va va pitisire, nye awo kwa here hompa. Awo kwa tanterere Samwere asi: ‘Nomuhoko nadinye edi da tu kundurukida kwa kara novahompa. Nose tuna hara hompa.’ Samwere kwa lizuvhire asi mepuko va kere, yipo ga kanderere kwaJehova kuhamena yininke oyo. Jehova ta tantere Samwere asi: ‘Vantu kapisi nyove vana nyoka. Nye nyame vana nyoka. Va tantera asi awo kuvhura kukara nahompa, nye hompa ogo nga pura ko kwawo yininke yoyinzi.’ Nye Vaisraeli tava tanta asi: ‘Ose kuna hara hompa!’

Jehova kwa tanterere Samwere asi mugara gedina Sauru yige nga kara hompa gokuhova. Apa Sauru ga zire kwaSamwere moRama, Samwere ta gwaveke Sauru a kare hompa pokumutjira magadi pomutwe gwendi.

Konyima, Samwere ta zigida Vaisraeli va ponge a va likide hompa gwawo gomupe. Nye kapi va mu gwene. Ono diva asi morwasinke? Morwa kwa vende mokatji konomurongero. Apa va mu gwene Sauru, yipo va mu retere nokumusikameka mokatji kovantu. Sauru kwa kere gomure kupitakana navenye, ntani kwa kere mugara gomuwa. Samwere ta tanta asi: ‘Ogu yige mugara ana horowora Jehova.’ Vaisraeli tava zigire asi: ‘Hompa a kare nomwenyo gomure!’

Pomuhowo, hompa Sauru nga purakene kwaSamwere nokulimburukwa Jehova. Konyima ta litjindji. Pasihonena, hompa kapi va mu pulisilire a zambe nzambo. Posiruwo simwe, Samwere kwa tanterere Sauru a mu ndindire, nye Samwere kapi ga wizire usimbu. Yipo Sauru ga tokwere kuzamba nzambo. Yisinke ga ya rugene ko Samwere? Age kwa mu tanterere asi: ‘Kapi ono limburukwa kompangera zaJehova.’ Sauru ga lirongerere ko kepuko lyendi ndi?

Apa Sauru ga ka rwire noVaamareki, Samwere kwa tanterere Sauru asi ga hepa kukadipaga navenye. Nye Sauru kapi ga dipagere hompa goVaamareki, Agaga. Jehova kwa tanterere Samwere asi: ‘Sauru ga zumba nge, ntani kapi ana kupurakena kwange.’ Samwere  kwa guvire unene ta tantere Sauru asi: ‘Morwa ono hageke kukarera Jehova, nga horowora ko hompa nage peke.’ Apa ga pirukire Samwere asi a ka ze, Sauru ta mu kwata kosikoverero makura sikoverero saSamwere tasi tauka. Samwere ta tantere Sauru asi: ‘Jehova ana taura ko uhompa koge.’ Jehova kwa geve uhompa kwagumwe ogu ga mu limburukwire nokumuhara.