YOVALIKWALI
3: Lifumadekeni
EYI AYI TANTA
Valikwali ava ava lifumadeke, kulilikida eharo nampili kuna kara po madiro kulizuvha. Buke Ten Lessons to Transform Your Marriage kutanta asi: “Valikwali vangoso kapi ava pulisire madiro kulizuvha ga va gaunune. Nye awo kuzogera kumwe va kohonone po udigu ou una kara po. Awo kupurakena nefumadeko komagano gamukwawo ntani awo kuhetekera ko kulizasana.”
MPANGO ZOMOBIBELI: “Eharo . . . kapi ali papara yeeyi lya hara lyene.”—1 Vakolinte 13:4, 5.
Micah kwa tanta asi: “Mokufumadeka mukadange kutanta asi na hepa kuyidimburura asi age mulyo ntani kapisi ni rugane nkenye eyi nayi mu koresa ndi nayi zonagwisa po nonkwara detu.”
EYI YA KARERA NOMULYO
Pwa hana efumadeko, valikwali kuvhura va lipe usima nokuliswaura ntani kulitangwisa, yidiviso eyi va tanta valirongi asi yiyo ayi twaredesa kelizumbo.
Brian kwa tanta asi: “Kuuyunga mukadoge momudona ndi kumuteura kupitakanena komeho zovantu kuvhura kumuninkisa a zumbanese ehuguvaro moge ntani kutezesa po nonkwara.”
EYI NO RUGANA
LIPURA ASI
Nomena nzogera zeni noyirugana yeni sivike nasinye. Makura lipura asi:
‘Rungapi kani pere usima mulikwali gwange ntani rungapi kani mu pandandekere?’
‘Momaruha musinke kani likidire efumadeko komulikwali gwange?’
ZOGERA NOMULIKWALI GOGE
Nonkango noyirugana musinke eyi nayi ninkisa nkenye gumwe gweni ali zuvhe asi kuna kumufumadeka?
Nonkango noyirugana musinke eyi nayi ninkisa nkenye gumwe gweni a lizuvhe asi kapi vana kumufumadeka?
MAGANO
Tjanga nonkedi ntatu omu ono hara va ku likide efumadeko. Mulikwali goge nage a rugane yokulifana. Litjindjeni yipepa, makura ruganeni ko yuma mokulikida efumadeko momaruha ogo muna dimburura.
Tjanga hena yikara yomulikwali goge eyi wa hara. Makura tantera mulikwali goge omu ayi kuhafesa yikara oyo.
Megan kwa tanta asi: “Mokufumadeka mugara gwange kutanta asi na hepa kuyilikida moyirugana yange asi age mulyo ntani asi nina hara a hafe. Kapi ya kwatera mo tupu moyininke yoyinene nye nampili moyininke yoyinunu ayo kuvhura kulikida asi wa mu fumadeka sili.”
Mokuhulisa, kapi ya korera omu o lizuvhu nyamoge asi ove kulikida efumadeko ndi hawe, nye kwa korera omu ali zuvhu nsene asi ove kumufumadeka.
MPANGO ZOMOBIBELI: “Kareni nonkenda nombili nomalinunupiko nekuruko nezaverero.”—Vakorosi 3:12.
