YOVADINKANTU
11: Kurugana unene
EYI AYI TANTA
Vantu wokurugana unene kapi va tjira yirugana. Nye, awo kuhafera kurugana unene mokupakera mbili yihepwa yawo nokuvatera wopeke, nampili yirugana oyo yi moneke ngwendi kwato mulyo.
EYI YA KARERA NOMULYO
Usili wou asi, meparu kwa kara mo yitumbukira yoyinzi. Wovanzi mouzuni ou kapi va hara kurugana unene, nye nsene o rugana unene ngo gwanena mo mauwa.—Muudisi 3:13.
Reyon kwa tanta asi: “Ame na yi dimburura asi nsene o rugana unene, to lizuvhu uwaawa ntani to gwana ruhafo. Kulizuvha mfumwa kwa vatera nge ni lironge kuhafera yirugana. Kukara nonkareso zangoso ngayi kuvatera o kare nedina lyewa.”
MPANGO ZOMOBIBELI: “Nsene to rugana ngo paruka.”—Yisewe 14:23.
EYI NO RUGANA
Tunga po mutaro gomuwa kuhamena kurugana pokukwama magano aga.
Gwana ruhafo mokurugana nawa yininke. Yi kare asi kuna kurugana yirugana yemembo ndi yokosure ndi eyi no vhura kulireresa, litura mo unene. Nkenye apa no rugana yirugana, papara nonkedi omu no vhura kugwederera kweyi wa diva nare yipo o genderere ndi o rugane kupitakana pweyi ngo rugana. Moomu ono kugwederera ko kweyi wa diva, yimo ngo hafera yirugana yoge.
MPANGO ZOMOBIBELI: “Likida nge mugara ogu a rugana yoyiwa, makura ame ngani ku likide mugara ogu ga pitakana sinzi sombunga zohompa womakuto.”—Yisewe 22:29.
Dimburura mulyo gokurugana. Rorunzi, nkenye apa nsene o pakera mbili nawa yitumbukira yoge, wopeke nawo kugwanena mo mauwa. Pasihonena, nsene o litura mo unene moyirugana yoge, to rerupike yirugana yava vemepata.
MPANGO ZOMOBIBELI: “Kugava kwa kara nerago, kwa pitakana kutambura.”—Yirugana 20:35.
Litura mo unene. Mevango lyokurugana tupu yoyisesu, hetekera ko kurugana yoyinzi kupitakana eyi ngano wa hepa kurugana. Monkedi zangesi, ove ngo diva eyi ono hara meparu, pokurugana yoyinzi morwa yimo ono hara nye kapisi morwa kuyiruganena komusininiko.—Mateusa 5:41.
MPANGO ZOMOBIBELI: “Ame kapi nina hara kukusininika asi o kwafe nge, kuna hara o yi rugane moomu ono harere.”—Firemoni 14.
Kara neyereko. Vantu wokurugana unene kapi va kara noudwa ndi va lidipage mokurugana. Awo kuyereka mokurugana, pokugwana ruhafo mokurugana kwawo unene ntani nokulitulira po yiruwo yokupwizumuka.
MPANGO ZOMOBIBELI: “Kuvhura yi kare ngoso, nye nani yahasa po yokukara naka kokanunu ove nondunge zoge, kupitakana kukara moupyakadi siruwo nasinye nomawoko goge gavali, o kambadare kukwata mpepo.”—Muudisi 4:6.
