Kovapuli vakwetu wokuhara:

Ngovakareli vaJehova, ose kwa hara Nonkango dendi, Bibeli. Ose twa yi pura asi amo kwa kara mo yihorokwa nomapukururo gomawa ntani maumbangi aga aga likida eharo lyaJehova kovantu. (Episarome 119:105; Rukasa 1:3; 1 Johanesa 4:19) Ose kwa hara kuvatera wopeke va lironge usili womoNonkango daKarunga. Eyi yiyo twa pwagesera buke ezi, “Yisinke no lirongera ko koyihorokwa yomoBibeli?” Tuna hara kumutantera ko kuhamena buke ezi.

Sinzi soyirongwa yomobuke ezi kwa yi wapaikira vanona. Nampili ngoso, azo kuvhura kuziruganesa mokuvatera vakondi ava vana hara kulironga Bibeli. Mokumona asi Bibeli buke zankenye gumwe, natuvenye ngatu gwanena mo uwa mokukonakona yirongwa yomobuke ezi, eyi nayi tu vatera tu pameke epuro lyetu.

Buke ezi kwa simwitira yihorokwa yomoBibeli kutundilira kesito. Ose kwa litulire mo unene mokutjanga yihorokwa yomoBibeli monkedi zoureru zokuzera, ntani kuliza nomu ya likwama.

Buke ezi, kapi za tumbura tupu yihorokwa yomoBibeli. Nonkango nomafano gamo kwa ga wapaika monkedi omu nayi kuvatera o liture mo nyamoge moyihorokwa oyo ntani o lizuvhe gwendi moomu va lizuvhire ava va tumbura mo.

Buke ezi kutuvatera tu dive asi moBibeli kwa simwitira mo vantu ava va limburukwire Jehova ntani nava va dilire kumulimburukwa. Ntani kutuvatera tu lirongere ko koyihonena yawo. (Varoma 15:4; 1 Vakolinte 10:6) Azo kwa zi gaununa momaruha 14. Ketamekero lyankenye ruha kwa kara ko ekamo lyoyirongwa yimwe va zogera moruha oro.

 Nsene wa kara nomunona, kuvhura mu rese kumwe sirongwa nokuzogera kumwe mafano gomosirongwa oso. Makura kuvhura mu rese kumwe matjangwa omu sa tundilira sirongwa oso. Vatera munoge a dimburure omu sirongwa sa likwatakana neyi ana kuresa moBibeli. Kuvhura kuruganesa hena nkedi ezi mokuvatera mukondi a konakone mbudi zomoBibeli.

Tuna si huguvara asi buke ezi ngazi vatera vanona ndi vakondi wonomutjima donongwa va lironge Nonkango daKarunga nokuditura pasirugana. Yipo nawo ngava karere Jehova nokuhamena kepata lyendi lyeharo.