Yinzi ya hamena mo mokulidiva nyamoge kupitakana tupu edina nemoneko lyoge. Ayo kwa hamena mo yitambo yoge neyi wa pura ntani yikara yoge. Yosili, kulidiva nyamoge kwa hamena mo nayinye eyi ayi ku ninkisa asi ove muntu musinke.

Nsene o lidiva nyamoge, ove ngo kwaterera kweyi wa pura nokudira kupulisira vepupi lyoge va ku pangere ndi va ku tokwere po.

Adrian kwa tanta asi: “Sinzi sovantu kwa fana gwendi yipopisa eyi ava tura moyitora. Ayo kapi ayi horowora yikoverero eyi nayi dwara, vantu yiwo ava yi horowere po.”

Courtney kwa tanta asi: “Ame na lironga kukwaterera kweyi youhunga nampili yi kare udigu. Ame kudimburura vakwetu wousili kupitira monkedi omu ava kara name ntani nomu ani kara nawo.”

MPANGO ZOMOBIBELI: “Mwa ha lifana nouzuni ou. Nye sigeni Karunga a rundurure magazaro geni, mu situnuke nawa-nawa.”—Varoma 12:2.

Mokudiva asi ove muntu musinke ntani muntu musinke ono hara kukara wa hepa kukonakona unankondo woge nomaupirankondo goge ntani neyi wa pura. Nkedi zongwa zokutameka kuyirugana kuna kara pokulimburura mapuro gana kukwama ko.

Unankondo: Udivi musinke na kara nawo? Kupi wa karera unankondo wange? (Pasihonena: Ame kuruganesa siruwo ndi? kulipangera ndi? kurugana unene ndi? ndi ugavi?) Yininke musinke yoyiwa ani rugana?

EGANO: Ayo kukudigopera kudimburura yininke yoyiwa eyi o rugana ndi o uyunga ndi? Pura mukurona ndi mukweni ogu wa huguvara asi unankondo musinke ou wa kara nawo a hafere, ntani morwasinke.

MPANGO ZOMOBIBELI: “Nkenye ogu a kona-kone yirugana yamwene, ntani nye a lifumadeke mwamwene, kapisi a liyereke namukwawo.”—Vagarata 6:4.

Maupirankondo: Maupirankondo musinke na hepa kuwapukurura? Siruwoke ani hara kugwira momaheteko? Momaruha musinke na hepa kulikida unene elipangero?

MPANGO ZOMOBIBELI: “Ntene tu tanta asi ose kutupu nonzo, tatu likumbagere nyamwetu.”—1 Johanesa 1:8.

Eyi wa pura: Nompango musinke ani kwama, ntani morwasinke? Ame kwa pura mwaKarunga ndi? Maumbangi musinke ga vatera nge ni yi pure asi Karunga yipo ga kara? Nonkareso musinke ani tara asi kapi da wapa, ntani morwasinke? Yisinke na pura kuhamena meho?

MPANGO ZOMOBIBELI: “Mayere nonondunge doge ngayi ku gamena.”—Yisewe 2:11.