Hompa goVasiliya Benihadadi kwa twikilire kurwisa Israeli. Nye muporofete Elisa nga rondora hompa gwaIsraeli nkenye apa yipo a tjwayuke. Makura Benihadadi yipo ga tokwere kukakwata Elisa. Apa va mu tanterere asi Elisa mweli moDotani, makura ta tumu ko vakwayita vendi va ka mu kwate.

Vakwayita Vasiliya kwa ka sikire moDotani masiku. Ngurangura zonene, mukareli gwaElisa ta pwaga makura ta mono mbunga zonene zovakwayita kuna kundurukida sitata. Age kwa tukukire ta zigire asi: ‘Elisa, ngapi natu rugana?’ Elisa ta limburura asi: ‘Wokoyiha yetu vanzi kupitakana wokoyiha yawo.’ Makura Jehova ta mahura meho gomukareli gwaElisa, ta mono nondundu nadinye kuna zura nonkambe noturukara toyita tomundiro kuna va kundurukida.

Apa vakwayita woVasiliya va here kukwata Elisa, makura Elisa ta kanderere asi: ‘Jehova, va ninka va twike.’ Nampili ngomu va  mwene, nye kapi va divire oku va kere. Elisa ta va tantere asi: ‘Muna puka. Kwameni nge, ni mu tware komugara ogu muna kupapara.’ Elisa ta va twara koSamaliya, kwahompa gwaIsraeli.

Konyima, vakwayita tava mono asi moSamaliya vana kara. Hompa gwaIsraeli ta pura Elisa asi: ‘Ni va dipage ndi?’ Elisa ga ruganesere mpito ezi mokutengwida kuwoko vakwayita ava va here kumudipaga ndi? Hawe. Elisa ta tanta asi: ‘Wa ha va dipaga. Va pa ko nondya makura o va sige va ze.’ Makura hompa gwaIsraeli ta va ruganene sipito sosinene, ta va tumu va tengure.