Jesebeli kwa handukire unene, apa ga zuvhire asi vaporofete vaBara vana va dipaga. Yipo ga tuminine Eliya mbudi ezi asi: ‘Mungura, ngani kudipaga moomu ono dipaga vaporofete vaBara.’ Eliya tau mu kwata woma makura ta dukire momburundu. Ta kanderere asi: ‘Jehova, yina pitakanene nye. Ninka nge ni fe.’ Morwa eroroko, Eliya ta rara mositji.

Muengeli ta mu pindura nokumutantera asi: ‘Pinduka o lye.’ Eliya ta mono mboroto nokavaza komema. Ta li, ta nu makura ta rara hena. Muengeli ta mu pindura hena nokumutantera asi: ‘Lya o gwane nonkondo, yeeyi nzira nde.’ Eliya ta li hena. Yipo ga gendere mazuva 40, dogoro ta ka sika koNdundu zaHoreba. Oko, Eliya ta zi mekombombo a ka rare. Nye Jehova ta mu uyungisa nokutanta asi: ‘Yisinke ono ku rugana po apa, Eliya?’ Ta limburura asi: ‘Vaisraeli va teza po etumbwidiro lyawo koge. Va zonagura yizambero yoge nokudipaga vaporofete woge. Name vana hara kudipaga nge.’

Jehova ta mu tantere asi: ‘Zende o ka sikame pondundu.’ Pomuhowo, emumpepo lyenene tali piti pekombombo. Taku kwama ekankamo lyevhu nomundiro. Makura Eliya ta zuvhu ezwi lyokuwowota. Ta kudumike sipara sendi nerwakani ta sikama pevero lyekombombo. Jehova ta pura Eliya eyi ga dukilire. Eliya ta limburura asi: ‘Nyamelike nina hupu po.’ Nye Jehova ta mu tantere asi: ‘Kapisi nyovelike ono hupu po. Poveli vantu 7 000 moIsraeli ava ava karere nge. Zende o ka gwaveke Elisa nga ku kwame mouporofete.’ Eliya ta zi nokukarugana moomu ga mu tanterere Jehova. Nove Jehova nga ku vatera nsene o mu limburukwa ndi? Nhi. Tu konakoneni eyi ya horokere apa rwa kere rukukutu mosirongo.