Nkango kupisura kuvhura kutamba kokuvyukisa ndi kokuronga. Poyiruwo yimwe, kwa hamena mo kuvyukisa munona ana kudira kuzuvha. Nye nkenye apa kuhamena mo edeuro eli nali vatera munona a lironge kutura po matokoro gomawa.

Momazuva getu, episuro simpe polili nye momapata gamwe lya dongonoka mo, morwa vakondi kutjira asi kuvyukisa munona kuvhura yi mu ninkise a litare asi age kwato mulyo. Nye, vakondi wovawa kutulisa po noveta donongwa ntani kudeura vana vawo va kwame noveta odo.

Pamela kwa tanta asi: “Vanona va hepa noveta edi nadi va vatera yipo nawo ngava ka kare vakondi wovawa. Pwa hana episuro, vanona kuyakara ngwendi sikepa vana kudira kuvyukisa nosirapo, konyima tasi ya zapuka mo monzira ndi tasi dama.”

Wa ha tjindja-tjindja. Nsene munoge kapi ana kukwama noveta doge, ga hepa kudiva yitundwamo. Ano nsene munoge kuna kusikisa mo noveta doge, mu pandadeka.

Christine kwa tanta asi: “Ame nkenye apa kupandadeka vana vange kweyi ava limburukwa mouzuni ou, vantu ava dili kulimburukwa. Epandadeko kuvaninkisa yi va rerupire kutambura mavyukiso nsene vana ga hepa.”

MPANGO ZOMOBIBELI: “Nkenye eyi a kunu muntu, yiyo nga zagura yooyo.”—Vagarata 6:7.

Pisura kuliza noukaro. Nsene kuna kupisura munona, wa hepa kutara konomvhura dendi neyi ga diva ntani nepuko eli ana rugana. Episuro ureru kulitambura nsene li liza nepuko eli ana rugana, pasihonena, nsene munona kuruganesa selefoni momudona, kuvhura kuzimugusa ndi kusesupika siruwo esi ga hepa kuziruganesa. Ntani hena, nyokera po kuhanduka usimbu koyininke yoyinunu-nunu.

Wendell kwa tanta asi: “Ame kuhetekera ko kutara nsene asi munona kapi ana hara kulimburukwa mowina ndi kuna lipuka tupu. Pwa kara elisigo pokatji konkareso zondona ezi ga hepa kutjindja ntani nepuko eli mwa hepa tupu kuvyukisa.”

MPANGO ZOMOBIBELI: “Walye omu tugumukire unene vana veni, neisi va mu suwurukwa.”—Vakorosi 3:21.

Kara neharo. Vanona ureru kutambura episuro nsene va yi dimburura asi sitambo seyi vana kuvapiswira morwa kwa va hara.

Daniel kwa tanta asi: “Apa munwetu ga tulire mapuko, ose ngatu mu tantere asi matokoro gomawa aga wa tulire po kutuhafesa sili. Ose kwa mu tanterere asi epuko eli ana rugana kapi tali mu ninkisa a kare muntu gomudona nye ga hepa tupu kutura po marunduruko ntani asi yiyo twa karera po tu mu vatere.”

MPANGO ZOMOBIBELI: “Eharo kwa kwata nedidimiko nounambili.”—1 Vakolinte 13:4.